ADផ្ទាំងផ្សព្វផ្សាយពាណិជ្ជកម្ម

Picture

ជំនឿទួល​យាយ​ដូន​ មាន​ឫទ្ធិ​បារមី​ពូកែ​ស័ក្តិសិទ្ធិ​ណាស់

2 អាទិត្យ មុន

ទីទួល​បុរាណ​មួយ​ដែល​មាន​បារមី​ពូកែ​ស័ក្តិសិទ្ធិ​តែងតែមាន​អ្នកស្រុក​មក​អុជ​ធូប​ទៀន និង​ដាក់​តង្វាយ​បន់ស្រន់​សុំ​សេចក្តីសុខ​ស្ទើរតែ​មិន​ដាច់ ក្នុង​នោះ​មាន​ទាំង​ជនជាតិ​ខ្មែរ​ផង និង​ជនបរទេស​ផង នោះ គឺ​ទួល​យាយ​ដូន ។ ទួល​លោកយាយ​ដូន​មាន​ចម្ងាយ​ជិត​២​គីឡូម៉ែត្រ​នៅ​ភាគ​ខាងត្បូង​ពី​ច្រក​ទ្វារ​ព្រំដែន​អន្តរជាតិ​បា​វិត ស្ថិត​ក្នុងភូមិ​បា​វិត​កណ្ដាល សង្កាត់​បា​វិត…

ទីទួល​បុរាណ​មួយ​ដែល​មាន​បារមី​ពូកែ​ស័ក្តិសិទ្ធិ​តែងតែមាន​អ្នកស្រុក​មក​អុជ​ធូប​ទៀន និង​ដាក់​តង្វាយ​បន់ស្រន់​សុំ​សេចក្តីសុខ​ស្ទើរតែ​មិន​ដាច់ ក្នុង​នោះ​មាន​ទាំង​ជនជាតិ​ខ្មែរ​ផង និង​ជនបរទេស​ផង នោះ គឺ​ទួល​យាយ​ដូន ។

Picture

ទួល​លោកយាយ​ដូន​មាន​ចម្ងាយ​ជិត​២​គីឡូម៉ែត្រ​នៅ​ភាគ​ខាងត្បូង​ពី​ច្រក​ទ្វារ​ព្រំដែន​អន្តរជាតិ​បា​វិត ស្ថិត​ក្នុងភូមិ​បា​វិត​កណ្ដាល សង្កាត់​បា​វិត ក្រុង​បា​វិត ខេត្តស្វាយរៀង ដោយ​មាន​អ្នកស្រុក​មាន​ជំនឿ​ថា បើ​មក​បួងសួង​នៅ​ទួល​យាយ​ដូន​ហើយ​ប្រាថ្នា​អ្វី គឺ​បាន​សម្រេច​ដូច​ក្តី​បំណង ។

ការ​គោរព​បូជា និង​បួងសួង​សុំ​ឲ្យ​បារមី​លោកយាយ​ដូន គឺ​ចាប់តាំងពី​សម័យ​ដើម​ដ៏​យូរលង់​មក​ហើយ​រហូត​មក​ដល់​បច្ចុប្បន្ន ។ បើ​តាម​ចាស់ទុំ​ព្រឹទ្ធាចារ្យ​បាន​និយាយ​ត​គ្នា​ថា ទួល​បុរាណ​មួយ​នេះ​មាន​ប្រវត្តិ​ទាក់ទង​ទៅ​នឹង​មេទ័ព​ល្បី​តាំងពី​សម័យ​ដើម​មក ។

Picture

បើ​តាម​ព្រឹទ្ធាចារ្យ​មួយ​រូប​ដែល​ជា​អ្នក​មើលថែ និង​រៀបចំ​ទួល​យាយ​ដូន​បាន​ប្រាប់​ឱ្យ​ដឹង​ថា ទួល​យាយ​ដូន​កើតឡើង​តាំងពី​មុន​សម័យ​អង្គរវត្ត​ទៅ​ទៀត ប៉ុន្តែ​មិនដឹង​ថា ក្នុង​សតវត្ស​ណា​នោះ​ទេ ។ លោកតា​បាន​បរិយាយ​ទាក់ទង​នឹង​ប្រវត្តិ​ទួល​លោកយាយ​ដូន​ថា មាន​ចាស់ទុំ​តែងតែ​និយាយ​រឿង​ត​ៗ​គ្នា​យ៉ាងនេះ​ថា កាលពីដើម​ឡើយ​មាន​មេទ័ព​ទិស​ទាំង​ប្រាំមួយ​បាន​មក​ច្បាំង​នៅ​ទិស​ឥ​សាន្ត​ឈ្នះ​អស់​សត្រូវ ។

