ខេត្តកំពង់ឆ្នាំង ៖ ជំនន់ទឹកភ្លៀងបានធ្លាក់យ៉ាងគំហុកពីទ្វារទឹកអន្លង់ជ្រៃ បានហូរមកកាត់ផ្ដាច់ផ្លូវជាតិលេខ ៥ត្រង់ចន្លោះគីឡូម៉ែត្រលេខ ៤០និងលេខ ៤១ ស្ថិតក្នុងភូមិជ្រលាត់ដៃ ឃុំស្វាយ ស្រុកសាមគ្គីមានជ័យ…
ខេត្តកំពង់ឆ្នាំង ៖ ជំនន់ទឹកភ្លៀងបានធ្លាក់យ៉ាងគំហុកពីទ្វារទឹកអន្លង់ជ្រៃ បានហូរមកកាត់ផ្ដាច់ផ្លូវជាតិលេខ ៥ត្រង់ចន្លោះគីឡូម៉ែត្រលេខ ៤០និងលេខ ៤១ ស្ថិតក្នុងភូមិជ្រលាត់ដៃ ឃុំស្វាយ ស្រុកសាមគ្គីមានជ័យ បណ្ដាលឱ្យការចរាចរណ៍ជួបការលំបាក ។
ហេតុការណ៍ខាងលើនេះបានចាប់ផ្ដើមពីម៉ោង៨និង៣០នាទីយប់ថ្ងៃទី ២១ ខែកក្កដា រហូតដល់ព្រឹកថ្ងៃទី២២ ខែកក្កដាចរាចរណ៍ត្រូវបានសម្រួលឡើងវិញ ដោយបើកតាមផ្លូវវាង ដែលក្រុមហ៊ុនជប៉ុនទើបធ្វើរួច ។
លោក សេង ចិន្តា អធិការស្រុកសាមគ្គីមានជ័យ បានឲ្យដឹងថា នៅវេលាម៉ោងប្រមាណជាង ៨យប់ ទឹកបានធ្លាក់មកពីលើ ហើយបានបុកកាត់ផ្ដាច់ផ្លូវជាតិលេខ ៥ចំណុចភូមិជ្រលាត់ដៃ បណ្ដាលឱ្យការធ្វើដំណើរជួបការលំបាក ។
ក្នុងពេលនោះដែរ កម្លាំងសមត្ថកិច្ចនគរបាលស្រុកសាម្គីមានជ័យ នគរបាលខេត្តកំពង់ឆ្នាំង ព្រមទាំងកងរាជអាវុធហត្ថផង មានគ្នាប្រមាណជាង ៥០នាក់ បានប្រតិបត្តិការអន្តរាគមន៍សម្រួលចរាចរណ៍ទាំងយប់ ។ ប៉ុន្តែដល់ម៉ោងប្រហែល២រំលងអធ្រាតទឹកបុកខ្លាំងពេកទើបការចរាចរណ៍ទៅបានកាត់ផ្ដាច់មិនអាចទៅមកបាន ។
ជាក់ស្តែង នៅវេលាម៉ោង ៨ព្រឹក ថ្ងៃទី២២ ខែកក្កដានេះ ខាងក្រុមហ៊ុនធ្វើផ្លូវជប៉ុនបានសម្រេចឲ្យធ្វើដំណើរតាមផ្លូវថ្មីវាងផ្សារឧត្តុង ដែលទើបសាងសង់រួច ទើបការចរាចរណ៍បានដំណើរការឡើងវិញ ។ ចំណែកផ្លូវជាតិនៅចំណុចខាងលើនោះមិនទាន់អនុញ្ញាតឲ្យធ្វើដំណើរបាននៅឡើយនោះទេ ៕
ចែករំលែកព័តមាននេះ