ខេត្តព្រះវិហារ ៖ អ្នកទេសចរជាតិ និងអន្តរជាតិ ច្រើនបានទៅកម្សាន្តនៅរមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារជាប់ព្រំដែនកម្ពុជា-ថៃនៅចុងឆ្នាំ២០១៦ នៃរដូវលំហើយនេះ ។
ខេត្តព្រះវិហារ ៖ អ្នកទេសចរជាតិ និងអន្តរជាតិ ច្រើនបានទៅកម្សាន្តនៅរមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារជាប់ព្រំដែនកម្ពុជា-ថៃនៅចុងឆ្នាំ២០១៦ នៃរដូវលំហើយនេះ ។
លោកចាន់ ឆន មន្ត្រីទទួលបន្ទុកព័ត៌មាននៃអាជ្ញាធរជាតិព្រះវិហារឱ្យដឹងកាលពី ថ្មីៗកន្លងមកថាក្នុងរដូវលំហើយនេះអ្នកទេសចរជាតិនិងអន្តរជាតិជាច្រើនបានចេញដំណើរពីបណ្តាខេត្តនានាក្នុងព្រះរាជាណាចក្រកម្ពុជាទៅទស្សនាប្រាង្គប្រាសាទព្រះវិហារដែលជាសម្បត្តិបេតិកភណ្ឌពិភពលោក ។ កាលពីរដូវវស្សាកន្លងទៅ អ្នកទេសចរជាតិ និងអន្តរជាតិទៅទស្សនារមណីយដ្ឋានវប្បធម៌ប្រវត្តិសាស្ត្រប្រាសាទព្រះវិហារថយចុះគួរឱ្យកត់សម្គាល់ ដោយសារតែភ្លៀងធ្លាក់ខ្លាំងពេកពិបាកធ្វើដំណើរ ។ នៅរដូវលំហើយចុងឆ្នាំ២០១៦នេះ អ្នកទេសចរជាតិនិងអន្តរជាតិបានទៅទស្សនាប្រាសាទព្រះវិហារក្នុងមួយថ្ងៃចន្លោះពី២០០នាក់ទៅ២៥០នាក់ ។
ទេសចរដែលទៅកម្សាន្តនៅតំបន់រមណីយដ្ឋានប្រាសាទព្រះវិហារ លោកចាន់ ឆន បញ្ជាក់ថាមានភាពងាយស្រួលធ្វើដំណើរដោយសារផ្លូវស្អាត ។ ចំណែកផ្ទះសំណាក់ សណ្ឋាគារ ភោជនីយដ្ឋាន អាហារដ្ឋាន សម្រាប់បម្រើជូនអ្នកទេសចរមានគ្រប់គ្រាន់នៅទីប្រជុំជនឃុំស្រឯមចម្ងាយពីប្រាសាទព្រះវិហារ ប្រមាណ២០គីឡូម៉ែត្រ ។
អ្នកទេសចរអាចស្នាក់នៅ និងហូបអាហារបានមុននឹងធ្វើដំណើរឡើងទៅទស្សនា ប្រាសាទព្រះវិហារ ឬអាចវេចខ្ចប់ចំណីអាហារយកទៅទទួលទាននៅលើប្រាសាទព្រះវិហារ។
លោកហង្ស វ៉ាទីន មន្ត្រីស្ថិតិនៃមន្ទីរទេសចរណ៍ខេត្តព្រះវិហារឱ្យដឹងថាគិតពីខែ មករាដល់ខែវិច្ឆិកា ឆ្នាំ២០១៦ អ្នកទេសចរជាតិទៅកម្សាន្តនៅរមណីយដ្ឋានប្រវត្តិសាស្ត្រប្រាសាទព្រះវិហារមានចំនួន៧៦.៧៧៩នាក់ បើធៀបនឹងរយៈពេលដូចគ្នាឆ្នាំ២០១៥ថយចុះ៩% ។ អ្នកទេសចរអន្តរជាតិចំនួន២១.០៥៤នាក់ បើធៀបនឹងរយៈពេលដូចគ្នាឆ្នាំ២០១៥ កើនឡើង៣៣,២២% ។
ចំពោះសំបុត្រចូលទស្សនាប្រាសាទព្រះវិហារសម្រាប់អ្នកទេសចរអន្តរជាតិតម្លៃ១០ដុល្លារក្នុងម្នាក់ និងអ្នកទេសចរជាតិពុំយកថ្លៃសំបុត្រទេ ។
ចំពោះសភាពការណ៍នៅតំបន់ប្រាសាទព្រះវិហារព្រំដែនកម្ពុជា-ថៃពុំមានអ្វីគួរឱ្យកត់សម្គាល់ទេ ដោយកងកម្លាំងទាំងពីរភាគីកម្ពុជានិងថៃ មានកិច្ចសហប្រតិបត្តិការល្អជាមួយគ្នា ៕
ចែករំលែកព័តមាននេះ