រាជធានីភ្នំពេញ ៖ រថយន្តរបស់ក្រុមហ៊ុនពិភពដឹកជញ្ជូន មួយគ្រឿង បានរេចង្កូតបុកក្បាលរបាំងថ្មពុះចែកទ្រូងផ្លូវ បណ្ដាលឲ្យបាក់១កង់ ហើយរថយន្តកាច់ចង្កូតក្រឡាប់ដេកស្តូកអូស ទៅបោកផ្ទប់ក្បាលរបាំងថ្មម្ខាងទៀត ចាក់ក្រណាត់ចោលពេញផ្លូវ ។…
រាជធានីភ្នំពេញ ៖ រថយន្តរបស់ក្រុមហ៊ុនពិភពដឹកជញ្ជូន មួយគ្រឿង បានរេចង្កូតបុកក្បាលរបាំងថ្មពុះចែកទ្រូងផ្លូវ បណ្ដាលឲ្យបាក់១កង់ ហើយរថយន្តកាច់ចង្កូតក្រឡាប់ដេកស្តូកអូស ទៅបោកផ្ទប់ក្បាលរបាំងថ្មម្ខាងទៀត ចាក់ក្រណាត់ចោលពេញផ្លូវ ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៩និង៣០នាទីព្រឹកថ្ងៃទី១៦ ខែតុលា ឆ្នាំ២០២៥ នៅតាមបណ្ដោយមហាវិថីសហព័ន្ធរុស្ស៊ី មុខអតីតអាកាសយានដ្ឋានអន្តរជាតិពោធិ៍ចិនតុង ក្នុងភូមិព្រៃទាទី១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
រថយន្ត ដែលក្រឡាប់នោះ ម៉ាកគា ពណ៌ស ពាក់ស្លាកលេខ ភ្នំពេញ 2J-5835 ជារថយន្តរបស់ក្រុមហ៊ុនពិភពដឹកជញ្ជូន (CT.A60) បើកបរដោយបុរសម្នាក់មិនស្គាល់អត្តសញ្ញាណឡើយ ។
តាមសាក្សី បានឲ្យដឹងថា នៅមុនពេលកើតហេតុគេឃើញរថយន្តខាងលើ បានដឹកក្រណាត់ជាច្រើនកី ធ្វើដំណើរតាមបណ្ដោយមហាវិថីសហព័ន្ធរុស្ស៊ី ក្នុងទិសដៅពីលិចទៅកើត ចូលរាជធានីភ្នំពេញ។ នៅពេលធ្វើដំណើរមកដល់កន្លែងកើតហេតុ ក៏បានរេចង្កូតទៅឆ្វេងដៃ បុកក្បាលរបាំងថ្ម ពេញទំហឹងបណ្ដាលឲ្យបាក់១កង់ខ្ទាតចេញ ហើយរថយន្តក៏បានទាញចង្កូតក្រឡាប់ដេកស្តូក អូសជាច្រើនម៉ែត្រ ទៅផ្ទប់ក្បាលរបងថ្មម្ខាងទៀត ចាក់ក្រណាត់ចោលពេញផ្លូវ។ ទោះបីជាយ៉ាងណា គ្រោះថ្នាក់ចរាចរណ៍នេះ ពុំបណ្ដាឲ្យមនុស្សរងរបួសឡើយ ។
ទាក់ទិនការកើតមានគ្រោះថ្នាក់នេះ តាមអ្នកបើកបរប្រាប់ឲ្យដឹងថា បណ្ដាលមកពីរថយន្តដាច់កាឡេ ហើយទាញចង្កូតជ្រុលបុកក្បាល របាំងថ្មក្រឡាប់តែម្ដង។ បន្ទាប់ពីកើតមានគ្រោះថ្នាក់ នគរបាលមូលដ្ឋាន ក៏បានចុះទៅសម្រួលចរាចរណ៍ រួចទាក់ទងទៅការិយាល័យចរាចរណ៍ផ្លូវគោក ចុះមកវាស់វែង នាំយករថយន្តទៅកាន់ការិយាល័យ ដើម្បីដោះស្រាយសងការខូចខាតទ្រព្យសម្បត្តិសាធារណៈ ៕
ចែករំលែកព័តមាននេះ