រាជធានីភ្នំពេញ ៖ ហុងកុងជាមជ្ឈមណ្ឌលសេដ្ឋកិច្ចដ៏សំខាន់បំផុតរបស់ពិភពលោកដែលស្ថិតនៅលើដែនកោះមួយ។ នៅក្នុងឆ្នាំ២០១៦ ទីក្រុងមួយនេះ បានទទួលស្វាគមន៍ភ្ញៀវទេសចរមកពីជុំវិញពិភពលោកចំនួន៤២,៨លាននាក់ ។
ភ្ញៀវទេសចរដែលធ្វើដំណើរទៅទស្សនាទីក្រុងគុជនៅអាស៊ីមួយនេះ ពិតជាមានអារម្មណ៍រំភើបតាមរយៈការមើលឃើញពីការអភិវឌ្ឍនូវហេដ្ឋារចនាសម្ព័ន្ធ បច្ចេកវិទ្យា និងតំបន់ទេសចរណ៍សម្បូរបែបជាច្រើន។ ការធ្វើដំណើរកម្សាន្ដនៅទីក្រុងនេះ បើអ្នកដំណើរទិញកញ្ចប់សេវាកម្មរបស់ទីភ្នាក់ងារទេសចរណ៍ វាមិនជាបញ្ហាចោទទេ តែបើចង់ធ្វើដំណើរជាលក្ខណៈគ្រួសារ ចង់សន្សំសំចៃ និងចង់មានពេលវេលាសម្រាប់គ្រួសារ និងខ្លួនឯង វាអាចនឹងមានការពិបាកបន្ដិចបន្តួចដែលគួរឈ្វេងយល់នូវចំណុចមួយចំនួន និងគោលដៅដែលត្រូវទៅកម្សាន្ដ ។
លោក Josh Williams នាយកប្រចាំប្រទេសនៃក្រុមហ៊ុនអាកាសចរណ៍ Cathay Dragon ជាក្រុមហ៊ុនតែមួយរបស់ក្រុមហ៊ុនអាកាសចរណ៍ Cathay Pacific ដែលមានជើងហោះហើរជាង២០០ប្រទេសនៅជុំវិញពិភពលោក ព្រមទាំងមានជើងហោះហើរត្រង់ចំនួន២ជើងរៀងរាល់ថ្ងៃពីព្រលានយន្ដហោះអន្ដរជាតិភ្នំពញ ទៅហុងកុង និង១ជើងរៀងរាល់ថ្ងៃពីព្រលានយន្ដហោះអន្ដរជាតិខេត្តសៀមរាប បានឲ្យដឹងថា ទីក្រុងហុងកុងពិតជាគោលដៅទេសចរណ៍ដ៏ល្អបំផុតនៅអាស៊ី ប្រសិនបើភ្ញៀវទេសចរចង់ទៅទស្សនាកម្សាន្ដនៅក្រៅប្រទេស ព្រោះថា ទាំងការចំណាយលើសណ្ឋាគារ អាហារ និងការធ្វើដំណើរនានា គឺមានតម្លៃសមរម្យ និងងាយស្រួល បើធៀបនឹងបណ្ដាប្រទេសអភិវឌ្ឍន៍នានានៅអាស៊ី ។
លោក Josh Williams បាននិយាយថា ៖ « តាមរយៈក្រុមហ៊ុនអាកាសចរណ៍ Cathay Dragon សំបុត្រយន្ដហោះទៅមកពីភ្នំពេញ-ហុងកុង មានតម្លៃប្រហែល២៦៥ដុល្លារអាមេរិកប៉ុណ្ណោះសម្រាប់កៅអីធម្មតា (Economy Class) និងប្រហែល៧៦៥ដុល្លារអាមេរិកសម្រាប់កៅអីថ្នាក់ធុរកិច្ច (Business Class) អាស្រ័យទៅតាមរដូវកាល និងការ Booking សំបុត្រយន្ដហោះ។ ជាមួយគ្នានេះ អ្នកដំណើរគ្រាន់តែចំណាយពេលជាង២ម៉ោងនៅលើយន្ដហោះដ៏ទំនើប ប្រកបដោយផាសុកភាព និងទំនុកចិត្តខ្ពស់ នោះលោកអ្នកនឹងទៅដល់ទីក្រុងដ៏ប្រណីតមួយដែលស្ថិតនៅលើដែនកោះសម្បូរទៅដោយអគារពាណិជ្ជកម្មខ្ពស់ៗដែលជាមជ្ឈមណ្ឌលពាណិជ្ជកម្មដ៏សំខាន់នៅលើពិភពលោក»។
