ខេត្តកំពង់ស្ពឺ ៖ ករណីគ្រោះថ្នាក់ចរាចរណ៍បង្កឡើងដោយរថយន្តដឹកកុងតឺន័រ ០១គ្រឿង បានបើកក្នុងល្បឿនលឿន ជ្រុលទៅបុកសសរគល់ស្ពានផ្លូវល្បឿនលឿនភ្នំពេញ-ព្រះសីហនុ បណ្តាលឲ្យខូចខ្ទេចក្បាលរថយន្ត ។
ហេតុការណ៍នេះបានកើតឡើងនៅថ្ងៃទី០៥ ខែសីហា ឆ្នាំ២០២២ ស្ថិតលើផ្លូវជាតិលេខ៤ ចន្លោះគីឡូម៉ែត្រលេខ ៩៩-១០០ ត្រង់ចំណុចភូមិទី៦ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ។
ប្រភពពីស្នងការដ្ឋាននគរបាលខេត្តកំពង់ស្ពឺ បានអោយដឹងថា រថយន្តបង្ក ០១គ្រឿងម៉ាក HYUNDAI ពណ៌ស ពាក់ស្លាកលេខ ភ្នំពេញ 3C-9293 សណ្ដោងស៊ឺមីរ៉ឺម៉ក ពាក់ស្លាកលេខ ភ្នំពេញ 4A-0490 អ្នកបើកបរដោយឈ្មោះ សន សាល ភេទប្រុស អាយុ៣២ឆ្នាំ រស់នៅភូមិទូកមាស ឃុំក្រាំងដូង ស្រុកកំពង់ត្រាច ខេត្តកំពត ។
សមត្ថកិច្ច បានឲ្យដឹងទៀតថា មុនកើតហេតុ រថយន្តដឹកកុងតឺន័រ បើកបរក្នុងល្បឿនលឿន ពីទិសខាងលិចទៅទិសខាងកើត លុះមកដល់ចំណុចកើតហេតុ រេចង្កូតជ្រុលទៅបុកគល់ស្ពានផ្លូវល្បឿនលឿន តែម្តង បណ្តាលឲ្យដាច់ធ្លាក់កាប៊ីនរថយន្ត ។
សមត្ថកិច្ច បានបញ្ជាក់ថា ករណីគ្រោះថ្នាក់ចរាចរណ៍នេះ មិនបណ្ដាលអោយគ្រោះថ្នាក់ដល់មនុស្សទេ ប៉ុន្តែរថយន្ត០១គ្រឿង ត្រូវខូចខាតខ្ទេចក្បាលរថយន្ត ដោយសារអ្នកបើកបររថយន្តក្នុងល្បឿនលឿន ។
ក្រោយកើតហេតុ សមត្ថកិច្ចនគរបាលចរាចរណ៍ ចុះទៅពិនិត្យរួចអូសរថយន្ត យកទៅរក្សាទុកនៅអធិការដ្ឋាននគរបាលស្រុកភ្នំស្រួច រង់ចាំដោះស្រាយ នៅពេលក្រោយ ៕
ចែករំលែកព័តមាននេះ