យន្តហោះយោធារុស្ស៊ីធ្លាក់រកឃើញប្រអប់ខ្មៅទី2
ក្រសួងការពារប្រទេសរុស្ស៊ីអះអាងកាលពីថ្ងៃទី២៨ ធ្នូថា ពួកអ្នកមុជទឹកបានរកឃើញប្រអប់ខ្មៅទី២របស់យន្តហោះ TU-154 នៃកងទ័ពរុស្ស៊ីដែលធ្លាក់កាលពីថ្ងៃទី២៥ ធ្នូ ក្នុងសមុទ្រខ្មៅ ។
ក្រសួងការពារប្រទេសរុស្ស៊ីអះអាងកាលពីថ្ងៃទី២៨ ធ្នូថា ពួកអ្នកមុជទឹកបានរកឃើញប្រអប់ខ្មៅទី២របស់យន្តហោះ TU-154 នៃកងទ័ពរុស្ស៊ីដែលធ្លាក់កាលពីថ្ងៃទី២៥ ធ្នូ ក្នុងសមុទ្រខ្មៅ ។
ប្រអប់ខ្មៅសំខាន់របស់យន្តហោះនោះត្រូវបានរកឃើញកាលពីថ្ងៃទី២៧ ធ្នូ ហើយប្រគល់ដល់វិទ្យាស្ថានកណ្តាលខាងការស្រាវជ្រាវរបស់កងទ័ពអាកាសរុស្ស៊ីស្ថិតនៅជិតក្រុងមូស្គូ ដើម្បីធ្វើការវិភាគ ។ រហូតមកទល់ពេលនេះពុំទាន់មានមូលហេតុផ្លូវការនៃសោកនាដកម្មនោះបណ្តាលឱ្យមនុស្សស្លាប់៩២នាក់ ត្រូវបានប្រកាសនៅឡើយ ។ ទីភ្នាក់ងារសន្តិសុខសហព័ទ្ធរុស្ស៊ី FSB មុននេះគូសបញ្ជាក់ថា ការស៊ើបអង្កេតបច្ចុប្បន្នផ្តោតលើលទ្ធភាព៤គឺកំហុសរបស់អ្នកបើក គុណភាពរបស់ប្រេង របស់ចម្លែកមួយដែលធ្វើឱ្យម៉ាស៊ីនគាំងឬកំហុសខាងបច្ចេកទេស។
ពួកអ្នកមុជទឹកមុជរកឃើញសាកសពមនុស្ស១៥នាក់ព្រមទាំងបំណែកនៃសាកសពជនរងគ្រោះ២៣៩ដុំ កាលពីវេលាថ្ងៃត្រង់ថ្ងៃទី២៨ ធ្នូ រួចសាកសពមនុស្សភាគច្រើនត្រូវបានបញ្ជូនទៅកាន់ក្រុងមូស្គូរួចហើយដើម្បីកំណត់អត្តសញ្ញាណ ។
ក្រសួងការពារប្រទេសរុស្ស៊ីបញ្ជាក់ថា តាំងពីចាប់ផ្តើមប្រតិបត្តិការតាមរុករកមក បំណែកយន្តហោះធំៗ១២និងបំណែកតូចៗ១៥៤៧ត្រូវបានស្រង់ ។ ប្រតិបត្តិការតាមរុករកក្នុងតំបន់យន្តហោះធ្លាក់នៅបន្តនាថ្ងៃទី២៨ ធ្នូ ដោយមានការចូលរួមរបស់នាវា៤៥គ្រឿង យានមុជទឹកជ្រៅ១៥គ្រឿង យន្តហោះ១២គ្រឿង ឧទ្ធម្ភាគចក្រ៥គ្រឿង និងយន្តហោះគ្មានមនុស្សបើកជាច្រើនគ្រឿង ។ មនុស្សជាង៣.៥០០នាក់ក្នុងនោះមានអ្នកមុជទឹក១៩២នាក់ បច្ចុប្បន្នចូលរួមក្នុងប្រតិបត្តិការតាមរុករក ៕
ចែករំលែកព័តមាននេះ