បទឈប់បាញ់គ្នាជាសាកលនៅស៊ីរីរវាងរបបក្រុងដាម៉ាស់ និងពួកឧទ្ទាមចូលជាធរមាន នាថ្ងៃទី២៩ ធ្នូ ចាប់ពីពាក់កណ្ដាលយប់ទៅយោងតាមកិច្ចព្រមព្រៀងមួយចុះហត្ថលេខាក្រោមការឧបត្ដម្ភរបស់រុស្ស៊ី និងតួកគី ដែលអាចកំណត់ពីរបត់ថ្មីមួយក្រោយជម្លោះរយៈពេលជាង៥ឆ្នាំ ។
កិច្ចព្រមព្រៀងនេះដែលមិនបញ្ចូលពួកអ្នកដែលចាត់ទុកថា ពួកភេរវករដូចជាក្រុមរដ្ឋអ៊ិស្លាមជាដើម ត្រូវបានប្រកាសដោយប្រធានាធិបតីរុស្ស៊ី លោកវ៉្លាឌីមៀរ ពូទីន ហើយអះអាងដោយកងទ័ពស៊ីរី និងពួកប្រឆាំង ។
លោករ៉ាមីអាប់ដែល រ៉ាហ៍ម៉ាន់ នាយកអង្គការសិទ្ធិមនុស្សស៊ីរី OSDH មានប្រភពព័ត៌មានច្រើនក្នុងប្រទេស គូសបញ្ជាក់ថា ១ម៉ោងមុនចាប់ផ្ដើមបទឈប់បាញ់គ្នា លើគ្រាប់រណសិរ្សមានភាពស្ងប់ស្ងាត់ លើកលែងតែគ្រាប់រ៉ុក្កែតប៉ុន្មានគ្រាប់ ដែលបាញ់សំដៅក្រុងអាឡែបនិងគ្រាប់រ៉ុក្កែត២គ្រាប់ធ្លាក់លើជាយក្រុងដាម៉ាស់។ ប្រធានាធិបតីតួកគី លោករីស៊ីប តីយីបអ័រដូហ្គាន ដែលប្រទេសលោកគាំទ្រពួកឧទ្ទាមចាត់ទុកកិច្ចព្រមព្រៀងនោះថា ជាកាលានុវត្ដភាពជាប្រវត្ដិសាស្ដ្រ ដើម្បីបញ្ចប់សង្គ្រាមដែលបណ្ដាលឱ្យមនុស្សស្លាប់ជាង៣១០.០០០នាក់ និងជាច្រើនលាននាក់រត់ភៀសខ្លួន ។
ការប្រកាសពីបទឈប់បាញ់គ្នាជាសាកលនោះ កើតមានមួយសប្ដាហ៍ក្រោយពីរបបស៊ីរីដណ្ដើមយកបានទីក្រុងអាឡែបទាំងមូល ដោយសារការជួយទ្រទ្រង់របស់អីុរ៉ង់និងរុស្ស៊ី៕
ចែករំលែកព័តមាននេះ