ភ្នំពេញ៖ លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជា បានជួបពិភាក្សា​ការងារ​ទ្វេភាគីជាមួយលោក​ វ៉ាង យី រដ្ឋមន្ត្រីការបរទេសចិន នៅក្រៅកិច្ចប្រជុំរដ្ឋមន្ត្រីការបរទេស​អាស៊ាន។ ប្រមុខការទូតទាំងពីរ បានពិភាក្សាអំពីការវិវត្តនាពេលថ្មីៗនេះ នៅច្រកសមុទ្រតៃវ៉ាន់   ដែលក្នុងឱកាស​នោះ  លោកឧបនាយករដ្ឋមន្ត្រី ប្រាក់ សុខុន បានសម្តែងនូវការព្រួយបារម្ភ និងបានគូសបញ្ជាក់អំពីជំហរឥតងាករេ និងរឹងមាំរបស់រាជរដ្ឋាភិបាលកម្ពុជា ក្នុងការប្រកាន់ខ្ជាប់នូវ «គោលនយោបាយចិនតែមួយ» និងចាត់ទុកបញ្ហានានាពាក់ព័ន្ធទៅនឹងហុងកុង តៃវ៉ាន់ ទីបេ និងស៊ីនជាំង ជាកិច្ចការផ្ទៃក្នុង និងក្រោមសិទ្ធិអធិបតេយ្យភាពរបស់សាធារណរដ្ឋប្រជាមានិតចិន។