បង្ក្រាបរថយន្តគ្មានបង់ពន្ធ ពាក់ផ្លាកលេខក្លែងក្លាយ១១គ្រឿង
- បន្ទាយមានជ័យ
មន្ត្រីគយ និងរដ្ឋាករតំបន់៥ បោះទីតាំងនៅខេត្តជាប់ព្រំដែនថៃ បានធ្វើការបង្ក្រាបរថយន្តគ្មានពន្ធ ពាក់ផ្លាកលេខក្លែងក្លាយ បានចំនួន១១គ្រឿង
ខេត្តបន្ទាយមានជ័យ ៖ មន្ត្រីគយ និងរដ្ឋាករតំបន់៥ បោះទីតាំងនៅខេត្តជាប់ព្រំដែនថៃ បានធ្វើការបង្ក្រាបរថយន្តគ្មានពន្ធ ពាក់ផ្លាកលេខក្លែងក្លាយ បានចំនួន១១គ្រឿង កាលពីថ្ងៃទី១០ ខែសីហា ឆ្នាំ២០២២ ក្នុងភូមិសាស្ត្រភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ។
មន្ត្រីគយ និងរដ្ឋាករការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ខេត្តបន្ទាយមានជ័យ បានប្រាប់ថា តាមការណែនាំពីអគ្គនាយកដ្ឋានគយ និងរដ្ឋាករឱ្យប្រមូលពន្ធ ដែលជាកាតព្វកិច្ចមន្ត្រីជំនាញ បានចុះស្រាវជ្រាវ និងសហការជាមួយកម្លាំងមូលដ្ឋាន ដែលដឹកនាំដោយលោក លឹម ប៊ុនសុភ័ក្រ ព្រះរាជអាជ្ញារងនៃអយ្យការអមសាលាដំបូងខេត្តបន្ទាយមានជ័យ ចុះចាប់រថយន្តគ្មានពន្ធ និងពាក់ផ្លាកលេខក្លែងក្លាយបានចំនួន១១គ្រឿង ត្រូវយកទៅរក្សាទុកនៅការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ខេត្តបន្ទាយមានជ័យ ។
មន្ត្រីគយបានបញ្ជាក់ទៀតថា រថយន្តគ្មានបង់ពន្ធ ដែលត្រូវបង្ក្រាបបាន១១គ្រឿង មាន៤គ្រឿងម្ចាស់មិនបានសហការជាមួយមន្ត្រីជំនាញ និងរថយន្តចំនួន៧គ្រឿងដែលម្ចាស់បានសហការល្អជាមួយមន្ត្រីជំនាញ ។ នៅពេលចុះបង្ក្រាបមានរថយន្តប្រភេទ Mazda2 ចំនួន៥គ្រឿង រថយន្ត Mazda3 ចំនួន២គ្រឿង រថយន្តធុន Nissanmarch ចំនួន១គ្រឿង រថយន្ត Suzuki Swiff ចំនួន១គ្រឿង រថយន្តLexus.330 ចំនួន១គ្រឿង និងរថយន្ត Lexus.400h ចំនួន១គ្រឿង ។
មន្ត្រីគយ និងរដ្ឋាករបានបញ្ជាក់ទៀតថា ចំពោះរថយន្តចំនួន១១គ្រឿងដែលត្រូវមន្ត្រីគយការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ខេត្តបន្ទាយមានជ័យ បង្ក្រាបបានត្រូវយកមករក្សាទុកនៅការិយាល័យស្រាវជ្រាវ និងបង្ក្រាបអំពើរត់ពន្ធតំបន់៥ខេត្តបន្ទាយមានជ័យ ដើម្បីឱ្យម្ចាស់ចូលខ្លួនបង់ពន្ធជូនរដ្ឋតាមច្បាប់កំណត់ ៕
ចែករំលែកព័តមាននេះ