ខេត្តសៀមរាប ៖ ព្រៃឈើមិនត្រឹមតែផ្តល់ផលប្រយោជន៍ចំពោះមនុស្ស និងសត្វប៉ុណ្ណោះទេ តែព្រៃឈើក៏រឹងរឹតតែមានប្រយោជន៍ចំពោះបេតិកភណ្ឌថែមទៀត ព្រោះព្រៃឈើអាចធ្វើជារបាំងខ្យល់ ទប់ស្កាត់ការសឹករេចរឹល
ខេត្តសៀមរាប ៖ ព្រៃឈើមិនត្រឹមតែផ្តល់ផលប្រយោជន៍ចំពោះមនុស្ស និងសត្វប៉ុណ្ណោះទេ តែព្រៃឈើក៏រឹងរឹតតែមានប្រយោជន៍ចំពោះបេតិកភណ្ឌថែមទៀត ព្រោះព្រៃឈើអាចធ្វើជារបាំងខ្យល់ ទប់ស្កាត់ការសឹករេចរឹល និងស្រូបទឹកក្រោមដីដើម្បីផ្តល់សំណើមដល់ប្រាង្គប្រាសាទ ។
នៅព្រឹកថ្ងៃទី១០ ខែមករា ឆ្នាំ២០១៧កូនឈើចម្រុះចំនួន១៨០០ដើម ត្រូវអាជ្ញាធរជាតិអប្សរាដាំនៅតាមជើងទំនប់បារាយណ៍ជ័យតដាកខាងជើង តាមដងផ្លូវទៅប្រាសាទនាគព័ន្ធ ដែលជាទីតាំងត្រូវការពារទាំងបេតិកភណ្ឌ និងទេសភាពធម្មជាតិនៃតំបន់ទាំងមូល ។
លោកវ៉ាត ប៊ុនថា បុគ្គលិកបច្ចេកទេសនាយកដ្ឋានគ្រប់គ្រងទឹក នៃអាជ្ញាធរជាតិអប្សរាបញ្ជាក់ថាកូនឈើដែលក្រុមការងារយកទៅដាំតាមជើងទេរទំនប់បារាយណ៍មាន៣ប្រភេទ រួមមានកូនរំដួល៦០០ដើម កូនក្របៅ៦០០ដើម និងកូនរាំង៦០០ដើមដើម្បីការពារជើងទេររបស់ទំនប់ពីការហូរច្រោះដីនៅពេលមានភ្លៀងធ្លាក់។ ការដាំកូនឈើតាមជើងទេរទំនប់បារាយណ៍នេះ វាមិនត្រឹមតែជួយការពារជើងទេរទំនប់ប៉ុណ្ណោះទេ ប៉ុន្តែវានៅផ្តល់សោភ័ណភាពដល់បារាយណ៍ ជួយកាត់បន្ថយរំហួតទឹក ព្រមទាំងផ្តល់ម្លប់ដ៏ត្រជាក់ត្រជុំដល់ភ្ញៀវទេសចរនៅពេលធ្វើដំណើរទស្សនាកម្សាន្តក្នុងតំបន់ឧទ្យានអង្គរទៀតផង។
ក្នុងឆ្នាំ២០១៦កន្លងទៅ អាជ្ញធរជាតិអប្សរាក៏ធ្លាប់ដាំកូនឈើតាមជើងទេរទំនប់បារាយណ៍ជ័យតដាកនេះចំនួន១៥០០ដើមដែរ ក្នុងន័យរួមចំណែកអភិរក្សនិងលើកតម្លៃទេសភាពវប្បធម៌ធម្មជាតិនៃតំបន់ឧទ្យានអង្គរឲ្យភាពស្រស់ស្អាតជាប្រចាំដើម្បីទាក់ទាញភ្ញៀវទេសចរឲ្យមកទស្សនាកាន់តែច្រើនឡើងថែមទៀត ៕
ចែករំលែកព័តមាននេះ