ខេត្តកំពង់ឆ្នាំង ៖ បុរសម្នាក់បានរអិលជើងហូរទៅតាមទឹកកួចយកទៅបាត់ ស្ថិតនៅចំណុចទំនប់បារាំង ក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ខណៈដែលគាត់កំពុងបង់សំណាញ់ ចាប់ត្រី ។ ហេតុការណ៍នេះ បានកើតឡើងនៅវេលាម៉ោង៨ និង៣០នាទីយប់ថ្ងៃទី១៨ ខែកក្កដា ឆ្នាំ ២០២២ ។
សមត្ថកិច្ចនគរបាលមូលដ្ឋាននៅកន្លែងកើតហេតុបានឲ្យដឹងថា ក្រោយកើតហេតុ សមត្ថកិច្ចបានស្រាវជ្រាវបានដឹងថា ជនរងគ្រោះមានឈ្មោះ វង់ សវ័ន្ត អាយុ៣៥ឆ្នាំ មានទីលំនៅភូមិចំការតាម៉ៅ ឃុំស្រែថ្មី ស្រុករលាប្អៀរ បុរសនេះមានប្រពន្ធនឹងកូន២នាក់ក្នុងបន្ទុក។
ប្រភពដដែលបានបន្តថា មុនពេលកើតហេតុគេឃើញបុរសរូបនោះបានទៅបង់សំណាញ់នៅលើទំនប់បារាំង ប៉ុន្តែមិនទាន់បានបង់ទេ គឺមានសំណាញ់នៅក្នុងកាបូបស្ពាយនៅក្រោយខ្នងនៅឡើយ គឺដើរលើទំនប់ ដែលមានទឹកកំពុងហូរខ្លាំង ហើយបានរអិលជើងធ្លាក់ទៅតាមទឹកកួចហូរទៅបាត់តែម្ដង។
ក្រោយពេលកើតហេតុ មានការភ្ញាក់ផ្អើលប្រជាពលរដ្ឋបានទៅពិនិត្យមើលពុំមាននរណាហ៊ានចុះទៅតាមរកនោះទេ ដោយសារស្ថានភាពយប់ងងឹតពេក និងទឹកហូរខ្លាំងផង រហូតដល់ម៉ោង ១១និង៣០នាទីយប់ថ្ងៃដដែល ក្រុមគ្រួសារជនរងគ្រោះដែលបានមក មើលនិងឈររង់ចាំនៅប៉ុស្តិ៍រដ្ឋបាលសង្កាត់ផ្សារឆ្នាំង បានត្រឡប់ទៅវិញ ។
ប្រភពដដែលបានបន្តថា រហូតដល់វេលាម៉ោង១០ និង៣០ នាទីព្រឹកថ្ងៃទី ១៩ ខែកក្កដាឆ្នាំ ២០២២ ជនរងគ្រោះនៅមិនទាន់រកឃើញនៅឡើយទេ ហើយពេលនេះសមត្ថកិច្ចរួមនិងមន្ត្រីជំនាញកំពុងតែរកមធ្យោបាយដើម្បីរកជនរងគ្រោះដើម្បីយកសពប្រគល់ទៅក្រុមគ្រួសារធ្វើបុណ្យតាមប្រពៃណី ។
សូមបញ្ជាក់ដែរថា នៅពេលដែលក្រុមអ្នកជួយ រកសពជនរងគ្រោះ បានប្រតិបត្តិការរុករក គឺបានលិចទូក រួមនឹងម៉ាស៊ីនខ្យល់ និងម៉ាស៊ីន កាណូត អស់២គ្រឿង ផងដែរ ជាមួយគ្នានេះ អ្នកមុចទឹកទាំងនោះបានរួចផុតជីវិត ទាំងប្រផិតប្រផើយ ដោយសារតែមានគេជួយយកទូកទៅចម្លងទាន់ពេលវេលា។
យ៉ាងម៉េចក្តី ស.ពជនរងគ្រោះនៅមិនទាន់រកឃើញនៅឡើយទេ គិតត្រឹមម៉ោង១០និង ៣០នាទីព្រឹកថ្ងៃទី១៩ កក្កដា នេះប៉ុន្តែសំណាញ់និងកាបូបស្ពាយ របស់ជនរងគ្រោះ ត្រូវបានគេរកឃើញហើយ ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