រាជធានីភ្នំពេញ ៖ ស្ដ្រីម្នាក់ខណៈទាស់ពាក្យសំដីជាមួយប្តី ក៏ស្រែកខ្លាំងថា «អញលោតសម្លា.ប់ខ្លួនឥឡូវហើយ» រួចស្រាប់តែស្ត្រីរូបនោះលោតពីផ្ទះជួលជាន់ទី១ប៉ងសម្លា.ប់ខ្លួន …
រាជធានីភ្នំពេញ ៖ ស្ដ្រីម្នាក់ខណៈទាស់ពាក្យសំដីជាមួយប្តី ក៏ស្រែកខ្លាំងថា «អញលោតសម្លាប់ខ្លួនឥឡូវហើយ» រួចស្រាប់តែស្ត្រីរូបនោះលោតពីផ្ទះជួលជាន់ទី១ប៉ងសម្លាប់ខ្លួន ប៉ុន្តែគ្រាន់តែបណ្ដាលឲ្យរបួសធ្ងន់ប៉ុណ្ណោះ ។ ហេតុការណ៍នេះកើតឡើងកាលពីវេលាម៉ោង១០ និង៣០នាទីយប់ ថ្ងៃទី១១ ខែមករា ឆ្នាំ២០១៧ នៅចំណុចផ្ទះជួលអត់លេខ ស្ថិតក្នុងភូមិទ្រា២ សង្កាត់ស្ទឹងមានជ័យ ខណ្ឌមានជ័យ ។
ស្ត្រីរងគ្រោះឈ្មោះ ភិន សុខឡេង អាយុ៤៤ឆ្នាំ មុខរបរលក់លៀសហាល ស្នាក់នៅផ្ទះជួល ក្នុងភូមិទ្រា២ សង្កាត់ស្ទឹងមានជ័យ ខណ្ឌមានជ័យ មានប្តីឈ្មោះ យន់ សុផល មុខរបររត់ឌុប មានកូនតូចចំនួន៤នាក់ ប្រុស២នាក់ ស្រី២នាក់ ។
បើតាមសម្តីអ្នកជិតខាងដែលនៅក្បែរបន្ទប់ជួលស្ត្រីរងគ្រោះបានឲ្យដឹងថា កាលពីវេលាម៉ោង៨យប់កើតហេតុ ស្ដ្រីរងគ្រោះ និងប្តីរបស់គាត់បាននាំគ្នាទៅផឹកស្រាថ្នាំជាមួយស្ត្រីម្នាក់ដែលនៅបន្ទប់ជួលជាន់ទី១ក្បែរគ្នា ដោយអង្គុយផឹកស្រាគ្នា៣នាក់អស់កន្លះលីត្រ ស្ត្រីរងគ្រោះដែលទើបនឹងមកពីលក់លៀសហាលហត់នឿយពេកទើបឆាប់ស្រវឹង ពេលនោះប្តីស្ត្រីរងគ្រោះបានបបួលទៅសម្រាកព្រោះយប់ជ្រៅហើយ ណាមួយព្រឹកឡើងត្រូវទៅធ្វើការរកស៊ីទៀត ស្រាប់តែប្រពន្ធបានឆ្លើយថា ភ័យអីអញចង់នៅផឹកបន្តិចទៀត ទើបទាំង២នាក់ប្តីប្រពន្ធទាស់សំដីគ្នា ដោយស្ត្រីរងគ្រោះជាប្រពន្ធនិយាយខ្លាំងៗថា អញលោតសម្លាប់ខ្លួនឥឡូវហើយ គ្រាន់តែនិយាយរួចបានពីរបីម៉ាត់ ស្រាប់តែស្ត្រីជាប្រពន្ធបានលោតចុះពីជាន់ទី១ទៅក្រោមភ្លាមបណ្តាលឲ្យស្ត្រីរូបនោះរបួសពកក្បាល និង បាក់ចង្កេះ ។
ក្រោយកើតហេតុ អ្នកនៅក្បែរកន្លែងកើតហេតុបានទំនាក់ទំនងទៅសមត្ថកិច្ចមូលដ្ឋាន រួចក៏ឃើញកម្លាំងកងរាជអាវុធហត្ថខណ្ឌមានជ័យចុះទៅបានធ្វើការសាកសួរ និងបានទូរស័ព្ទហៅរថយន្តសង្គ្រោះមកដឹកស្ត្រីរងគ្រោះយកទៅសង្គ្រោះនៅមន្ទីរពេទ្យមិត្តភាពខ្មែរសូវៀត ហៅពេទ្យរុស្ស៊ី ។
ទាក់ទិននឹងករណីខាងលើនេះ បុរសជាប្តីបានប្រញាប់ប្រញាល់នាំប្រពន្ធទៅព្យាបាលនៅមន្ទីរពេទ្យដែរ ប៉ុន្តែអ្នកទាំង២នាក់មិនបានមកស្រាយបំភ្លឺអ្វីនោះទេ ៕
ចែករំលែកព័តមាននេះ