ផ្អើលផ្ទះសំណាក់«មនោរម្យរីករាយ»ទាំងព្រឹក
រាជធានីភ្នំពេញ ៖ ផ្ទះសំណាក់«មនោរម្យរីករាយ» ស្ថិតនៅផ្លូវបេតុង ភូមិបុរីកម្មករ សង្កាត់ទឹកថ្លា ត្រូវបាននគរបាលខណ្ឌសែនសុខ ដឹកនាំដោយលោកវរសេនីយ៍ឯក ម៉ក់ ហុង …
រាជធានីភ្នំពេញ ៖ ផ្ទះសំណាក់«មនោរម្យរីករាយ» ស្ថិតនៅផ្លូវបេតុង ភូមិបុរីកម្មករ សង្កាត់ទឹកថ្លា ត្រូវបាននគរបាលខណ្ឌសែនសុខ ដឹកនាំដោយលោកវរសេនីយ៍ឯក ម៉ក់ ហុង អធិការនគរបាលខណ្ឌ កាលពីវេលាព្រឹកថ្ងៃទី៧ ខែមករា ឆ្នាំ ២០១៧ ចុះត្រួតពិនិត្យរដ្ឋបាល ឆែកឆេរ និងឃាត់ខ្លួនជនសង្ស័យ៦នាក់ ដែលប្រមូលផ្តុំគ្នាប្រើប្រាស់គ្រឿងញៀន ។
ជនសង្ស័យដែលត្រូវឃាត់ខ្លួនមាន ១-ឈ្មោះ សុខ សុភ្ត្រ ភេទប្រុស អាយុ២៩ឆ្នាំ អ្នកមើលការខុសត្រូវផ្ទះសំណាក់, ២-ឈ្មោះ ហួន សុខជា ភេទស្រី អាយុ២០ឆ្នាំ អ្នករៀបចំបន្ទប់ផ្ទះសំណាក់, ៣-ឈ្មោះ ឆាយ សារិទ្ធ ភេទប្រុស អាយុ៣២ឆ្នាំ, ៤-ឈ្មោះ រស់ ចាន់សុភា ភេទប្រុស អាយុ៣៣ឆ្នាំ, ៥-ឈ្មោះ សុវណ្ណ ហេង ភេទប្រុស អាយុ១៨ឆ្នាំ និង ៦-ឈ្មោះ យ៉ា យាន ភេទប្រុស អាយុ២៣ឆ្នាំ ។
លោកវរសេនីយ៍ឯក ម៉ក់ ហុង អធិការនគរបាលខណ្ឌសែនសុខ បានឲ្យដឹងថា នៅក្នុងយុទ្ធនាការបង្ក្រាបគ្រឿងញៀននេះ សមត្ថកិច្ចនគរបាលខណ្ឌសែនសុខសហការជាមួយអាជ្ញាធរមូលដ្ឋាន បានធ្វើការស្រាវជ្រាវ និងចុះរដ្ឋបាលជាប្រចាំនៅតំបន់ស្មុគស្មាញ ដោយឃាត់ខ្លួនក្រុមយុវជន ញៀនថ្នាំជាបន្តបន្ទាប់បញ្ជូនទៅកាន់សាលាដំបូងរាជធានីភ្នំពេញ និងបញ្ជូនទៅមណ្ឌលកែប្រែ ដើម្បីបង្សាបគ្រឿងញៀន ។ ដោយឡែកលើកនេះ សមត្ថកិច្ចចម្រុះត្រួតពិនិត្យបន្ទប់ផ្ទះសំណាក់ ឃាត់ជនសង្ស័យប្រើប្រាស់គ្រឿងញៀន៦នាក់ ខណៈពួកគេប្រមូលផ្តុំគ្នាប្រើប្រាស់គ្រឿងញៀន ។
គួរបញ្ជាក់ផងដែរថា ផ្ទះសំណាក់«មនោរម្យរីករាយ»ជាកន្លែងប្រើប្រាស់ និងជួញដូរគ្រឿងញៀន ដែលកន្លងមកត្រូវបានកម្លាំងសមត្ថកិច្ចចុះបង្ក្រាបជាច្រើនលើកមកហើយ ៕
ចែករំលែកព័តមាននេះ