ខេត្តកំពង់ឆ្នាំង ៖ មានការភ្ញាក់ផ្អើលមួយបានកើតឡើង ដោយសារតែគេបានប្រទះឃើញក្មេងតូចៗពីរនាក់ដេកនៅជិតព្រះអង្គធំ ជិតដើមពោធិ៍សួនច្បារវិមានឯករាជ្យ ក្រុងកំពង់ឆ្នាំង ដែលពីដំបូងឡើយគេបានសន្និដ្ឋានថាអាចឪពុកម្ដាយយកមកបោះបង់ចោល ដែលហេតុការណ៍នេះ កើតឡើងនៅវេលាម៉ោង០៥ព្រឹកថ្ងៃទី១៦ កក្កដា តែក្រោយពីសមត្ថកិច្ចនគរបាលប៉ុស្តិ៍ប្អេរយកក្មេងទៅរក្សាទុក និងឲ្យបាយទឹកហូប ស្រាប់តែឃើញម្ដាយទៅសុំយកវិញ ។
លោក ប៉ិន គីមសាន្ត មេប៉ុស្តិ៍ នគរបាលរដ្ឋបាលសង្កាត់ប្អេរបានឲ្យដឹងថា ពីដំបូងឡើយ គឺមានប្រជាពលរដ្ឋ រាយការប្រាប់ថា មានក្មេងតូចៗ2នាក់ ត្រូវបានគេយកមកដាក់ដេកបោះបង់ចោលនៅសួនច្បារវិមានឯករាជ្យជិតដើមពោធិ៍ លោកក៏បានទៅឃើញក្មេងទាំង2នាក់ ដេកលើសំបកកេះទឹកសុទ្ធ និងស្រាបៀរ ទំនងជាឪពុកម្ដាយក្រាលឲ្យដេក ដើម្បីបង់ចោល ហើយលោកបានយកមកទុកនៅប៉ុស្តិ៍រដ្ឋបាល រួចក៏ទិញបាយទឹកឲ្យហូប ។ ប៉ុន្តែស្រាប់តែម៉ោង០៨ និង៣០នាទីព្រឹកថ្ងៃដដែល ដំណឹងនេះបានលេចឮដល់ម្ដាយក៏បានមកសុំយកកូនត្រឡប់ទៅវិញ។
លោកមេប៉ុស្តិ៍ប្អេរបានបញ្ជាក់ថា ម្ដាយក្មេងតូចទាំង2នាក់មាន ឈ្មោះ ប៉ែនណារ័ត្ន ជាស្ត្រីមេម៉ាយ រស់នៅភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ។ ពេលមកសុំយកកូនវិញ នាងបានប្រាប់ថា នាងបានដាក់កូនឲ្យដេក នៅទីនោះ រួចនាងបានចូលទៅទិញឥវ៉ាន់នៅក្នុងផ្សារ លុះត្រឡប់មកវិញបានបាត់កូន ក៏ឆោឡោដើររកមិនឃើញ ។ លុះក្រោយមក មានគេប្រាប់ថា ប៉ូលិសយក ទៅហើយ ទើបនាងបានសុំកូនត្រឡប់ទៅវិញ ។
ចែករំលែកព័តមាននេះ