ខេត្តមណ្ឌលគិរី ៖ សំណុំរឿងឃា.ត.កម្មដែលគេប្រទះឃើញស.ពក្នុងចំការដំឡូងមី នៅស្រុកកែវសីមា ខេត្តមណ្ឌលគិរី ត្រូវបានសមត្ថកិច្ចបំបែក ក្រោយបើកប្រតិបត្តិការអស់ជិតមួយខែ រហូតឈានដល់ឃាត់ខ្លួនមនុស្សពីរនាក់ នៅខេត្តត្បូងឃ្មុំ និងខេត្តក្រចេះ ដើម្បីចាត់ការតាមច្បាប់។
សេចក្តីរាយការណ៍បានឲ្យដឹងថា បន្ទាប់ពីឃាត់ខ្លួនអស់រយៈពេល២៤ម៉ោង ជនសង្ស័យដែលសមត្ថកិច្ចចាប់ខ្លួនក្នុងករណីមនុស្សឃាតបានឆ្លើយសារភាព ខ្លួនពិតជាស.ម្លា.ប់នារីរងគ្រោះដោយសារទាស់ពាក្យសម្តី ខណៈពេលដំបូងជននេះបានឆ្លើយពង្វាងសមត្ថកិច្ច ។
យោងតាមរបាយណ៍របស់សមត្ថកិច្ចបានឲ្យដឹងថា នៅវេលាម៉ោង០៩និង៤៥នាទីព្រឹក ថ្ងៃទី២៦ ខែកក្កដា ឆ្នាំ២០២២ កម្លាំងជំនាញនៃស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងជំនាញនៃនាយកដ្ឋាននគរបាលព្រហ្មទណ្ឌ និងកម្លាំងនគរបាលព្រហ្មទណ្ឌខេត្តត្បូងឃ្មុំ កម្លាំងប៉ុស្តិ៍រដ្ឋបាលនាងទើត បានចុះអនុវត្តដីកាបញ្ជាឲ្យចូលខ្លួននៅចំណុចភូមិចំបក់ ឃុំនាងទើត ស្រុកតំបែរ ខេត្តត្បូងឃ្មុំ បានឃាត់ខ្លួនឈ្មោះ ឆៃ សុខា ភេទប្រុស អាយុ២៦ឆ្នាំជនជាតិខ្មែរ។
របាយការណ៍បន្តថា ប្រតិបត្តិការខាងលើនេះ សមត្ថកិច្ចឃាត់ជនសង្ស័យក្នុងករណីមនុស្សឃាត កាលពីថ្ងៃទី២៩ ខែមិថុនា ឆ្នាំ២០២២ នៅចំណុចភូមិស្រែអណ្ដោល ឃុំស្រែឈូក ស្រុកកែវសីមា ខេត្តមណ្ឌលគិរី ។
តាមចម្លើយសារភាពរបស់ជនសង្ស័យឈ្មោះ ឆៃ សុខា បានសារភាពថា ខ្លួនពិតជាបានច្របាច់.កស.ម្លា.ប់ជនរងគ្រោះឈ្មោះ លិ ភេទស្រី ប្រាកដមែន ដោយមូលហេតុទាស់សម្តីគ្នាពេលអង្គុយលេងនៅក្នុងចំការ។ ក្រោយស.ម្លា.ប់ជនរងគ្រោះរួច ជនសង្ស័យបានយកទូរស័ព្ទពីជនរងគ្រោះទៅលក់ឲ្យឈ្មោះ រិទ្ធី សុភា ភេទប្រុស អាយុ២៨ឆ្នាំ ទើបសមត្ថកិច្ចបន្តទៅឃាត់ខ្លួនឈ្មោះ សុភា ដែលជាអ្នកទទួលផលចោរកម្ម នៅចំណុចក្រុមហ៊ុនប៊ិញភឿក២ស្ថិតនៅឃុំឃ្សឹម ស្រុកស្នួល ខេត្តក្រចេះ នៅវេលាម៉ោង១៥និង៣០នាទីថ្ងៃដដែល(២៦ កក្កដា) និងដកហូតបានទូរសព្ទ័ចល័ត០១គ្រឿង ម៉ាកVIVOពណ៌ក្រហម ដែលជាទូរស័ព្ទរបស់ជនរងគ្រោះ ។
ជនសង្ស័យទាំង២នាក់ខាងលើ ត្រូវបានបញ្ជូនទៅកាន់ស្នងការដ្ឋាននគរបាលខេត្តមណ្ឌលគិរីដើម្បី កសាងសំណុំរឿងបញ្ជូនទៅសាលាដំបូងខេត្តតាមនីតិវិធី ។
ចែករំលែកព័តមាននេះ