សារព័ត៌មានរុស្ស៊ីមួយរាយការណ៍កាលពីថ្ងៃទី១៤ មករា ថា ប្រទេសរុស្ស៊ីនឹងដាក់ពង្រាយប្រព័ន្ធមីស៊ីលដី-អាកាស S-400 TRIUMPH ច្រើនថែមទៀតនៅតំបន់គ្រីមេ បន្ទាប់ពីរដ្ឋាភិបាលលោកបារ៉ាក់ អូបាម៉ា ពន្យារពេលការដាក់ទណ្ឌកកម្មប្រឆាំងរុស្ស៊ីដោយសារសកម្មភាពរបស់ខ្លួននៅគ្រីមេ និងនៅអ៊ុយក្រែន ។
មេបញ្ជាការជាន់ខ្ពស់ម្នាក់របស់កងទ័ពអាកាសរុស្ស៊ីឧត្តមសេនីយ៍វិកទ័រ សឺវ៉ាស្ទីយ៉ាណូវ ដកស្រង់សម្តីដោយទីភ្នាក់ងារព័ត៌មាន RIA NOVOSTI ថ្លែងថា ការដាក់ពង្រាយប្រព័ន្ធ S-400 បន្ថែមទៀតនៅគ្រីមេត្រូវបានគ្រោង ក៏ប៉ុន្តែពេលនេះខ្ញុំមិនអាចនិយាយពីកាលបរិច្ឆេទឡើយ ។
យោធភូមិភាគខាងត្បូងរបស់រុស្ស៊ីរាយការណ៍កាលពីថ្ងៃទី១៣ មករា ថា កងវរសេនាធំមីស៊ីលការពារអាកាសបំពាក់ដោយប្រព័ន្ធ S-400 ត្រូវបានដាក់ពង្រាយនៅគ្រីមេ ។ មីស៊ីល S-400 TRIUMPH ជាប្រព័ន្ធមីស៊ីលដី-អាកាសទំនើបបំផុតរបស់រុស្ស៊ី មានសមត្ថភាពវាយប្រហារគោលដៅលើអាកាសមួយក្នុងចម្ងាយដល់៤០០គីឡូម៉ែត្រ ។
ប្រធានាធិបតីចប់អាណត្តិសហរដ្ឋអាេមរិក លោកបារ៉ាក់ អូបាម៉ា បានចេញបញ្ជាកាលពីថ្ងៃទី១៣ មករា ឱ្យពន្យារពេលមួយឆ្នាំទៀតការដាក់ទណ្ឌកម្មប្រឆាំងរុស្ស៊ី ដែលមានចាប់តាំងពីខែមីនា ឆ្នាំ២០១៤មក ដោយសំអាងលេសថា រុស្ស៊ីដណ្តើមយកតំបន់គ្រីមេ ហើយប្រើប្រាស់កម្លាំងនៅអ៊ុយក្រែន ។
ក្រុងមូស្គូបានពង្រឹងវត្តមានយោធារបស់ខ្លួននៅគ្រីមេជាមួយការដាក់ពង្រាយបណ្តាប្រព័ន្ធការពារអាកាស និងការពារមីស៊ីលពិសេសប្រព័ន្ធមីស៊ីល PANTSIR-S និង S-400 ។ ប្រព័ន្ធការពារអាកាសរយៈខ្លី និងរយៈមធ្យម PANTSIR-S ត្រូវបានដាក់ពង្រាយនៅគ្រីមេដែរ ចាប់តាំងពីខែធ្នូ ឆ្នាំ២០១៦មក ។
ចាប់តាំងពីដើមឆ្នាំ២០១៦មក យន្តហោះ និងឧទ្ធម្ភាគចក្រ៤០គ្រឿងត្រូវបានដាក់ពង្រាយនៅទីនោះ ។ ក្នុងចំណោមយន្តហោះប្រដេញដែលដាក់ពង្រាយមានយន្តហោះធុន SU-25SM និង SU-30SM ព្រមទាំងឧទ្ធម្ភាគចក្រធុន MI-8AMTSH TERMINATOR ឧទ្ធម្ភាគចក្រ KA-52 ALLIGATOR ធុន MI-28 N “NIGHT HUNTER” និងធុន MI-26 ។
ប្រព័ន្ធមីស៊ីល PANTSIR-S 96K6 ផលិតចុងក្រោយត្រូវបានដាក់ឱ្យប្រើប្រាស់កាលពីឆ្នាំ២០១២ ដើម្បីជួយទ្រទ្រង់ដល់ប្រព័ន្ធ S-400 និង S-300 ជាប្រព័ន្ធមីស៊ីលការពារអាកាសដែលផលិតកាលពីដើមទសវត្សឆ្នាំ១៩៩០ ៕
ចែករំលែកព័តមាននេះ