ខេត្តព្រះសីហនុ៖ កំណាត់ ឲផ្លូវជាតិលេខ៣ វាលរេញ-កំពត នៅចំណុចត្រពាំងរពៅ មានប្រវែងជាង ២០គីឡូម៉ែត្រ ឡើងគ្រឡុកបាយខុម ក្នុងពេលនេះ នាំឱ្យផ្ទុះល្បីតាមបណ្តាញសង្គមហ្វេសប៊ុកយ៉ាងខ្លាំង។ អ្នកធ្វើដំណើរពីវាលរេញ ឆ្លងកាត់ទិសដៅទៅខេត្តកំពត ក៏ភ្ញាក់ផ្អើលគ្រប់គ្នា ព្រោះកំណាត់ផ្លូវជាតិលេខ៣ ពីវាលរេញ ត្រឹមជិតស្ពានត្រពាំងរពៅ ស្ថិតក្នុងភូមិព្រែកប្រស់ ឃុំទឹកថ្លា ស្រុកព្រៃនប់ ខេត្តព្រះសីហនុ បាន និងកំពុងខូចខាតធ្ងន់ធ្ងរពិបាកធ្វើចរាចរណ៍យ៉ាងខ្លាំង។
ផ្លូវពិបាកធ្វើដំណើរនេះ គឺក្រោយពីកំណាត់ផ្លូវជាតិលេខ៣ វាលវេញ-កំពត ទើបតែបញ្ចប់ការជួសជុល កាលពីពេលថ្មីៗនេះ។ តែមិនដឹង ជាមន្ត្រីជំនាញ ជួសជុលបែបណាទេ ទើបផ្លូវក្លាយជាបាយខុម ដក់ទឹក ក្រហែងក្រហូងដូច្នេះឡើយ។
ប្រជាពលរដ្ឋ ក៏ដូចជាអ្នកធ្វើដំណើរឆ្លងកាត់ទៅមកផ្លូវនេះ ស្នើដល់មន្ត្រីជំនាញ ជាពិសេសឯកឧត្តមរដ្ឋមន្ត្រីក្រសួងសាធារណការ និងដឹកដឹកជញ្ជូន មេត្តាចុះពិនិត្យជាក់ស្ដែង ដើម្បីមានវិធាន ក្នុងការកែលម្អរ ស្តារស្ថានភាពកំណាត់ផ្លូវជាតិនេះ អោយមានភាពប្រសើរឡើងវិញ ព្រោះបច្ចុប្បន្ន ការធ្វើដំណើរពីវាលរេញ ទៅស្ពានត្រពាំងរពៅ ចំងាយប្រវែងជា ២០គីឡូម៉ែត្រ ប្រើពេលប្រមាណជា ២ម៉ោង ទៅជាង ២ម៉ោង មិនថា រថយន្តតូចធំ ឬរថយន្តដឹកទំនិញទេ គឺត្រូវមុជងើបៗ ពិបាក់បំផុត។
ប្រភពដដែល បានបន្តថា ខែប្រាំង ហុយស្ទើរដកដង្ហើមពុំបាន ជាពិសេសពលរដ្ឋ ដែលរស់នៅតាមបណ្តោយផ្លូវនេះ ក្នុងឃុំចំនួន ៤ ក្នុងស្រុកព្រៃនប់ ខេត្តព្រះសីហនុ រួមមាន÷ ១-ឃុំវាលរេញ ២-ឃុំសាមគ្គី ៣-ឃុំទឹកល្អក ៤-ឃុំទឹកថ្លា ត្រូវរងនូវការលំបាកជាងគេ។
កន្លងមក រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានលើកឡើងថា កំណាត់ផ្លូវជាតិលេខ៣ មួយកំណាត់ ពីវាលរេញ ទៅត្រឹមស្ពានត្រពាំងរពៅ ក្នុងទឹកដីខេត្តព្រះសីហនុនេះ នឹងមានស្ថាបនាតាមលក្ខណៈស្តង់ដា នៅឆ្នាំ២០២៣ ខាងមុខ ដោយកន្លែងខ្លះ ពិសេសពីវាលរេញ ទៅត្រឹមស្ពានកំពង់ស្មាច់ ប្រមាណជា ៥គីឡូម៉ែត្រ អាចនឹងប្រើវិធីបុកគ្រឹះ ទៅក្រោមដល់ផុតដីស្អុយ (បុកគ្រឹះដូចស្ពានអាកាស)។
យ៉ាងណា បើមើលស្ថានភាពជាក់ស្ដែង បច្ចុប្បន្ន ផ្លូវនេះ កំពង់ខូចខាតធ្ងន់ធរបំផុត។ ដូចនេះ គួតែក្រសួង បញ្ជូនគ្រឿងចក្រ និងអ្នកជំនាញ ជួសជុល ដើម្បីអោយប្រជាពលរដ្ឋ បានប្រើប្រាស់បានស្រួលសិន ទំរាំដល់ការស្ថាបនាថ្មី នៅឆ្នាំក្រោយ។
ជាមួយគ្នានេះ ពលរដ្ឋសង្ឃឹមថា ក្រសួង នឹងអនុវត្តតាមការស្នើសុំរបស់ពលរដ្ឋ ព្រោះសម័យសន្តិភាពប៉ុណ្ណេះហើយ នៅមានផ្លូវ ដូចឋាននរកទៀត គឺមិនគួរនោះទេ៕ ហ៊ុយ ចាន់ធួន
ចែករំលែកព័តមាននេះ