ក្រោយ​ពី​បាន​ជ័យជម្នះ​មេទ័ព​ម្នាក់​បាន​មក​បោះជំរំ​នៅ​ជិត​ទួល​លោកយាយ​ដូន​នេះ មាន​ថ្ងៃមួយ​នោះ ពេល​យប់​មេទ័ព​បាន​សុបិននិមិត្ត​ឃើញ​ទេពអប្សរ​មួយ​អង្គ នាង​មាន​រូបឆោម​ស្រស់​ស្អាត​ណាស់​ធ្វើ​ឲ្យ​លោក​មេ​ទ​ព័​មានចិត្ត​ស្រឡាញ់​ពេញ​បេះដូង ។

Picture

តាម​ពិត​នាង​អប្សរ​នោះ គឺជា​ត្រី​ផ្សោត ធ្វើ​សមាធិ​នៅ​ភ្នំ​សំបុក​ក្នុងស្រុក​សំបូរ​ខេត្តក្រចេះ នាង​មាន​បារមី​អាច​ប្រែ​ក្រឡា​ជា​មនុស្ស​បាន ហើយ​មាន​និស្ស័យ​នឹង​លោក​មេទ័ព​ក៏​បាន​ប្រាកដ​ខ្លួន​ឲ្យ​លោក​មេទ័ព​បានឃើញ​ជាក់​នឹង​នេត្រា លោក​មេទ័ព​ក៏​មានចិត្ត​ប្រតិព័ទ្ធ​កាន់តែ​ខ្លាំង​និង​បាន​សុំ​នាង​រៀប​ការ​ជា​ស្វាមីភរិយា​រស់នៅ​សុខដុមរមនា​តទៅ ។

នៅ​គ្រាមួយ​នោះ​មានរឿង​កើតឡើង​ឯ​ទិសទក្សិណ មេទ័ព​ក៏​ទៅ​ធ្វើសង្គ្រាម​ជាមួយ​សត្រូវ​នៅ​ទិសទក្សិណ ពេល​នោះ​នាង​ជា​ភរិយា​ក៏​ទៅ​តាម​ធ្វើសង្គ្រាម​ជាមួយ​ស្វាមី​ដែរ ពេល​នោះ​ស្វាមី​ព្រះ​នាង​បាន​ចាញ់​ដៃ​សត្រូវ​ក៏​ស្លា​.​ប់​បាត់បង់​ជីវិត​ទៅ ។

Picture

ក្រោយមក​នាង​ជា​ភរិយា​បាន​ដឹកនាំ​កងទ័ព​ទាំង​៥០០​របស់​ស្វាមី​ទៅ​ច្បាំង​សឹក​ធ្វើសង្គ្រាម​រហូត​ទទួល​បាន​ជ័យជម្នះ​លើ​ខ្មាំងសត្រូវ​នៅ​លើ​ទួល​នេះ ។ កងទ័ព​ទាំងឡាយ​បាន​គោរព​នាង​ដោយ​ថ្វាយ​នាម​ថា មេទ័ព​ស្រី​ស្រអែម មាន​រិ​ទ្ធី​បារមី​ខ្លាំងក្លា​តែងតែ​ដឹកនាំ​កងទ័ព​ច្បាំង​ឈ្នះសត្រូវ​ជា​ដរាប​មក ។

រហូត​ដល់​មេទ័ព​ស្រី​នោះ​មាន​វ័យ​កាន់តែ​ចាស់​អស់បុណ្យ​ជាមួយ​មនុស្ស​ក៏​បាន​ធ្វើ​មរណកាល​ទៅ ពេល​នោះ​កងទ័ព​បាន​បូជាសព​នាង​ទុក​ព្រះ​ធាតុ​តម្កល់​នៅ​លើ​ទីទួល​នេះ ហើយ​បាន​កសាង​រូបសំណាក​អំពី​ថ្ម​ដាប់​សម្រាប់​គោរព​បូជា​សុំ​សុខ​ចម្រើន​ទើប​ទីទួល​នេះ​មាន​នាម​ប្រាកដ​ថា​ទួល​លោកយាយ​ដូន​រហូត​មក ៕