រាជធានីភ្នំពេញ ៖ យុវជនជាកម្មករសំណង់ម្នាក់ខណៈពេលកំពុងអង្គុយលេងទូរស័ព្ទនៅលើសំណង់ផ្ទះល្វែងដែលកំពុងសាងសង់ ស្រាប់តែមានជនមិនស្គាល់មុខ ដោយពុំដឹងថាមានគ្នាប៉ុន្មាននាក់នោះទេ។ បានធ្វើសកម្មភាពលបលួចកាប់ប្រហារបណ្ដាលឲ្យរងរបួសយ៉ាងធ្ងន់ធ្ងរ ដោយបែករយះក្បាល និងដាច់ដៃទាំងពីរ ដែលការកាប់នេះមានចេតនាផ្ដាច់ជីវិតយុវជនរូបនេះតែម្ដង។ បន្ទាប់មកជនដៃដល់បានរត់គេចខ្លួនបាត់ដោយសុវត្ថិភាពដោយនាំយកទូរស័ព្ទរបស់ជនរងគ្រោះទៅជាមួយផង។ ហេតុការណ៍នោះបានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង៥ និង៣០នាទីល្ងាច ថ្ងៃទី២៤ ខែកក្ដដា ឆ្នាំ២០២២នេះ នៅក្នុងការដ្ឋានសំណង់«បុរីសុខចម្រើន»ដែលមានទីតាំងស្ដិតនៅក្នុងភូមិទួលតាឡាត់ សង្កាត់កំបូល ខណ្ឌកំបូល រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុបានប្រាប់ឲ្យដឹងថា យុវជនដែលជាកម្មករសំណង់រងគ្រោះស្ទើរស្លា.ប់ស្ទើររស់ខាងលើនោះឈ្មោះ វុទ្ធី អាយុ១៨ឆ្នាំ។ សព្វថ្ងៃមានទីលំនៅភូមិស្រែស្រណុក ឃុំក្បាលរមាស ស្រុកសេសាន្ត ខេត្តស្ទឹងត្រែង ដែលទើបនឹងមកស្នាក់នៅធ្វើការនៅក្នុងការដ្ឋានសំណង់ខាងលើមួយរយៈពេលខ្លីប៉ុណ្ណោះ។ ប្រភពដដែលបានប្រាប់ឲ្យដឹងបន្តទៀតថា ពុំមាននរណាម្នាក់បានឃើញពីសកម្មភាពនៃជនដៃដល់ហើយដឹងថា ជនដៃដល់មានគ្នាប៉ុន្មាននាក់នោះទេ ដោយនៅមុនពេលកើតហេតុយុវជនរងគ្រោះបានឡើងទៅចុចទូរស័ព្ទ និងថតសែលហ្វីនៅជាន់ខាងខាងលើនៃសំណង់ផ្ទះល្វែងដែលកំពុងសាងសង់នោះតែម្នាក់ឯង។
លុះក្រោយមកស្រាប់តែឃើញជនរងគ្រោះរូបនេះធ្លាក់ពីជាន់លើស្ថិតក្នុងស្ថានភាពរបួសរយះក្បាលហូរឈា.មជោគខ្លួន និងដាច់ដៃទាំងពីរទៅហើយ ទើបបង្កឲ្យមានការភ្ញាក់ផ្អើលឆោឡោ ហើយនាំគ្នាទៅមើលដឹងថាត្រូវជនមិនស្គាល់មុខលួចកាប់ រីឯជនដៃដល់គេចខ្លួនបាត់ស្រមោល។ ប្រភពខាងលើបានប្រាប់ឲ្យដឹងបន្តទៀតថា ក្រោយពេលកើតហេតុយុវជនរងគ្រោះបានបាត់បង់ទូរស័ព្ទដែលសង្ស័យជនដៃដល់យកទៅ បន្ទាប់មកត្រូវបានសាច់ញាតិ និងអ្នករួមការងារហៅរថយន្តពេទ្យដឹកបញ្ជូនទៅសង្គ្រោះបន្ទាន់នៅមន្ទីរពេទ្យ។ ដោយឡែកនគេបាលខណ្ឌកំបូលក៏បានចុះទៅកាន់កន្លែងកើតហេតុធ្វើការស្រាវជ្រាវរកជនដៃដល់ ដើម្បីស្វែងរកចាប់ខ្លួនផ្ដន្ទាទោសតាមច្បាប់និងបានដឹងពីមូលហេតុនៃការកាប់ប្រហារនេះប៉ុនប៉ងផ្ដាច់ជីវិតនេះ៕ ដោយ យន់ ស៊ីថា
ចែករំលែកព័តមាននេះ