យោងតាមទូរទស្សន៍អាមេរិក CNN ថា បណ្តាអ្នកទទួលខុសត្រូវខាងស៊ើបការណ៍អាមេរិកបានរាយការណ៍ដល់លោកដូណាល់ ត្រាំ ក្នុងរបាយការណ៍សម្ងាត់មួយថា បណ្តាភ្នាក់ងាររបស់វិមានក្រឹមឡាំងមានក្នុងដៃបណ្តាព័ត៌មានផ្ទាល់ខ្លួននិងហិរញ្ញវត្ថុរបស់លោកត្រាំដែលអាចបង្ខូចកិត្យានុភាពរបស់លោក ។
CNN អះអាងថា ពេលដែលបណ្តាអ្នកទទួលខុសត្រូវខាងស៊ើបការណ៍បង្ហាញជូនលោកកាលពីថ្ងៃទី៧ មករា នូវរបាយការណ៍សម្ងាត់ពីការលូកដៃរបស់រុស្ស៊ីចូលក្នុងយុទ្ធនាការឃោសនាបោះឆ្នោតប្រធានាធិបតី អ្នកទទួលខុសត្រូវទាំងនោះបានជម្រាបលោកត្រាំថា បណ្តាភ្នាក់ងារវិមានក្រឹមឡាំងមានព័ត៌មាននានាពីរឿងផ្ទាល់ខ្លួននិងហិរញ្ញវត្ថុរបស់លោកត្រាំដែលអាចប៉ះពាល់លោក ។ របាយការណ៍មាន២ទំព័រនោះត្រូវបានប្រគល់ដំណាលគ្នាដល់លោកបារ៉ាក់ អូបាម៉ា និងលោកត្រាំ ។
ការអះអាងបែបនេះបានមកពីអតីតភ្នាក់ងារអង់គ្លេសម្នាក់ដែលគេយល់ថាអាចគួរឱ្យជឿព្រោះតែគេមានបណ្តាញច្រើនទាក់ទងនៅទូទាំងអឺរ៉ុប ។
ការបញ្ចេញរបាយការណ៍នេះធ្វើឡើងខណៈលោកបារ៉ាក់ អូបាម៉ា ថ្លែងសុន្ទរកថាចុងក្រោយជាសុន្ទរកថាលាចាកសេតវិមាននៅឯទីក្រុងស៊ីកាហ្គោនាថ្ងៃទី១០ មករា និងខណៈលោកត្រាំត្រៀមចូលកាន់សេតវិមាន ។ សារព័ត៌មានអាមេរិកជាច្រើនលាតត្រដាងសំណុំរឿងពុះកញ្ជ្រោលនោះដែលបច្ចុប្បន្នពុំមានការផ្ទៀងផ្ទាត់ តែអាចប៉ះពាល់ខ្លាំងដល់កិត្យានុភាពរបស់អនាគតប្រធានាធិបតីអាមេរិក ។ CNN ជាអ្នករាយការណ៍រឿងនេះមុនគេតាំងពីដើមរសៀលថ្ងៃទី១០ មករា ដោយយោងតាមប្រភពអនាមិក ។
ដោយជាសំណុំរឿងសម្ងាត់បំផុតវាត្រូវបានផ្តល់ឱ្យតែមនុស្ស១០នាក់ក្នុងនោះមានលោកអូបាម៉ា និងលោកត្រាំ កាលពីសប្តាហ៍មុន ៕
ចែករំលែកព័តមាននេះ