រាជធានីភ្នំពេញ ៖ ក្នុងនាមជាប្រធានអាស៊ានសម្រាប់ឆ្នាំ២០២២សម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានអះអាងថា កម្ពុជាសូមសង្កត់ធ្ងន់ពីគោលជំហររបស់ខ្លួនក្នុងការ «ឯកភាព ដើម្បីកិច្ចសហប្រតិបត្តិការ» មិនមែន «ឯកភាព ដើម្បីប្រឈមមុខដាក់គ្នា» នោះទេ ។
ការអះអាងរបស់សម្ដេចតេជោ នាយករដ្ឋមន្ដ្រីនេះនៅក្នុងពិធីបើកកិច្ចប្រជុំរដ្ឋមន្ដ្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធនាព្រឹកថ្ងៃទី០៣ ខែសីហានេះ នៅសណ្ឋាគារសុខា រាជធានីភ្នំពេញ។
ថ្លែងចំពោះមុខរដ្ឋមន្ត្រីការបរទេសអាស៊ានសម្ដេចតេជោ ហ៊ុន សែន បានគូសបញ្ជាក់ថា «យើងត្រូវព្យាយាមផ្ដោតលើបញ្ហាដែលបង្រួបបង្រួមយើងទាំងអស់គ្នា ជាជាងផ្ដោតលើបញ្ហាដែលនាំឱ្យយើងបែកបាក់គ្នា ។ យើងត្រូវតែផ្តល់អាទិភាពដល់សន្តិភាពខ្ពស់ជាងអ្វីទាំងអស់»។
សម្ដេចតេជោ នាយករដ្ឋមន្ដ្រីបានថ្លែងថា ក្នុងនាមជាប្រធានអាស៊ាននាឆ្នាំនេះ កម្ពុជាបានកំណត់មូលបទ «អាស៊ានរួមគ្នាធ្វើ ៖ ដោះស្រាយបញ្ហាប្រឈមទាំងអស់គ្នាសំដៅឆ្លើយតបទៅនឹងបញ្ហាប្រឈមទាំងអស់គ្នា ដូចដែលសម្ដេចបានលើកឡើងដែលទាមទារឱ្យយើងត្រូវកៀរគរ កិច្ចខិតខំប្រឹងប្រែងរួមគ្នា ព្រមទាំងប្រមូលផ្ដុំស្មារតីនៃ «ការរួបរួមគ្នា» ដើម្បីអាចដោះស្រាយបញ្ហាទាំងនេះ ប្រកបដោយប្រសិទ្ធភាពខ្ពស់បំផុត ។
សម្ដេចតេជោ បានលើកឡើងថា កន្លងទៅអាស៊ានធ្លាប់ជាតំបន់មួយ ដែលត្រូវប្រឈមនឹងបញ្ហាសន្តិសុខ ស្ថិរភាព និងការអភិវឌ្ឍ ។បច្ចុប្បន្ននេះ, អាស៊ានបានក្លាយជាតំបន់មួយដែលរីកចម្រើន ដោយយើងបានរួមដៃគ្នាប្រែក្លាយភាពមន្ទិលសង្ស័យឱ្យទៅជាការជឿទុកចិត្តគ្នា និងផ្លាស់ប្តូរអរិភាព ក៏ដូចការប្រឈមមុខដាក់គ្នាឱ្យទៅជាកិច្ចសហ ប្រតិបត្តិការ និងការអភិវឌ្ឍ ។
សម្ដេចតេជោ បានបន្ដថា ជាមួយនឹងសន្តិភាព និងស្ថិរភាពជាច្រើនទសវត្សរ៍កន្លងមកនេះ, អាស៊ានសម្រេចបាននូវវិបុលភាពលើសពីការរំពឹងទុកជាមួយនឹងកំណើន និងការអភិវឌ្ឍដ៏ខ្ពស់ និងការកែលម្អជាលំដាប់នៃសុខុមាលភាពរបស់ប្រជាជន ។
ជាមួយគ្នានេះដែរ នៅក្នុងដំណើរនៃការរីកចម្រើន និងអភិវឌ្ឍន៍នៃតំបន់អាស៊ាន, បញ្ហាប្រឈមផ្សេងៗបានកើតមានឡើងជាបន្តបន្ទាប់ ដោយរាប់ចាប់ពីបញ្ហាភូមិសាស្ត្រ នយោបាយ រហូតដល់បញ្ហាសង្គម-សេដ្ឋកិច្ច ។
សម្ដេតេជោ នាយករដ្ឋមន្ដ្រីបានបន្ដទៀតថា ជាក់ស្ដែងនៅក្នុងការធ្វើជាប្រធានអាស៊ានប្តូរវេនប្រចាំឆ្នាំ,យើងតែងតែប្រឈមនឹងបញ្ហាមួយចំនួន ដែលទាមទារឱ្យមានការដោះស្រាយ ។ ប៉ុន្តែយើងមិនដែលធ្លាប់បានប្រឈមនឹងគ្រោះថ្នាក់ជាច្រើន ក្នុងពេលតែមួយដែលបានបង្កការគំរា.មកំហែងយ៉ាងធ្ងន់ធ្ងរមកលើតំបន់ និងពិភពលោកទាំងមូលដូចជាពេលនេះឡើយ ។
