ខេត្តស្ទឹងត្រែង ៖ រថយន្តដឹកជញ្ជូនសត្វគោឆ្លងដែនពីប្រទេសឡាវ ចូលមកខេត្តស្ទឹងត្រែងត្រូវបានគណៈបញ្ជាការឯកភាពរដ្ឋបាលស្រុកបុរីអូរស្វាយសែនជ័យ ដឹកនាំកម្លាំងកងរាជអាវុធហត្ថស្រុក ប្រដេញស្ទាក់ចាប់ ដោយមានការសង្ស័យឆ្លងដែនពីឡាវ ចូលមកខេត្តស្ទឹងត្រែងកម្ពុជា ដោយខុសច្បាប់ ។…
ខេត្តស្ទឹងត្រែង ៖ រថយន្តដឹកជញ្ជូនសត្វគោឆ្លងដែនពីប្រទេសឡាវ ចូលមកខេត្តស្ទឹងត្រែងត្រូវបានគណៈបញ្ជាការឯកភាពរដ្ឋបាលស្រុកបុរីអូរស្វាយសែនជ័យ ដឹកនាំកម្លាំងកងរាជអាវុធហត្ថស្រុក ប្រដេញស្ទាក់ចាប់ ដោយមានការសង្ស័យឆ្លងដែនពីឡាវ ចូលមកខេត្តស្ទឹងត្រែងកម្ពុជា ដោយខុសច្បាប់ ។
ប្រតិបត្តិការនេះ បានធ្វើឡើងនៅម៉ោង៦ និង៣០នាទីយប់ថ្ងៃទី១៨ កក្កដា ឆ្នាំ២០២២ នៅលើដងផ្លូវជាតិលេខ៧ខាងក្រោយក្រុមហ៊ុនចំការចេក ស្ថិតក្នុងភូមិរិទ្ធីសែនជ័យ២ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង។
លោក លី មីនា អភិបាលស្រុកបុរីអូរស្វាយសែនជ័យបានប្រាប់ឲ្យដឹងនៅថ្ងៃ១៩ កក្កដា នេះថា ក្រោយទទួលការរាយការណ៍ពីអ្នកសារព័ត៌មានថា មានរថយន្តដឹកជញ្ជូនសត្វគោឆ្លងដែនពីឡាវ ចូលមកខេត្តស្ទឹងត្រែង ដោយឆ្លងកាត់ដែនដីរដ្ឋបាលស្រុក លោកក៏បានប្រញាប់ដឹកនាំកម្លាំងកងរាជអាវុធហត្ថស្រុក ចុះស្ទាក់ចាប់រថយន្តដឹកសត្វគោនោះភ្លាមៗ ។
លោកភិបាលបានបន្តថា ក្រោយការសាកសួរអ្នកដឹកគោនេះបានប្រាប់ថា សត្វគោទាំងអស់ គឺពួកគេបានទិញពីប្រជាជនឡាវ ហើយដឹកឆ្លងដែន នាំយកមកធ្វើលិខិត នៅក្នុងឃុំស្រែសំបូរ ស្រុកសៀមប៉ាង រួចហើយបានដឹកតាមរថយន្តកូរ៉េពណ៌ខៀវ ពាក់ស្លាកលេខ កំពង់ស្ពឺ ២A-៤២២៦។ ក្រោយការចាប់រួមក៏បានប្រគល់ទៅឲ្យមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង ចាត់ការជាបន្ត ត្រង់ថា មន្ទីរកសិកម្មខេត្ត មានចំណាត់ការបែបណា គឺជាសមត្ថិច្ចរបស់មន្ត្រីជំនាញកសិកម្មខេត្តស្ទឹងត្រែង។
បើតាមសេចក្តីរាយការណ៍បានឲ្យដឹងថា នាបច្ចុប្បន្ននេះ សកម្មភាពដឹកជញ្ជូនសត្វពាហនៈឆ្លងដែន ដោយខុសច្បាប់ កំពុងតែបន្តកើតមានជាប្រចាំ នៅតាមច្រករបៀងនានា តាមបណ្តោយខ្សែបន្ទាត់ព្រំដែនកម្ពុជា-ឡាវ ក្នុងស្រុកបុរីអូរស្វាយសែនជ័យ និងស្រុកសៀមប៉ាង ។សកម្មភាពនេះ គេបានដាក់ការសង្ស័យថា អាចមានការឃុបឃិតគ្នាពីមន្ត្រីការពារព្រំដែន រួមជាមួយសមត្ថកិច្ច នៅក្នុងមូលដ្ឋាននោះ បើពុំនោះទេ ការដឹកជញ្ជូនសត្វពាហនៈ ឬទំនិញគេចពន្ធគយឆ្លងដែននានាទៀត មិនអាចធ្វើទៅបានដោយរលូនបែបនេះឡើយ។
ដោយឡែក សត្វគោច្រើនក្បាលដែលក្រុមឈ្មួញដឹកជញ្ជូនឆ្លងដែន និងនាំមកធ្វើសំបុត្រទិញ-លក់ និងដឹកជញ្ជូនយកទៅលក់ ហើយត្រូវបានកម្លាំងគណៈបញ្ជាការឯកភាពរដ្ឋបាលស្រុកបុរីអូរស្វាយសែនជ័យ ចាប់បាននៅពេលនេះ គឺក្រុមឈ្មួញបាននាំចូលតាមច្រករបៀងចន្លោះបង្គោលព្រំដែនលេខ ៣៥-៣៦ ហៅ ណាចំប៉ា ស្ថិតក្នុងភូមិសំរោង ឃុំស្រែសំបូរ ស្រុកសៀមប៉ាង ខេត្តស្ទឹងត្រែង។
នៅក្នុងការបញ្ជាក់លិខិតទិញ-លក់សត្វគោ ក្របីនេះ មានការស៊ីញ៉េទទួលដឹងឮ ពីមេភូមិសំរោង លោក កិះ ប៊ុនមី និងមេឃុំស្រែសំបូរ លោក ស៊ិន ម៉ាន់ ដោយអនុញ្ញាតឲ្យដឹកជញ្ជូនសត្វក្របី នាំឆ្ពោះទៅកាន់គោលដៅ ស្រុកវើនសៃ ខេត្តរតនគិរី ដែលជាខេត្តជាប់ព្រំដែន ប្រទេសវៀតណាម៕
ចែករំលែកព័តមាននេះ