ADផ្ទាំងផ្សព្វផ្សាយពាណិជ្ជកម្ម

Picture

កិច្ចប្រជុំរដ្ឋមន្ត្រីការបរទេសអាស៊ាន នៅថ្ងៃទី២ ខែសីហានេះ មិនត្រឹមតែអវត្តមានរដ្ឋមន្ត្រីការ​បរទេស​មីយ៉ាន់ម៉ា និងហ្វីលីពីនទេ តែថៃ ឡាវ និងម៉ាឡេស៊ី ក៏មិនឃើញដែរ​

1 អាទិត្យ មុន
  • ភ្នំពេញ

ភ្នំពេញ៖ នៅរសៀលថ្ងៃទី២ ខែសីហា ឆ្នាំ២០២២ នេះ រដ្ឋមន្ត្រីការបរទេសអាស៊ាន បានជួបប្រជុំ ២កម្មវិធី​។ ១-រដ្ឋមន្ត្រីការបរទេស​អាស៊ាន បានចូលរួម​ក្នុង​កិច្ចប្រជុំគណៈកម្មការតំបន់គ្មានអាវុធ​នុយក្លេអ៊ែរ…

ភ្នំពេញ៖ នៅរសៀលថ្ងៃទី២ ខែសីហា ឆ្នាំ២០២២ នេះ រដ្ឋមន្ត្រីការបរទេសអាស៊ាន បានជួបប្រជុំ ២កម្មវិធី​។ ១-រដ្ឋមន្ត្រីការបរទេស​អាស៊ាន បានចូលរួម​ក្នុង​កិច្ចប្រជុំគណៈកម្មការតំបន់គ្មានអាវុធ​នុយក្លេអ៊ែរ នៅអាស៊ីអាគ្នេយ៍ (SEANWFZ) និងទី២-កិច្ចប្រជុំរវាង​រដ្ឋមន្ត្រីការបរទេសអាស៊ាន ​ជាមួយគណៈកម្មការអន្តររដ្ឋាភិបាលអាស៊ាន ទទួលបន្ទុកសិទ្ធិមនុស្ស (AICHR)។ កិច្ចប្រជុំនេះ ធ្វើឡើង នៅសណ្ឋាគារ សុខា ភ្នំពេញ ក្នុងនាមកម្ពុជា ជាម្ចាស់ផ្ទះ​។

ប៉ុន្តែកិច្ចប្រជុំរដ្ឋមន្ត្រីការបរទេសអាស៊ាន នៅថ្ងៃទី២សីហានេះ មិនត្រឹមតែ​អវត្តមាន រដ្ឋមន្ត្រី​ការបរទេសអាស៊ាន ២រូប គឺមីយ៉ាន់ម៉ា និង​ហ្វីលីពីននោះទេ គឺមានរដ្ឋមន្ត្រីការបរទេស​ថៃ ឡាវ និងរដ្ឋមន្ត្រីការបរទេសម៉ាឡេស៊ី ក៏​មិនបានមកចូលរួម​កិច្ចប្រជុំនេះដែរ​។

នៅក្នុងសន្និសីទកាសែត នាល្ងាចថ្ងៃទី២សីហា បន្ទាប់ពីកិច្ចប្រជុំរដ្ឋមន្ត្រីការបរទេសអាស៊ាន​ទាំងពីរនេះ លោក គង់ ភោគ រដ្ឋលេខាធិការក្រសួងការបរទេស និងជាអ្នកនាំពាក្យ​នៃកិច្ចប្រជុំ បានប្រាប់ក្រុម​អ្នកកាសែតថា រដ្ឋមន្ត្រីការបរទេសហ្វីលីពីន អវត្តមាន ដោយសារតែបញ្ហាសុខភាព តែកៅអីរបស់​គាត់ អង្គុយ​ដោយ​ឧត្តមមន្ត្រីហ្វីលីពីន។ រីឯមីយ៉ាន់ម៉ា យើងអញ្ជើញ​តែតំណាង​មិន​មែន​នយោបាយ ដោយសារតែ​មីយ៉ាន់ម៉ា មិនអនុវត្តតាម​កិច្ចព្រមព្រៀង ៥ចំណុចរបស់អាស៊ាន។ តែមីយ៉ាន់ម៉ា សម្រេច​មិនមក។ រីឯរដ្ឋមន្ត្រី​ការបរទេស​ប្រទេសខ្លះទៀត មកយឺត ដោយសារតែជាប់​រវល់​ តែមិនពាក់ព័ន្ធ​នឹង​ពហិការអ្វីទេ ដូចជា ថៃ ទើបមកដល់ ឡាវ នឹងមកដល់ និងរដ្ឋមន្ត្រីការ​បរទេសម៉ាឡេស៊ី ក៏នឹងមកដល់​ ថ្ងៃនេះ​។

លោករដ្ឋលេខាធិការ បន្ថែមថា ដូច្នេះកៅអី រដ្ឋមន្ត្រីការបរទេសអាស៊ាន នៅទំនេរតែមួយទេ ក្នុងកិច្ចប្រជុំនេះ គឺមីយ៉ាន់ម៉ា​។ ចំណែក​បណ្តាប្រទេសផ្សេងទៀត សុទ្ធតែ​មានតំណាងរបស់​គាត់​អង្គុយទាំងអស់។ ពោលគឺ​ ៩ប្រទេស មានរដ្ឋមន្ត្រីការបរទេស និង​តំណាងចូលរួមទាំងអស់ លើក​លែង​​តែមីយ៉ាន់ម៉ា​មួយទេ​។