ដើម្បីងាយស្រួលក្នុងការធ្វើដំណើរនៅទីក្រុងហុងកុង នៅពេលទៅដល់ព្រលានយន្ដហោះអន្តរជាតិភ្លាម ជម្រើសដំបូងនោះគួរតែស្វែងរកទិញកាត Octopus ហើយបញ្ចូលទឹកប្រាក់ទៅតាមចំនួនដែលយើងចង់បានសម្រាប់ចាយវាយ និងធ្វើដំណើរ ។ Octopus Card នេះ អ្នកដំណើរក៏អាចទិញនៅបណ្ដាស្ថានីយរថភ្លើងផងដែរ ហើយប្រសិនចង់បញ្ចូលលុយបន្ថែម គឺអាចបញ្ចូលនៅតាមបណ្ដាស្ថានីយរថភ្លើង និងហាង 7-ELEVEN ទាំងអស់នៅហុងកុង ។ កាតនេះយើងអាចដូរយកលុយវិញនៅពេលចប់ដំណើរកម្សាន្ដ ។ អត្ថប្រយោជន៍នៃកាតនេះ គឺងាយស្រួលបំផុតសម្រាប់ជិះរថភ្លើង ជិះរថយន្ដក្រុង និងទិញទំនិញតាមផ្សារទំនើបជាដើម។ និយាយរួមមាន Octopus Card ដូចយើងមានគណនេយ្យករដ៏ឆ្លាតវៃតាមខ្លួនអីចឹងដែរ ។
ទីក្រុងហុងកុងមានតំបន់ទេសចរណ៍អស្ចារ្យជាច្រើនកន្លែង តែតំបន់ដែលទាក់ទាញបំផុតនោះមានដូចជា ការជិះកន្ត្រកខ្សែកាប (Cable Car) កាត់សមុទ្រ និងឡើងកំពូលភ្នំមើលទេសភាពនៃទីក្រុងហុងកុង ឆ្ពោះទៅតំបន់ Gnong Ping 360 ស្ថិតនៅកោះ Lantau ដើម្បីទស្សនារមណីដ្ឋានវប្បធម៌ ដែលមានព្រះពុទ្ធបដិមាដ៏ធំជាងគេនៅលើពិភពលោក ធ្វើពីសំរឹទ្ធិស្ថិតនៅលើកំពូលភ្នំ និងជាទីឋានស័ក្ដិសិទ្ធិសម្រាប់ពុទ្ធសាសនិកគោរពបូជា ។ ការជិះរថភ្លើង The Peak Tram ឡើងទៅកំពូលភ្នំដ៏ខ្ពស់ និងគួរឲ្យស្ញប់ស្ញែងបំផុតនៅកោះហុងកុង ដើម្បីទស្សនាទិដ្ឋភាពទីក្រុងហុងកុងទាំងមូលពីអគារ Peak Tower ដែលភ្ញៀវទេសចររាប់ពាន់នាក់ក្នុង១ថ្ងៃៗបានទៅដល់ក្នុងតម្លៃត្រឹមតែ២៤ដុល្លារហុងកុង ឬស្មើនឹងជាង៣ដុល្លារអាមេរិកប៉ុណ្ណោះ ។ ការទៅទស្សនានៅទីនោះ លោកអ្នកមានជម្រើស២ទៀត បើសិនមិនចង់ឈរតម្រង់ជួររង់ចាំយូរ គឺជិះរថយន្ដក្រុងក្នុងតម្លៃ១២ដុល្លារហុងកុង ស្មើនឹងប្រមាណ១,៥ដុល្លារអាមេរិក ឬជិះតាក់ស៊ីក៏បាន តែតម្លៃអាចថ្លៃជាងបន្ដិច ។ សម្រាប់ក្រុមគ្រួសារដែលមានកូនតូចៗគួរទៅទស្សនារមណីដ្ឋាន Ocean Park និង Hong Kong Disneyland ជាដើម ។
ដោយឡែក ប្រសិនបើចង់ជិះរថយន្ដក្រុង ដើម្បីទស្សនាទេសភាព និងភូមិសាស្ត្រទីក្រុងហុងកុងទាំងមូលវិញ រថយន្ដក្រុង Big Bus Hong Kong ជាជម្រើសល្អបំផុត ដែលនាំលោកអ្នកមើលឃើញនូវសំណង់អគារខ្ពស់ស្កឹមស្កៃចម្រុះចនាបថ តំបន់ឆ្នេរសមុទ្រ និងរមណីដ្ឋានទេសចរណ៍ជាច្រើន ។ ក្រៅពីនេះ លោកអ្នកអាចទស្សនា និងស្ដាប់ចង្វាក់ភ្លេងអមដោយការបញ្ចេញពន្លឺភ្លើងចម្រុះពណ៌នៃអគារពាណិជ្ជកម្មនៅរៀងរាល់ម៉ោង៨យប់ តាមរយៈការហៅឈ្មោះអគារទាំងនោះពីត្រើយម្ខាងនៃវិថីតារា (Avenue of Star) ឬ Harbour City ក្នុងតំបន់ Tsim Sha Tsui ដែលជាតំបន់ទាក់ទាញអារម្មណ៍ភ្ញៀវទេសចរអន្តរជាតិក្រៃលែង ក៏ដូចជាការជិះនាវាកម្សាន្ដ ឬក៏ដើរទិញទំនិញតាមបណ្ដោយផ្លូវ Lady Street ស្ថិតនៅក្បែរស្ថានីយរថភ្លើង Mong Kok និងតាមបណ្ដោយផ្លូវ Nathan ក្នុងតំបន់ Tsim Sha Tsui នៅកោះKowloon ជាដើម ៕
ចែករំលែកព័តមាននេះ