ខេត្តមណ្ឌលគិរី ៖ បើតាមសេចក្តីរាយការណ៍បានឱ្យដឹងថា បុរសម្នាក់ត្រូវបានជនប្រមឹកវា.យប្រហា.រ ដោយប្រើដាវ បណ្តាលឱ្យរងរបួសធ្ងន់ ខណៈពេលកំពុងអង្គុយផឹកស៊ីក្នុងកម្មវិធីសែនក្របី ដោយផឹកស្រាជួបជុំជាមួយអ្នកភូមិជាច្រើននាក់ បង្កឲ្យមានការភ្ញាក់ផ្អើលកាលពីវេលាម៉ោង១៤និង១៥នាទីរសៀលថ្ងៃទី២៧ ខែកក្កដា ឆ្នាំ២០២២ ត្រង់ចំណុចផ្ទះឈ្មោះ វឺប ចន ស្ថិតនៅក្នុងភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។
បើតាមសមត្ថកិច្ចបានឲ្យដឹងថា មានករណីហិ.ង្សាដោយចេតនាខាងលើ បង្កឡើងដោយជនសង្ស័យឈ្មោះ ព្រីង រស្មី ភេទប្រុស អាយុ៣៧ឆ្នាំ ជាជនជាតិខ្មែរ មុខរបរកសិករ ទីលំនៅបច្ចុប្បន្ននៅភូមិពូតាង ឃុំពូជ្រៃ ស្រុកពេជ្រាដា ខេត្តមណ្ឌលគិរី។ ចំណែកជនរងគ្រោះមានឈ្មោះ សែម ម្លាវ ភេទប្រុស អាយុ៥៦ឆ្នាំ ជាជនជាតិព្នង មុខរបរកសិករ មានស្រុកកំណើតនៅភូមិពូត្រុំ សង្កាត់មនោរម្យ ក្រុងសែនមនោរម្យ ខេត្តមណ្ឌលគិរី សព្វថ្ងៃស្នាក់នៅភូមិ-ឃុំកើតហេតុខាងលើ។
លោក តាត់ យ៉េន អធិការនគរបាលស្រុកពេជ្រាដា បានឲ្យដឹងថា មូលហេតុករណីខាងលើនេះ ដោយសារនៅផ្ទះឈ្មោះ វឺប ចន បានរៀបចំកម្មវិធីកា.ប់ក្របីសែនព្រេនតាមប្រពៃណីជនជាតិដើមភាគតិច ហើយក៏មានប្រជាពលរដ្ឋ ញាតិក្នុងភូមិ បានចូលរួមផឹកស៊ីជាច្រើននាក់។
លោកអធិការបន្តថា នៅក្នុងពិធីនោះ ជនបង្ក និងជនរងគ្រោះក៏បានចូលរួមផឹកស៊ីដែរ ហើយរហូតដល់ម៉ោងកើតហេតុ ជនបង្កដែលមានសភាពស្រវឹងជោកជាំក៏បានប៉ះពាក្យសំដីជាមួយអ្នកផឹកស៊ីក្នុងវង់ជាមួយគ្នា ។ ភ្លាមៗនោះ ជនបង្កទ្រាំនឹងកំហឹងមិនបាន ក៏រត់ទៅបាត់មួយស្របក់ ស្រាប់តែត្រឡប់មកវិញដោយមានកាន់ដាវមួយដើមជាប់ដៃ ដែលគេដឹងថា បានយកពីផ្ទះរបស់ខ្លួន រួចទៅដេញកា.ប់មនុស្សក្នុងកម្មវិធីនោះតែម្តង ប៉ុន្តែអ្នកផ្សេងទៀតបានរត់គេចផុតជាច្រើននាក់ ។ ចំណែកជនរងគ្រោះវិញ កំពុងអង្គុយផឹកភ្លេចខ្លួន ក៏ត្រូវជនបង្កយកដាវកា.ប់ទៅលើជនរងគ្រោះចំគល់.កខាងក្រោយ បណ្ដាលឲ្យរងរបួសធ្ងន់ ។
ក្រោយពេលកើតហេតុ កម្លាំងអធិការដ្ឋាននគរបាលស្រុកពេជ្រាដា សហការជាមួយកម្លាំងវរៈ៣០៣ និងកម្លាំងប៉ុស្តិ៍ពូជ្រៃ បានចុះអន្តរាគមន៍ចាប់ខ្លួនជនសង្ស័យយកមកអធិការដ្ឋាន ដើម្បីអនុវត្តតាមនីតិវិធី។ ចំណែកជនរងគ្រោះវិញ ត្រូវបានសាច់ញាតិបញ្ជូនទៅសង្គ្រោះនៅឯរាជធានីភ្នំពេញ៕
ចែករំលែកព័តមាននេះ