រាជធានីភ្នំពេញ ៖ ដោយមានការចុះអនុស្សារណៈនៃការយោគយល់គ្នារវាងសហរដ្ឋអាមេរិក និងកម្ពុជានោះសហអាមេរិកបានប្រគល់សម្បត្តិវប្បធម៌ដែលចោរលួចពីប្រាសាទក្នុងរមណីយដ្ឋានកោះកេចំនួន៣០រូបមកកម្ពុជាវិញ ។
យោងតាមសេចក្តីជូនព័ត៌មានរបស់ក្រសួងវប្បធម៌ និងវិចិត្រសិល្បៈ នៅថ្ងៃទី៨ សីហានេះស្ដីពីការបញ្ជូនសម្បត្តិវប្បធម៌ខ្មែរចំនួន៣០រូបពីសហរដ្ឋអាមេរិកត្រឡប់មកព្រះរាជាណាចក្រកម្ពុជាវិញ បានលើកឡើងថា ក្រសួងវប្បធម៌ និងវិចិត្រសិល្បៈមានកិត្តិយស សូមជម្រាបជូនសាធារណជនជ្រាបថា សម្បត្តិវប្បធម៌ខ្មែរចំនួន៣០រូបនឹងត្រូវបញ្ចូនពីសហរដ្ឋអាមេរិកមកប្រទេសកម្ពុជាវិញ ។
ក្រសួងថា វត្ថុទាំងនេះជាប់ពាក់ព័ន្ធនឹងករណីកាន់កា.ប់វត្ថុ បុរាណដោយខុសច្បាប់ដែលត្រូវបានរឹបអូសដោយរដ្ឋអាជ្ញាសហរដ្ឋអាមេរិកនៃសង្កាត់ភាគខាងត្បូងក្រុងញូវយ៉ក សហការជាមួយការិយាល័យស៊ើបអង្កេតសន្តិសុខមាតុភូមិសហរដ្ឋអាមេរិក អនុលោមតាមអនុស្សារណៈនៃការយោគយល់គ្នារវាងរាជរដ្ឋាភិបាលកម្ពុជា និងរដ្ឋាភិបាលសហរដ្ឋអាមេរិកស្តីពីការដាក់កំរិតហាមប្រាមនូវការនាំចូលលើប្រភេទនៃវត្ថុបុរាណរបស់កម្ពុជា។
ក្រសួងបានបញ្ជាក់ថា ៖«ក្នុងចំណោមសម្បត្តិវប្បធម៌ខ្មែរនេះមានរូបបដិមាសំខាន់ៗមួយចំនួនផ្នែកពុទ្ធ សាសនា និងព្រហ្មញ្ញសាសនាដូចជា រូបចម្លាក់ដ៏ពិចិត្រ «ព្រះស្កន្ទគង់លើក្ងោក» និង«ព្រះគណេស» ដែលត្រូវបានលួចយកចេញពីប្រាសាទក្នុងរមណីយដ្ឋានកោះកេ អតីតរាជធានីនៃអាណាចក្រខ្មែរនៅសតវត្សរ៍ទី១០ នៃគ.ស ។ ប្រាសាទកោះកេរធ្លាប់ជាគោលដៅនៃការលួចទ្រង់ទ្រាយធំអស់ជាច្រើនឆ្នាំនៅក្នុងអំឡុងសម័យសង្គ្រាម ។
ឯកឧត្ដម កែវ ឈា ឯកអគ្គរាជទូតកម្ពុជាប្រចាំសហរដ្ឋអាមេរិក តំណាងឱ្យរាជរដ្ឋាភិបាលកម្ពុជា និងលោក Damien Williams អគ្គរដ្ឋអាជ្ញាសហរដ្ឋអាមេរិកនៃសង្កាត់ភាគខាងត្បូងក្រុងញូវយ៉ក បានចូលរួមនៅក្នុងពិធីប្រគល់-ទទួលសម្បត្តិវប្បធម៌ខ្មែរចំនួន៣០រូបនេះនៅទីក្រុងញូវយ៉ក ។
ក្រសួងកំពុងធ្វើការជាមួយក្រុមហ៊ុនដឹកជញ្ជូន ដើម្បីចាត់ចែងការដឹកវត្ថុទាំង៣០រូបមកកម្ពុជាក្នុងពេលវេលាខាងមុខនេះ ហើយក្រសួងនឹងជូនព័ត៌មានបញ្ជាក់បន្ថែមនៅពេលវត្ថុទាំងនេះមកដល់កម្ពុជា ។
លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានមានប្រសាសន៍ថា ៖«យើងពិតជាសេចក្តីរំភើបទទួលស្វាគមន៍នៃការវិលត្រឡប់មកវិញនូវរតនសម្បត្តិដ៏ល្អឯកទាំងនេះដែលជាព្រលឹងបុព្វបុរសខ្មែរជាច្រើនជំនាន់ និងតំណាងឱ្យភាពរុងរឿងនៃចក្រភពខ្មែរ» ។
លោកជំទាវរដ្ឋមន្ត្រីបានបន្ថែមថា «ការបញ្ជូនមកវិញនេះ គឺអាចសម្រេចទៅបានដោយសារកិច្ចសហប្រតិបត្តិការ និងការខិតខំប្រឹងប្រែងរួមគ្នារវាងរដ្ឋាភិបាលនៃប្រទេសទាំងពីរ (កម្ពុជា និងសហរដ្ឋអាមេរិក) និងក៏ដោយសារប្រទេសកម្ពុជាមានសុខសន្តិភាពពេញលេញតាមរយៈនយោបាយឈ្នះ-ឈ្នះ ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលផ្ដល់ឱកាសក្នុងការនាំមកវិញនូវព្រលឹងបុព្វបុរសខ្មែរដែលបាន រសាត់ចាកឆ្ងាយពីមាតុភូមិកំណើតអស់ជាច្រើនឆ្នាំនាសម័យសង្គ្រាម និងអសន្តិសុខ ។
ក្នុងនាមរាជរដ្ឋាភិបាលកម្ពុជា លោកជំទាវរដ្ឋមន្ត្រីបានថ្លែងអំណរគុណ និងកោតសរសើរចំពោះកិច្ចសហប្រតិបត្តិការ និងការខិតខំប្រឹងប្រែងពីសំណាក់ស្ថាប័ននានារបស់សហរដ្ឋអាមេរិក ជាពិសេសរដ្ឋអាជ្ញាសហរដ្ឋអាមេរិកនៃសង្កាត់ភាគខាងត្បូងក្រុងញូវយ៉ក, ការិយាល័យស៊ើបអង្កេត សន្តិសុខមាតុភូមិសហរដ្ឋអាមេរិក និងស្ថានទូតសហរដ្ឋអាមេរិកប្រចាំនៅកម្ពុជា។
ជាមួយនេះ លោកជំទាវរដ្ឋមន្ត្រីបានថ្លែងអំណរគុណដល់ក្រសួងពាក់ព័ន្ធ,ស្ថានទូតកម្ពុជានៅរដ្ឋធានីវ៉ាស៊ីនតោន ក្រុមការងារក្រសួងវប្បធម៌និងវិចិត្រសិល្បៈ និងពិសេសដល់លោកមេធាវី Bradley Gordon និងលោកមេធាវី Steven Heimberg ដែលបានចំណាយពេលអស់ជាច្រើនឆ្នាំ ក្នុងការសហការ ជាមួយក្រុ មការងារកម្ពុជា ដើម្បីស្រាវជ្រាវ និងស្វែងរកមកវិញនូវសម្បត្តិវប្បធម៌ខ្មែរជាច្រើនមិនអាចកាត់ថ្លៃបាន។
លោកជំទាវក៏បានថ្លែងអំណរគុណដល់សារមន្ទីរ និងអ្នកកាន់កាប់សមុច្ច័ យឯកជននានា ដែលបានស្ម័គ្រចិត្តប្រគល់មរតកវប្បធម៌ជាតិមកកម្ពុជាវិញ ។ ជាមួយនឹងយុទ្ធនាការសកល លោកជំទាវរដ្ឋមន្ត្រីបានអំពាវនាវដល់សារមន្ទីរនានា ក៏ដូចជា អ្នកកាន់កា.ប់សមុច្ច័ យឯកជននៅទូទាំងពិភពលោក សូមចូលរួមសហការផ្ដល់ឯកសារភស្តុតាង និងប្រគល់សម្បត្តិវប្បធម៌ដែលជាអត្តសញ្ញាណជាតិ ត្រឡប់មកប្រទេសកំណើតវិញ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