លោកហ៊ុន ម៉ានី បង្ហាញភាពជឿជាក់ ចំពោះប្រតិភូកីឡាប៉ារ៉ាឡាំពិកកម្ពុជា មុនចេញទៅប្រកួតអាស៊ានប៉ារ៉ាហ្គេម នៅឥណ្ឌូណេស៊ី
- ភ្នំពេញ
រាជធានីភ្នំពេញ ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធាន
រាជធានីភ្នំពេញ ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានប្រតិភូកីឡាប៉ារ៉ាឡាំពិកកម្ពុជា តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កាលពីថ្ងៃទី២៦ ខែកក្កដា បានអញ្ជើញជូនដំណើរប្រតិភូ គ្រូបង្វឹក និងកីឡាករ-កីឡាការិនីជនពិការកម្ពុជា សរុបចំនួន ១៧៩នាក់ ដែលត្រូវធ្វើដំណើរទៅទីក្រុងសូឡូ ប្រទេសឥណ្ឌូណេស៊ី តាមយន្ដហោះពិសេសដោយឥតគិតថ្លៃ ដើម្បីចូលរួមការប្រកួតកីឡាអាស៊ានប៉ារ៉ាហ្គេម លើកទី១១ ឆ្នាំ២០២២។
ក្នុងឱកាសនោះ ឯកឧត្តម ហ៊ុន ម៉ានី បានបង្ហាញនូវសេចក្ដីសោមនស្សរីករាយ និងភាពកក់ក្ដៅ ចំពោះប្រតិភូកីឡាប៉ារ៉ាឡាំពិកកម្ពុជា ដែលពោរពេញដោយភាពសប្បាយរីករាយ ប្រកបដោយមោទនភាព ភាតរភាព និងភាពជឿជាក់របស់កីឡាករ-កីឡាការិនីកម្ពុជា ក្នុងការធ្វើដំណើរបំពេញបេសកកម្មខាងលើនេះ។
លោកប្រធានប្រតិភូដដែល បានចាត់ទុកការចាត់តាំងឲ្យដឹកនាំ និងអមដំណើរជាមួយកីឡាករ-កីឡាការិនីប៉ារ៉ាឡាំពិកកម្ពុជា គឺជាមោទនភាពមួយ។ ប៉ុន្ដែឯកឧត្តមមានការសោកស្ដាយ ដោយមិនអាចរួមដំណើរជាមួយប្រតិភូកីឡាប៉ារ៉ាឡាំពិកកម្ពុជានៅថ្ងៃនេះបាន ដោយសារឯកឧត្តមជាប់បំពេញភារកិច្ចមួយចំនួន ពិសេសការធ្វើវិសោធនកម្មច្បាប់រដ្ឋធម្មនុញ្ញ នាថ្ងៃទី២៨ ខែកក្កដា ហើយល្ងាចថ្ងៃដដែលនោះ ទើបឯកឧត្តមអាចធ្វើដំណើរទៅទីក្រុងសូឡូតាមក្រោយ។
ឯកឧត្តម ហ៊ុន ម៉ានី បានថ្លែងអំណរគុណសម្ដេចតេជោនាយករដ្ឋមន្ដ្រី ដែលបានយកចិត្តទុកដាក់់ខ្ពស់ចំពោះប្រតិភូកីឡាប៉ារ៉ាឡាំពិកកម្ពុជា ។ ជាក់ស្ដែង ក្រៅពីផ្ដល់នូវប្រាក់ហោប៉ាវ សម្ដេចបានសម្រួលឲ្យមានយន្ដហោះពិសេស ដើម្បីដឹកជញ្ជូនប្រតិភូ និងអត្តពលិកកម្ពុជា ហោះហើរត្រង់ពីរាជធានីភ្នំពេញ ទៅទីក្រុងសូឡូ ក៏ដូចជាការសម្រួលឲ្យមានការចាក់វ៉ាក់សាំងដូសជំរុញ ដើម្បីធានាបាននូវសុខសុវត្ថិភាព ទាំងការធ្វើដំណើរទៅ និងត្រឡប់មកវិញ ក្នុងការបង្ការជំងឺកូវីដ-១៩ ទៀតផង។
សូមបញ្ជាក់ថា ព្រឹត្តិការណ៍កីឡាអាស៊ានប៉ារ៉ាហ្គេម លើកទី១១ ដែលឥណ្ឌូណេស៊ី ព្រមទទួលធ្វើម្ចាស់ផ្ទះ ក្រោយវៀតណាម ប្រកាសលុបចោលនេះ នឹងប្រព្រឹត្តទៅពីថ្ងៃទី៣០ ខែកក្កដា ដល់ថ្ងៃទី០៦ ខែសីហា ឆ្នាំ២០២២ ក្នុងនោះកម្ពុជា បានបញ្ជូនកីឡាករ-កីឡាការិនីសរុបចំនួន ១១៥នាក់ លើ១១ប្រភេទកីឡាចូលរួម គឺមានកីឡាអត្តពលកម្ម ហែលទឹក បាល់ទះអង្គុយបុរស និងនារី បាល់បោះរទេះបុរស និងនារី បាល់បោះជនពិការភ្នែក បាល់ទាត់៧ម្ខាង (ចលករខួរក្បាល) វាយកូនឃ្លីលើតុ វាយសី លើកទម្ងន់ អុក និងប៊ូស្យា ៕
ចែករំលែកព័តមាននេះ