សម្ដេចក្រឡាហោម ស ខេង អញ្ជើញចូលរួមពិធីប្រកាសចូលកាន់មុខតំណែងថ្មី អភិបាលខេត្តព្រះវិហារ
ខេត្តព្រះវិហារ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី០៥ ខែសីហា ឆ្នាំ២០២២នេះ…
ខេត្តព្រះវិហារ ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី០៥ ខែសីហា ឆ្នាំ២០២២នេះ បានអញ្ជើញជាអធិបតី ក្នុងពិធីប្រកាសចូលកាន់មុខតំណែងលោក គីម រិទ្ធី ជាអភិបាលខេត្តព្រះវិហារ និងអភិបាលរងខេត្ត ២រូប បន្ថែមទៀត ដោយមានការអញ្ជើញចូលរួមពីថ្នាក់ដឹកនាំជាច្រើនរូបទៀត ។
សម្តេចក្រឡាហោម ស ខេង បានសម្តែងនូវការអបអរសាទរ ចំពោះការប្រកាសចូលកាន់មុខតំណែងថ្មីនេះ លោក គីម រិទ្ធី ជាមន្ត្រីមានសមត្ថភាព និងបទពិសោធន៍គ្រប់គ្រាន់ក្នុងការដឹកនាំ ដោយធ្លាប់ឆ្លងកាត់កាន់មុខតំណែងជាអភិបាលរងខេត្តកណ្ដាល ជិត ៨ឆ្នាំ និងមានបទពិសោធន៍ការងារជាច្រើនផ្សេងទៀត ។
ទន្ទឹមនឹងនោះ សម្តេចក្រឡាហោម ស ខេង បានស្នើដល់ក្រុមប្រឹក្សាខេត្ត គណៈអភិបាលខេត្ត ថ្នាក់ដឹកនាំមន្ទីរអង្គភាពជុំវិញខេត្ត ថ្នាក់ដឹកនាំស្រុកក្រុង និងឃុំសង្កាត់ មន្ត្រីរាជការ កងកម្លាំងប្រដាប់អាវុធ ព្រមទាំងប្រជាពលរដ្ឋទូទាំងខេត្តព្រះវិហារ សូមផ្ដល់ការគាំទ្រដល់លោក គីម រិទ្ធី អភិបាលខេត្តព្រះវិហារថ្មី បញ្ចេញនូវសមត្ថភាព និងបទពិសោធន៍ ក្នុងការដឹកនាំ ដើម្បីបន្តអភិវឌ្ឍបន្ថែមទៀត នូវសមិទ្ធផលនានាបន្ថែមទៀត បន្ទាប់ពីថ្នាក់ដឹកនាំខេត្តមុនសម្រេចបាន ធ្វើយ៉ាងណាឲ្យទឹកដីខេត្តព្រះវិហារ កាន់តែមានការរីកចម្រើនថែមទៀត ។
ជាមួយគ្នានោះដែរ សម្តេចក្រឡាហោម ស ខេង បានផ្តល់ជាមតិយោបល់មួយចំនួន ដល់ថ្នាក់ដឹកនាំខេត្តព្រះវិហារ ត្រូវចូលរួមថែរក្សានូវកត្តាសន្តិសុខ សណ្ដាប់ធ្នាប់សាធារណៈ ឲ្យបានល្អប្រសើរបន្តទៀត ជាពិសេសអនុវត្ដនូវគោលនយោបាយភូមិឃុំមានសុវត្ថិភាព ឲ្យបានល្អប្រសើរ ការបម្រើសេវាសាធារណៈ ជូនប្រជាពលរដ្ឋឲ្យតែកាន់ល្អប្រសើរ ខិតខំដោះស្រាយសំណើ សំណូមពរ និងទុក្ខកង្វល់របស់ប្រជាពលរដ្ឋឲ្យបានឆាប់រហ័ស និងទាន់ពេលវេលា បន្តអនុវត្តវិធានការដើម្បីប្រយុទ្ធជំងឺកូវីដ-១៩ ខិតខំបន្តទំនាក់ទំនងសហប្រតិបត្តិការល្អរវាងអាជ្ញាធរដែនដី ជាមួយនឹងកម្លាំង ដែលឈរជើងនៅតាមព្រំដែន ដើម្បីរួមគ្នាការពារបូរណភាពទឹកដី ឯកភាពជាតិ ក៏ដូចជាការពារការប្រឆាំងនូវបទល្មើសគ្រប់ប្រភេទ ក្នុងដែនសមត្ថកិច្ចគ្រប់គ្រង ប្រកបដោយប្រសិទ្ធភាពខ្ពស់ ៕
ចែករំលែកព័តមាននេះ