​នៅយប់ថ្ងៃទី២សីហានេះ ក្រសួងការបរទេស បានប្រកាសពីការអញ្ជើញមកដល់​នូវ​រដ្ឋមន្ត្រីការបរទេសអាស៊ាន ២រូបទៀត គឺ​លោក ដន ប្រាម៉ាត់វីណៃ ឧបនាយករដ្ឋមន្រ្តី រដ្ឋមន្រ្តីការបរទេស​ថៃ ​​និងលោក សាលើមសៃ គុំម៉ាស៊ីត ឧបនាយករដ្ឋមន្ត្រី រដ្ឋមន្រ្តីការបរទេស​ឡាវ។

ចំណែក​រដ្ឋមន្ត្រីការបរទេស​ម៉ាឡេស៊ី រហូតដល់ម៉ោង ៩យប់ ថ្ងៃទី២សីហានេះ ក្រសួងការបរទេស​កម្ពុជា មិនបានប្រកាសថា លោក​​មកដល់​ភ្នំពេញនោះ​ទេ​។ ​

សូមរម្លឹកថា មកដល់ថ្ងៃទី២​សីហានេះ រដ្ឋមន្ត្រីការបរទេស​ប្រទេសសមាជិកអាស៊ាន និងប្រទេសដៃគូជាច្រើន​ បានធ្វើដំណើរ​ជាបន្តបន្ទាប់ មកដល់រាជធានីភ្នំពេញ​ហើយ​។

លោក​ ជុំ សុន្ទរី អ្នកនាំពាក្យក្រសួងការបរទេស បាន​ប្រាប់កាសែត​ថា រដ្ឋមន្ត្រីការបរទេស និងអ្នកតំណាង មកពី ៣៧ប្រទេស នឹងចូលរួម​កិច្ចប្រជុំរដ្ឋមន្ត្រីការបរទេស និងកិច្ចប្រជុំពាក់ព័ន្ធ​ នៅរាជធានីភ្នំពេញ នាពេលនេះ។ ក្នុង​នោះ មាន​រដ្ឋមន្ត្រី​ប្រទេស​មហា​អំណាច អញ្ជើញ​មកចូល​រួម​ដោយផ្ទាល់ រួមមាន អាមេរិក ចិន ជប៉ុន និង​​រុស្ស៊ី ជាដើម។

តាមកម្មវិធី ដែលបានគ្រោងទុក កិច្ចប្រជុំរដ្ឋមន្រ្តីការបរទេសអាស៊ាន លើកទី៥៥ នឹង​ប្រារព្ធពិធីបើកកិច្ចប្រជុំ​ជាផ្លូវការ នៅព្រឹក​ថ្ងៃទី៣ ខែសីហា ក្រោមអធិបតីភាពដ៏ខ្ពង់ខ្ពស់​របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ាន ក្នុងឆ្នាំ២០២២នេះ។

ចំណែក​កិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ នឹងធ្វើឡើងនៅថ្ងៃទី៤ និងថ្ងៃទី៥ ខែសីហា ឆ្នាំ២០២២​។ ក្នុងនោះ នៅថ្ងៃទី៤ ខែសីហា មានកិច្ចប្រជុំរដ្ឋមន្ត្រីការបរទេស និងកិច្ចប្រជុំពាក់ព័ន្ធ​ រួមមាន៖ កិច្ចប្រជុំរដ្ឋមន្ត្រីការបរទេសអាស៊ាន-ចិន កិច្ចប្រជុំរដ្ឋមន្ត្រីការបរទេសអាស៊ាន-កូរ៉េ កិច្ចប្រជុំរដ្ឋមន្ត្រីការបរទេសអាស៊ាន-ជប៉ុន កិច្ចប្រជុំរដ្ឋមន្ត្រីការបរទេសអាស៊ាន-អង់គ្លេស កិច្ចប្រជុំរដ្ឋមន្ត្រីការបរទេសអាស៊ាន-បូក៣ កិច្ចប្រជុំរដ្ឋមន្ត្រីការបរទេសអាស៊ាន-ឥណ្ឌា កិច្ចប្រជុំរដ្ឋមន្ត្រីការបរទេសអាស៊ាន-កាណាដា កិច្ចប្រជុំរដ្ឋមន្ត្រីការបរទេសអាស៊ាន-អូស្ត្រាលី កិច្ចប្រជុំរដ្ឋមន្ត្រីការបរទេសអាស៊ាន-ញូវហ្សេឡេន កិច្ចប្រជុំរដ្ឋមន្ត្រីការបរទេសអាស៊ាន-អឺរ៉ុប កិច្ចប្រជុំរដ្ឋមន្ត្រីការបរទេសអាស៊ាន-អាមេរិក កិច្ចប្រជុំរដ្ឋមន្ត្រីការបរទេសអាស៊ាន-រុស្ស៊ី។

ចំណែក​នៅថ្ងទី៥ ខែសីហា ឆ្នាំ២០២២ មានកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ រួមមាន៖ កិច្ចប្រជុំរដ្ឋមន្ត្រីការបរទេសអាស៊ីបូព៌ា និងវេទិកា តំបន់អាស៊ាន លើកទី២៩​។

នៅចុងបញ្ចប់​នៃកិច្ចប្រជុំរដ្ឋមន្ត្រីការបរទេសអាស៊ាន និងកិច្ចប្រជុំពាក់ព័ន្ធ នាល្ងាចថ្ងៃទី៥ ខែសីហា ឆ្នាំ២០២២ លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជា នឹងធ្វើសន្និសីទកាសែត៕ ( រូបភាពពីក្រសួងការបរទេស)

Picture
Picture
Picture
Picture
Picture
Picture
Picture