រាជធានីភ្នំពេញ ៖ បុរសជាជនអនាថាគ្មានទីពឹងម្នាក់បានធ្លាក់ខ្លួនឈឺរ៉ាំរ៉ៃកំពុងស្វែងរកសប្បុរសជនដើម្បីជួយសង្គ្រោះជីវិត ដែលកំពុងដេកឈឺនៅក្នុងរោងប្រក់តង់ជិតប្រឡាយ …
រាជធានីភ្នំពេញ ៖ បុរសជាជនអនាថាគ្មានទីពឹងម្នាក់បានធ្លាក់ខ្លួនឈឺរ៉ាំរ៉ៃកំពុងស្វែងរកសប្បុរសជនដើម្បីជួយសង្គ្រោះជីវិត ដែលកំពុងដេកឈឺនៅក្នុងរោងប្រក់តង់ជិតប្រឡាយទឹកស្អុយមួយកន្លែងនៅក្បែរផ្លូវបេតុងទួលពង្រ ស្ថិតក្នុងភូមិ២៤ សង្កាត់ព្រៃស ខណ្ឌដង្កោ ។
បុរសចំណាស់អនាថាដែលធ្លាក់ខ្លួនឈឺរ៉ាំរ៉ៃនេះមិនត្រូវបានស្គាល់ឈ្មោះឡើយ អាយុប្រហែល៧០ឆ្នាំ មុខរបរដើររើសអេតចាយ ។
តាមសំដីប្រជាពលរដ្ឋ និងសមត្ថកិច្ចមូលដ្ឋានបានឲ្យដឹងថា ជារៀងរាល់ថ្ងៃ គេឃើញបុរសជាជនអនាថាដើររើសអេតចាយ និងបានស្នាក់នៅតាមចេតិយនៅក្នុងវត្តធម្មត្រ័យ ស្ថិតនៅសង្កាត់ព្រៃស ខណ្ឌដង្កោ តែក្រោយមកគេបានឃើញជនអនាថាបានរើអីវ៉ាន់ទៅប្រក់តង់នៅលើគម្របលូក្បែរផ្លូវបេតុងទួលពង្រ មើលទៅគួរឲ្យសង្វេគណាស់ ។ ហើយជិតមួយសប្ដាហ៍នេះ បុរសខាងលើបានធ្លាក់ខ្លួនឈឺ ដេកនៅលើដីយ៉ាងដង្ហក់ រហូតមកដល់ម៉ោង៩យប់ ថ្ងៃទី១១ ខែមករា ឆ្នាំ២០១៧ បុរសរូបនោះចេះតែមានអាការៈធ្ងន់ធ្ងរទៅៗ នៅពេលនោះអ្នកជិតខាងឃើញបានទំនាក់ទំនង់ទៅសមត្ថកិច្ចមូលដ្ឋានមកមើល ហើយសមត្ថកិច្ចមូលដ្ឋានបានទំនាក់ទំនងទៅខាងរថយន្តសង្គ្រោះនៅតាមពេទ្យមួយចំនួន តែគ្មានរថយន្តសង្គ្រោះរបស់មន្ទីរពេទ្យ ឬគ្លីនិកណាមកដឹកបុរសអនាថារូបនោះយកទៅព្យាបាលឡើយ ដោយខាងរថយន្តសង្គ្រោះបានប្រាប់ថា រវល់ជាប់ដឹកអ្នកជំងឺផ្សេងទៀត បើដឹកជនអនាថាបែបនេះយកទៅក៏ពេទ្យមិនទទួលមើលដែរ ។
ជនអនាថាខាងលើនេះមិនមានរថយន្តសង្គ្រោះដឹកយកទៅព្យាបាល គឺបានត្រឹមតែដេករង់ចាំនៅថ្ងៃស្លាប់តែប៉ុណ្ណោះ ។
ចំពោះបញ្ហានេះដែរបងប្អូនប្រជាពលរដ្ឋបានលើកឡើងថា គឺផ្តោតទៅលើអាជ្ញាធរមូលដ្ឋាន ភូមិ ឃុំ សង្កាត់ ហាក់បីដូចជាមិនអើពើអ្វីទាំងអស់ សូម្បីតែមុងកញ្ចាស់មួយក៏មិនផ្តល់ឲ្យគ្នាចងសម្រាប់ដេកផង គឺទុកឲ្យបុរសរូបនោះដេកហាលវាលឲ្យមុសខាំជារៀងរាល់ថ្ងៃរាល់យប់តែប៉ុណ្ណោះ ៕
ចែករំលែកព័តមាននេះ