WIKILEAKS បានសន្យាកាលពីថ្ងៃទី៣មករាថា នឹងផ្តល់រង្វាន់សម្រាប់រាល់ព័ត៌មានទម្លាយចេញពីសេតវិមានមុនការចាកចេញរបស់ប្រធានាធិបតីអាមេរិកលោកបារ៉ាក់ អូបាម៉ា ចំណែកស្ថាបនិករបស់ខ្លួនលោក JULIAN ASSANGE អះអាងជាថ្មីថា រុស្ស៊ីពុំមែនជាប្រភពនៃរឿងអាស្រូវអុីមែលរបស់លោកស្រីហ៊ីលឡារីគ្លីនតុនឡើយ ។
តាមTWITTER អង្គការមានឯកទេសខាងទម្លាយបណ្តាឯកសារសម្ងាត់នេះប្រកាសថា «សេចក្តីប្រកាសចំពោះបណ្តាអ្នកគ្រប់គ្រងខាងព័ត៌មានវិទ្យា ចូរលោកអ្នកកុំបណ្តោយឱ្យសេតវិមានបំផ្លាញប្រវត្តិសាស្ត្រសហរដ្ឋអាមេរិកជាថ្មី ! ចូរលោកអ្នកចម្លងបណ្តាឯកសារនាពេលនេះហើយបញ្ជូនមកឱ្យ WIKILEAKS ពេលលោកអ្នកចង់ធ្វើ ! »។
WIKILEAKS បន្តថា «យើងនឹងផ្តល់រង្វាន់២០.០០០ដុល្លារ សម្រាប់រាល់ព័ត៌មានដែលអាចនាំទៅដល់ការចាប់ខ្លួនឬលាតត្រដាងរាល់ភ្នាក់ងាររបស់រដ្ឋបាលលោកអូបាម៉ា ដែលបំផ្លាញចោលបណ្តាសំណុំរឿងសំខាន់ៗ» ។
បន្ទាប់មកលោក JULIAN ASSANGE បានធ្វើបទសម្ភាសន៍យ៉ាងវែងមួយជាមួយទូរទស្សន៍អាមេរិក FOX នៅឯស្ថានទូតអេក្វាទ័រ ប្រចាំក្រុងឡុងដ៍ដែលជាកន្លែងភៀសខ្លួនរបស់លោកចាប់តាំងពីខែមិថុនា ឆ្នាំ២០១២មក ។ ក្នុងបទសម្ភាសន៍នោះលោក ASSANGE អះអាងថា ប្រភពដែលលោកបានទទួលពីបណ្តាសារអុីមែលរបស់លោកស្រីហុីលឡារី គ្លីនតុន ពុំមែនចេញមកពីរដ្ឋាភិបាលរុស្ស៊ីឡើយ ៕
ចែករំលែកព័តមាននេះ