ADផ្ទាំងផ្សព្វផ្សាយពាណិជ្ជកម្ម

Picture

ហែម​ថុ​ន វិ​ទី​នី រៀបរាប់​ពី​ការ​បង្ហាត់​ក្រុម​កីឡា​ហែលទឹក​ជន​ពិការ​ចូលរួម​ប្រកួត​អាស៊ាន​ប៉ា​រ៉ា​ហ្គេ​ម

1 ខែ មុន
  • ភ្នំពេញ

រាជធានី​ភ្នំពេញ ៖ អតីត​កីឡាការិនី​ហែល​ទឹក​ជម្រើសជាតិ​កម្ពុជា ហែម​ថុ​ន វិ​ទី​នី បាន​ដឹកនាំ​ក្រុម​

រាជធានី​ភ្នំពេញ ៖ អតីត​កីឡាការិនី​ហែល​ទឹក​ជម្រើសជាតិ​កម្ពុជា ហែម​ថុ​ន វិ​ទី​នី បាន​ដឹកនាំ​ក្រុម​កីឡាករ កីឡាការិនី​មាន​ពិការ​ភាព​កម្ពុជា​ចូលរួម​ប្រកួត​អាស៊ាន​ប៉ា​រ៉ា​ហ្គេ​ម លើក​ទី​១១ ឆ្នាំ​២០២២ នៅ​ទីក្រុង​សូ​ឡូ ប្រទេស​ឥណ្ឌូ​ណេ​ស៊ី ចាប់ពី​ថ្ងៃ​ទី​៣០ ខែកក្កដា ដល់​ថ្ងៃ​ទី​៦ ខែសីហា​។

នេះ​ជា​ការងារ​ថ្មី​មួយទៀត​សម្រាប់ ហែម​ថុ​ន វិ​ទី​នី ដែល​ទទួល​បាន​ឱកាស​បង្ហាត់​ក្រុម​អត្ត​ព​លិ​ក​មាន​ពិការ​ភាព​កម្ពុជា​ដើម្បី​ប្រកួត​ក្នុង​ព្រឹត្តិការណ៍​អន្តរជាតិ បន្ទាប់​ពី​ធ្លាប់តែ​បង្ហាត់បង្រៀន​កីឡា
ករ កីឡាការិនី​ហែល​ទឹក​ធម្មតា ។

វិ​ទី​នី បាន​ប្រាប់​ថា ៖«​មានការ​ពិបាក​ក្នុង​ការ​បង្ហាត់​ដែរ​ដោយសារ​ពួក​គេ​មាន​ពិការ​ភាព​ខុស​ៗ
គ្នា ។ អ្នកខ្លះ​កម្រិត​ធ្ងន់ អ្នកខ្លះ​កម្រិត​ស្រាល​» ។

ទោះបី​យ៉ាងណា មុន​ពេល​ទទួល​ការងារ​បង្ហាត់​អត្ត​ព​លិ​ក​ជន​មាន​ពិការ​ភាព អតីត​កីឡាការិនី​ជម្រើសជាតិ​រូប​នេះ​ធ្លាប់​បាន​ហ្វឹកហាត់ និង​រៀនសូត្រ​ច្រើន​ពី​ជំនាញ​បង្ហាត់​ហែល​ទឹក​ដល់​អត្ត​ព​លិ​ក​ជន​មាន​ពិការ​ភាព ។

ហែម​ថុ​ន វិ​ទី​នី បាន​ឲ្យ​ដឹង​ថា ៖«​ពី​មុន​ខ្ញុំ​ធ្លាប់​ហ្វឹកហាត់​ជាមួយ​គ្រូបង្វឹក​អន្តរជាតិ​មួយ​រូប​ដែល​គាត់​ជា​គ្រូបង្ហាត់​ជន​ពិការ ហើយ​ទទួល​បាន​លទ្ធផល​ល្អ​ទូ​ទាំង​ពិភពលោក ។ កាលពី​ពេល​ថ្មី​ៗ​នេះ ខាង​សហព័ន្ធ​កីឡាហែលទឹក​អន្តរជាតិ​ទើបតែ​បញ្ជូន​គាត់​មក​ប្រទេស​ខ្មែរ ហើយ​គាត់​ក៏​បាន​មក​ជួប​ក្រុមកីឡា​ជន​ពិការ​កម្ពុជា​យើង​ដែរ ។ ជា​ពិសេស​គាត់​បាន​ជួយ​បង្ហាត់បង្រៀន​ខ្ញុំ​បន្ថែម ដូច្នេះ​ខ្ញុំ​យល់​ដឹង​ច្រើន​ពី​របៀប​បង្ហាត់​ជន​ពិការ ។

