ខេត្ដកំពង់ចាម ៖ ប្រជាពលរដ្ឋរស់នៅត្រើយទន្លេមេគង្គទាំងសងខាង កំពុងតែមានសេចក្តីត្រេកអរដោយសារតែទទួលដំណឹងថា ក្នុងពេលខាងមុខនេះនឹងមានស្ពានបេតុងទី២ ឆ្លងកាត់ទន្លេមេគង្គបន្ទាប់ពីស្ពានគីហ្សុ៊ណា នឹងលេចរូបរាងឡើង ដែលតភ្ជាប់ពីស្រុកស្ទឹងត្រង់ទៅស្រុកក្រូចឆ្មារ ហើយសាឡាង២គ្រឿងក៏នឹងត្រូវប្តូរទៅកាន់កន្លែងផ្សេងផងដែរ ។
ស្ត្រីខ្មែរអ៊ិស្លាមឈ្មោះ រោះ ហ្វីអាស់ រស់នៅភូមិទ្រា ឃុំទ្រា ស្រុកក្រូចឆ្មារ ខេត្តត្បូងឃ្មុំ បានប្រាប់ឲ្យដឹងនៅល្ងាចថ្ងៃទី៤ មករា ថា កាលពីពេលកន្លងមកគាត់បានចំណាយលុយក្នុងការធ្វើដំណើរឆ្លងកាណូតដចេញពីផ្ទះមកកាន់ស្រុកស្ទឹងត្រង់ត្រូវចំណាយលុយច្រើនគួរសម ។ បន្ទាប់មកក៏មានសាឡាងបានមកចម្លងធ្វើឱ្យមានភាពងាយស្រួល និងចំណាយតិចជាងមុន ហើយនៅពេលខាងមុខរាជរដ្ឋាភិបាលកម្ពុជា មានគម្រោងកសាងស្ពានបេតុងឆ្លងកាត់ទន្លេមេគង្គនោះ រឹតតែមានភាពប្រសើរឡើងថែមទៀតដោយមិនបានចំណាយថវិកាក្នុងការឆ្លងទៅវិញទៅមកទៀតនោះឡើយ ។
លោក អុីត ជិ អាយុ៥១ឆ្នាំ ខ្មែរអ៊ិស្លាម រស់នៅភូមិទ្រាទី៥ ប្រាប់ឲ្យដឹងថា ចាប់តាំងពីក្រោយឆ្នាំ១៩៧៩មក គាត់និងក្រុមគ្រួសារ ក្នុងពេលដែលត្រូវធ្វើដំណើរមកកាន់ស្រុកស្ទឹងត្រង់ គឺត្រូវតែឆ្លងទូកដែលមានបំពាក់ម៉ាស៊ីនរបស់ឯកជន និងត្រូវបានចំណាយលុយអស់៤.០០០រៀល ទាំងទៅទាំងមកដោយមានការលំបាកជាច្រើនឆ្នាំមកហើយ ។
ក្រោយមកទើបឃើញមានសាឡាងធំៗចំនួន២គ្រឿង ត្រូវបានគេយកមកចម្លងដោយតម្លៃយកក្នុងមនុស្សម្នាក់តែ៩០០រៀលប៉ុណ្ណោះពេលឆ្លងម្តង ដូច្នេះការចំណាយរបស់គាត់ត្រូវបានថយចុះប្រមាណជាង៥០ភាគរយ ហើយក្នុងពេលខាងមុខនេះ ប្រសិន បើស្ពានបេតុងឆ្លងកាត់ទន្លេមេគង្គនឹងត្រូវបានសាងសង់រួចរាល់ទៀត គាត់និងអ្នកភូមិបានចំណាយលុយ ដើម្បីឆ្លងទៅមកពិតជាមានក្តីសប្បាយរីករាយខ្លាំង ដែលថ្នាក់ដឹកនាំប្រទេសបានគិតគូរពីការលំបាករបស់ពលរដ្ឋ ។
លោក ប៊ូ សំណាង អាយុ៥៤ឆ្នាំ អតីតបុគ្គលិកក្រុមហ៊ុនចំការកៅស៊ូបឹងកេត ស្រុកស្ទឹងត្រង់ បានឲ្យដឹងថា កន្លងមកប្រជាពលរដ្ឋដែលត្រូវធ្វើដំណើរចេញពីត្រើយស្រុកស្ទឹងត្រង់មកកាន់ស្រុកក្រូចឆ្មារត្រូវតែធ្វើដំណើរតាមកាណូតដទទឹងរបស់ឯកជន ហើយប្រសិនបើមានសមាជិកក្រុមគ្រួសារណាដែលមានជំងឺដឹកទៅកាន់មន្ទីរពេទ្យឆ្លងពេលយប់ ត្រូវបានគេទារថ្លៃហើយក៏ពិបាកនឹងឆ្លងទៀត ។ ជាមួយនោះក៏ធ្លាប់មានការយកលើសតម្លៃសៀវភៅបន្ទុកថែមទៀត កើតមានការប្តឹងប្តល់គ្នាផងដែរ ។
ក្រោមការយកចិត្តទុកដាក់របស់អាជ្ញាធរខេត្ត បានយកសាឡាងមកជួយចម្លង ហើយការចំណាយគឺធូរជាងការឆ្លងកាណូតឯកជនច្រើន ហើយក្នុងពេលខាងមុខនេះ បើបានស្ពានឆ្លងកាត់ទន្លេមេគង្គទៀតក៏កាន់តែប្រសើពេកណាស់ពោលគឺការធ្វើដំណើរត្រូវចំណាយពេលវេលាឆាប់រហ័ស ។
លោក លន់ លឹមថៃ អភិបាលខេត្តវិញមានប្រសាសន៍ឲ្យដឹងនៅព្រឹកថ្ងៃទី៥ មករាថា ស្ពានបេតុងឆ្លងកាត់ទន្លេមេគង្គតភ្ជាប់ពីស្រុកស្ទឹងត្រង់ទៅស្រុកក្រូចឆ្មារ ត្រូវបានសម្តេចតេជោ ហ៊ុន សែន ឱ្យសាងសង់ឡើងក្នុងពេលខាងមុខនេះ ដែលធ្វើឲ្យប្រជាពលរដ្ឋមានភាពសប្បាយរីករាយ ។ ទាំងនេះត្រូវបានជួយកាត់បន្ថយភាពក្រីក្រជូនដល់ប្រជាពលរដ្ឋទាំង២ខេត្តកំពង់ចាមនិងត្បូងឃ្មុំបានច្រើន ហើយការធ្វើដំណើរក៏រហ័សថែមទៀតផង ៕
ចែករំលែកព័តមាននេះ