រាជធានីភ្នំពេញ ៖ ថ្លែងនៅចំពោះមុខរដ្ឋមន្ត្រីការបរទេសអាស៊ានដែលចូលរួមផ្ទាល់ក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ានបានបញ្ជាក់ថា នឹងខិតខំរកដំណោះស្រាយបញ្ហានៅមីយ៉ាន់ម៉ាដោយមិនឲ្យប៉ះពាល់ដល់ការឯកភាពរបស់អាស៊ានឡើយ ។…
រាជធានីភ្នំពេញ ៖ ថ្លែងនៅចំពោះមុខរដ្ឋមន្ត្រីការបរទេសអាស៊ានដែលចូលរួមផ្ទាល់ក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ានបានបញ្ជាក់ថា នឹងខិតខំរកដំណោះស្រាយបញ្ហានៅមីយ៉ាន់ម៉ាដោយមិនឲ្យប៉ះពាល់ដល់ការឯកភាពរបស់អាស៊ានឡើយ ។
ថ្លែងបើកកិច្ចប្រជុំរដ្ឋមន្ត្រីការបរទេសអាស៊ាន នៅព្រឹកថ្ងៃទី៣ ខែសីហានៅសណ្ឋាគារសុខា សម្តេចតេជោបានបញ្ជាក់ថា ៖« ចំពោះបញ្ហាមីយ៉ាន់ម៉ា យើងបានចំណាយពេលវេលា និងថាមពលយ៉ាងច្រើនដោយបានពុះពារការលំបាក និងជំនះការរិះគន់ជាច្រើន ដើម្បីជួយប្រទេសមួយនេះ និងប្រជាជនមីយ៉ាន់ម៉ារកដំណោះស្រាយនយោបាយ ។ យើងនឹ ងបន្តអនុវត្តការងារនេះ ដោយមិនធ្វើឱ្យប៉ះពាល់ដល់ឯកភាពអាស៊ាន តាមរូបភាពណាមួយឡើយ» ។
នៅចំពោះមុខរដ្ឋមន្ត្រីការបរទេសអាស៊ានសម្តេចតេជោ លើកឡើងថា ៖ខ្ញុំសូមអនុញ្ញាតបន្ថែមថា ទោះបីជាការអនុវត្តកុងសង់ស៊ីស៥ចំណុច ពុំមានភាពជឿនលឿនតាមដែលគ្រប់គ្នាចង់បាន ប៉ុន្តែការខិតខំរបស់យើងកន្លងមកបាន សម្រេចភាពជឿនលឿនខ្លះដែរ ជាពិសេសលើ ការងារផ្តល់ជំនួយមនុស្សធម៌ដល់អ្នកដែលត្រូវការបំផុត ។ ប៉ុន្តែសភា ពការណ៍នៅពេលនេះប្រែប្រួលខ្លាំង ដែលអាចនិយាយបានថា កាន់តែអាក្រក់ជាងមុនមានការព្រមព្រៀងជាឯកច្ឆន្ទ៥ចំណុចទៅទៀត ក្រោយពីការអនុវត្តទោសប្រហារជីវិតទៅលើសកម្មជនបក្សប្រឆាំង៤រូប ។ សម្តេចតេជោ បានលើកឡើងទៀតថា កម្ពុជាក៏ដូចជា រដ្ឋសមាជិកអាស៊ានទាំងអស់ខកចិត្ត និងរន្ធត់យ៉ាងក្រៃលែងចំពោះការ ប្រហារជីវិតសកម្មជនបក្សប្រឆាំងទាំងនេះ បើទោះបីជាខ្ញុំ និងថ្នាក់ដឹកនាំដទៃទៀតបានអំពាវនាវឲ្យមានការពិចារណាឡើងវិញអំពីការកាត់ទោសប្រហារជីវិតនេះ ដើម្បីជាប្រយោជន៍នៃកិច្ចសន្ទនានយោបាយ សន្តិភាព និងការបង្រួបបង្រួមជាតិ ។
សម្តេចគូសបញ្ជាក់ថា ៖«ក្នុងករណីមានអ្នកទោសដទៃទៀតដែលនឹងត្រូវកាត់ទោសប្រហារជីវិត យើងនឹងត្រូវបង្ខំចិត្តគិតគូរឡើងវិញអំពីតួនាទីរបស់យើងចំពោះការព្រមព្រៀងជាឯកច្ឆន្ទ ៥ចំណុចរបស់អាស៊ាន»។
សម្តេចក៏បានឲ្យដឹងថា ចំពោះទំនាក់ទំនងខាងក្រៅ, អាស៊ានបានទទួលសំណេរកាន់តែច្រើនឡើងពីបណ្ដាប្រទេសនានា ដើម្បីបង្កើតភាពជាដៃគូផ្លូវការ ។ នៅរសៀលថ្ងៃនេះ, ប្រទេសចំនួនប្រាំមួយ បន្ថែមទៀត នឹងចុះហត្ថលេខាលើលិខិតូបករណ៍ នៃការចូលជាសមាជិកនៃសន្ធិសញ្ញាមិត្តភាព និងសហប្រតិបត្តិការនៅអាស៊ីអាគ្នេយ៍ (TAC) ។
កាលពីឆ្នាំមុន, អាស៊ានបានទទួលយកចក្រភពអង់គ្លេសជាដៃគូសន្ទនាទី ១១ ហើយយើងក៏បានដំឡើងកម្រិតទំនាក់ទំនងជាមួយ ប្រទេសចិន និងអូស្ត្រាលីឱ្យទៅជាភាពជាដៃគូយុទ្ធសាស្ត្រគ្រប់ជ្រុងជ្រោយ ខណៈដែល ប្រទេសដៃគូសន្ទនាមួយចំនួនទៀត ក៏មានគោលបំណងសម្រេចឱ្យបាននូវកម្រិតទំនាក់ទំនង ដូចគ្នានៅក្នុងឆ្នាំនេះផងដែរ ។
ជាមួយគ្នានោះដែរសម្តេចថា កាលពីខែឧសភា កន្លងទៅ, យើងបានចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ប្រកបដោយភាពជោគជ័យ នៅរដ្ឋធានី វ៉ាស៊ីនតោន ហើយយើងក៏កំពុងទន្ទឹងរង់ចាំចូលរួមកិច្ចប្រជុំកំពូលរំលឹកខួបអនុស្សាវរីយ៍អាស៊ានសហភាពអឺរ៉ុបនៅទីក្រុងប្រ៊ូចសែល នាចុងឆ្នាំនេះផងដែរ ៕
ចែករំលែកព័តមាននេះ