វា​ថ្មី​សម្រាប់​ខ្ញុំ ប៉ុន្តែ​វា​បាន​ផ្តល់​ឲ្យ​ខ្ញុំ​តាម​អ្វី​ដែល​ជា​ក្តី​ស្រឡាញ់​របស់ខ្ញុំ​តាំងពី​ដើម បន្ទាប់​ពី​ខ្ញុំ​ធ្លាប់​ជា​កីឡាការិនី​ហែល​ទឹក ។ ជា​រឿង​ល្អ​បន្ថែម​ទៀត​សម្រាប់​ខ្ញុំ​ដែល​ផ្តល់​ឲ្យ​ខ្ញុំ​កាន់តែ​យល់ និង​ដឹង​ច្រើន​ពី​ការ​បង្ហាត់​ហែល​ទឹក​ទាំង​កម្រិត​ធម្មតា និង​ជន​ពិការ​» ។

ហែម​ថុ​ន វិ​ទី​នី ទើបតែ​បាន​បង្ហាត់​ហែល​ទឹក​ដល់​អត្ត​ព​លិ​ក​ជន​ពិការ​ក​កម្ពុជា​ប៉ុន្មាន​ខែ​ចុង​ក្រោយ និង​បង្ហាត់​ដិត​ដល់​ក្រោយ​ពេល​វិបត្តិ​កូ​វី​ដ​-១៩​ស្ងប់ស្ងាត់ ។ គ្រូបង្វឹក​រូប​នេះ​បាន​យល់​ឃើញ​ថា ៖«​បន្ទាប់​ពី​បង្ហាត់​បាន​មួយ​រយៈពេល ខ្ញុំ​កត់សម្គាល់​ឃើញ​ថា ពួក​គាត់​រីក​ចម្រើន​ច្រើន ។

មែនទែន​ទៅ ពួក​គាត់​ខ្វះខាត​ច្រើន​ណាស់ ដោយសារ​ពួក​គាត់​អត់​បាន​ហ្វឹកហាត់​ដិត​ដល់ ។ ឥឡូវនេះ បច្ចេកទេស​ហែល​របស់​ពួក​គាត់​ល្អ​ប្រសើរ​ច្រើន​» ។

វិ​ទី​នី បាន​សង្កត់ធ្ងន់​ថា ៖«​ខ្ញុំ​បាន​សិក្សា​ឃើញ​ថា ពួក​គាត់​ខ្លះ​មាន​កំណត់​ត្រា​ហែល​មិន​ដាច់​គ្នា​ឆ្ងាយ​ប៉ុន្មាន​ជាមួយ​កំណត់​ត្រា​របស់​អ្នក​ដែល​ឈ្នះ​មេដាយ​កាល​អាស៊ាន​ប៉ា​រ៉ា​ហ្គេ​ម​ឆ្នាំ​២០១៧ ។ ខ្ញុំ​រំពឹង​ថា ក្រុម​កីឡាករ​យើង​នឹង​ធ្វើ​បាន​ល្អ ទោះជា​ទើប​ហ្វឹកហាត់​វិញ​ក្រោយ​វិបត្តិ​កូ​វី​ដ​-១៩ ។ ការ​ហ្វឹកហាត់​តិច​ក្តី តែ​ពួក​គាត់​រីក​ចម្រើន​បច្ចេកទេស​ច្រើន ហើយ​ក៏​ត្រៀមខ្លួន​រួចរាល់​ហើយ​សម្រាប់​ការ​ប្រកួត​» ។

សម្រាប់​ការ​ធ្វើ​ដំណើរ​ទៅ​ប្រកួត​អាស៊ាន​ប៉ា​រ៉ា​ហ្គេ​ម លើក​ទី​១១ នៅ​ប្រទេស​ឥណ្ឌូ​ណេ​ស៊ី​នេះ សហព័ន្ធ​កីឡាហែលទឹក​ជន​ពិការ​កម្ពុជា​បាន​បញ្ជូន​កីឡាករ​៩​រូប និង​កីឡាការិនី​២​រូប ហើយ​ម្នាក់​ៗ
ត្រូវ​ប្រកួត​ជា​ច្រើន​វិញ្ញាសា ។ នេះ​ជា​លើក​ទី​២​ដែល​ក្រុម​ហែល​ទឹក​ជន​ពិការ​កម្ពុជា​ចូលរួម​ប្រកួត​អាស៊ាន​ប៉ា​រ៉ា​ហ្គេ​ម បន្ទាប់​ពី​លើក​ទី​១​កាលពី​ឆ្នាំ​២០១៧ នៅ​ប្រទេស​ម៉ា​ឡេ​ស៊ី ៕

Picture
Picture