សម្ដេចតេជោ នាយករដ្ឋមន្ដ្រីបញ្ជាក់បន្ថែមថា៖«ត្រង់ចំណុចនេះ ខ្ញុំកំពុងតែនិយាយអំពីផលប៉ះពាល់យ៉ាងធ្ងន់ធ្ងរនៃជំងឺកូវីដ-១៩ ដែលទាមទារឱ្យមានកិច្ចខិតខំប្រឹងប្រែងដ៏ធំសម្បើម ដើម្បីស្ការ និងងើបចេញពីវិបត្តិដែលមានលក្ខណៈបែបពហុទិដ្ឋភាព ស្របពេលដែលការ ប្រកួតប្រជែងដែលកាន់តែគ្រោះថ្នាក់រវាងមហាអំណាចក៏បាន និងកំពុងដាក់សម្ពាធកាន់តែខ្លាំងឡើងមកលើប្រទេសរបស់យើងតាមរ យៈឥទ្ធិពលនៃការផ្ដាច់ខ្លួនចេញពីគ្នារវាងផ្នែកសេដ្ឋកិច្ច និងបច្ចេកវិទ្យា, ការកើនឡើងនៃចំនួនសម្ព័ន្ធភាពតូចៗ, ការប្រណាំងប្រជែងផ្នែកសព្វាវុធ និងការដាក់ទណ្ឌកម្មសេដ្ឋកិច្ច»។
សម្តេចបន្ថែម ដោយឡែក, វិបត្តិនយោបាយ និងសន្តិសុខបូករួមវិបត្តិសេដ្ឋកិច្ច និងមនុស្សធម៌ ដែលទើបកើតមានឡើងនៅមីយ៉ាន់ម៉ា ដែលជាសមាជិកគ្រួសាររបស់យើងផ្ទាល់ក៏បានបង្កជាបញ្ហាប្រឈមដល់មជ្ឈភាព និងឯកភាពរបស់អាស៊ាន ព្រមទាំងបានបង្ក ឱ្យមានការរង្គោះរង្គើដល់ស្ថិរភាពតំបន់ផងដែរ ។
នៅខាងក្រៅតំបន់អាស៊ានវិញសង្គ្រាម នៅអ៊ុយក្រែនក៏បាន និងកំពុង បង្កឱ្យមានភាពស្មុគស្មាញដល់ទំនាក់ទំនងនៅអឺរ៉ុប ក៏ដូចជា តំបន់របស់យើងផងដែរ ។ សម្ដេចតេជោ បានសង្កត់ធ្ងន់ថា សង្គ្រាមនេះ បានបង្កឱ្យមានការរំខានយ៉ាងធ្ងន់ធ្ងរមកលើសេដ្ឋកិច្ច, បង្កជាបញ្ហាកាន់តែធ្ងន់ធ្ងរដល់សន្តិសុខស្បៀង និងថាមពលហើយអាក្រក់ជាងនេះទៅទៀតនោះ គឺការគំរាមកំហែងឱ្យពិភពលោកមានការបែកខ្ញែកជាថ្មីទៀត ។
បន្ថែមលើនេះ, មហន្តរាយដែលបណ្ដាលមកពីការប្រែប្រួលអាកាសធាតុ និងបញ្ហាប្រឈមផ្នែកសន្តិសុខបែបប្រពៃណី និងមិនប្រពៃណីផ្សេងទៀតក៏នៅតែជាកង្វល់សម្រាប់យើងទាំងអស់គ្នា ។
ក្នុងឱកាសនៃការប្រារព្ធខួប៥៥ឆ្នាំនៃជីវិតរបស់អាស៊ាន, សម្ដេចតេជោ ហ៊ុន សែន មានសេចក្តីសោមនស្សដែលយើងបានកសាងសហគមន៍អាស៊ានប្រកបដោយបរិយាបន្នយ៉ាងពិតប្រាកដ ស្របតាមស្មារតីស្នូលរបស់អាស៊ាន គឺ«ចក្ខុវិស័យមួយ, អត្តសញ្ញាណមួយ និងសហគមន៍តែមួយ» ។
សម្ដេចតេជោបានបន្ថែមថា ជាការពិត, សហគមន៍របស់យើង ឬអាចនិយាយថា គ្រួសាររបស់យើង គឺមិនល្អឥតខ្ចោះនោះទេ ដោយយើងទាំងអស់គ្នា សុទ្ធតែមានភាពខុសគ្នារៀងៗខ្លួន ។ ប៉ុន្តែសម្ដេចតេជោសូមសួរថា តើមានគ្រួសារណាមួយដែលមិនមានភាពខុសគ្នានោះ0x017d7 បើតាមសម្ដេចតេជោ នាយករដ្ឋមន្ដ្រីក្នុងរយៈពេលប្រាំទសវត្សរ៍កន្លះនៃសហវិជ្ជមានអាស៊ានសម្រេចបាននូវសមិទ្ធផលជាក់ស្តែងជាច្រើន ដោយផ្អែកលើគោលការណ៍ព្រមព្រៀងគ្នាជាឯកច្ឆន្ទ និងការមិនជ្រៀតជ្រែកគ្នាដែលបានបង្កើតជាស្នូលនៃមាគ៌ាអាស៊ានរបស់យើង ។
សម្ដេចតេជោបានថ្លែងបញ្ជាក់ទៀតថា បើទោះបីជាមានឧបសគ្គរារាំងយ៉ាងណាក៏ដោយ, យើងសម្រេចបាននូវគោលដៅកំពូលរបស់យើង គឺ «ឯកភាពក្នុងភាពចម្រុះ» នៅក្នុងតំបន់មួយដែលសម្បូរទៅដោយភាពចម្រុះនៃវប្បធម៌, សេដ្ឋកិច្ច និងនយោបាយ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