មនុស្ស២នាក់ស្លា.ប់អណ្ដែតទឹកនៅកន្លែងផ្សេងគ្នា ក្នុងខេត្តសៀមរាប
ខេត្តសៀមរាប ៖ សាកសពបុរស២នាក់ បានលង់ទឹកស្លា.ប់ នៅកន្លែងផ្សេងគ្នា ក្នុងខេត្តសៀមរាប ខណៈដែលប្រជាពលរដ្ឋបានទៅមើលមង ក៏ប្រទះឃើញ បង្កឱ្យមានការភ្ញាក់ផ្អើល
ខេត្តសៀមរាប ៖ សាកសពបុរស២នាក់ បានលង់ទឹកស្លាប់ នៅកន្លែងផ្សេងគ្នា ក្នុងខេត្តសៀមរាប ខណៈដែលប្រជាពលរដ្ឋបានទៅមើលមង ក៏ប្រទះឃើញ បង្កឱ្យមានការភ្ញាក់ផ្អើលដល់សមត្ថកិច្ច ចុះមកជួយអន្តរាគមន៍ភ្លាមៗផងដែរ។ហេតុការបង្កឱ្យមានការភ្ញាក់ផ្អើលនេះ កើតឡើងនៅ ២កន្លែងផ្សេងគ្នា នៅថ្ងៃទី២០ ខែធ្នូ ឆ្នាំ២០១៦នេះ ស្ថិតនៅចំណុចភូមិសាស្ត្រ ស្រុកក្រឡាញ់ ខេត្តសៀមរាប។
តាមការបំភ្លឺរបស់អ្នកភូមិ និងកូនចៅរបស់ជនរងគ្រោះបានប្រាប់សមត្ថកិច្ចនគរបាលថា ជីតារបស់ខ្ញុំបានផឹកស្រាស្រវឹង តាំងពីព្រឹកបានចេញពីផ្ទះតាំងពីល្ងាចថ្ងៃទី១៨ ខែធ្នូ ឆ្នាំ២០១៦ មកម្លេះដោយមិនដឹងគាត់ទៅណា ហើយក្រុមគ្រួសាររបស់គាត់ក៏បានដើររកដែរ តែរកមិនឃើញ រហូតដល់ព្រឹកថ្ងៃទី២០ ខែធ្នូ ឆ្នាំ២០១៦ ទើបឃើញមានអ្នកភូមិប្រទះឃើញសាកសពអណ្តែតទឹក ខណៈដែលអ្នកភូមិពួកគាត់ បានទៅមើលមង ក៏រត់មកប្រាប់ថា មានអ្នកលង់ទឹកស្លាប់ ពេលនោះក្រុមគ្រួសារ និងប្រជាពលរដ្ឋក៏បាននាំគ្នាទៅមើល ក៏ឃើញស្គាល់ថាជាប្តីគាត់។
ចំណែកខាងអាណាព្យាបាល របស់សាកសពជនរងគ្រោះទី២ បានរៀបរាប់ប្រាប់សមត្ថកិច្ចថា នៅវេលាម៉ោង១០ និង១៥នាទីព្រឹក ថ្ងៃទី២០ ខែធ្នូ ឆ្នាំ២០១៦ ជនរងគ្រោះ(កូន) បានទៅបង់ត្រី នៅប្រឡាយខាងត្បូងភូមិ ពេលកំពុងបង់ប្រហែលកើតជំងឺស្កន់ជ្រូក ពីមុនបានរើឡើង ទើបធ្វើឱ្យជនរងគ្រោះធ្លាក់ទឹក ប្រកាច់ស្លាប់តែម្តងទៅ។ លោកវរសេនីយ៍ត្រី ជី បេងជន អធិការនគរបាលស្តីទីស្រុកក្រឡាញ់បានឱ្យដឹងនៅរសៀលថ្ងៃទី២០ ខែធ្នូ ឆ្នាំ២០១៦នេះថា ជនរងគ្រោះដែលស្លាប់ ទី១/មានឈ្មោះ ចាប ថី ភេទប្រុស អាយុ៥៧ឆ្នាំ មានទីលំនៅក្នុងស្រុកក្រឡាញ់ កើតឡើងស្ថិតនៅត្រង់ចំណុចដងស្ទឹងផ្លាំង ក្នុងភូមិល្បើកប្រិយ៍ ឃុំរោងគោ។ សាកសពជនរងគ្រោះទី២ មានឈ្មោះ អន រ៉ុង ហៅហឿន ភេទប្រុស អាយុ២៨ឆ្នាំ រស់នៅស្រុកក្រឡាញ់ បានកើតឡើងនៅត្រង់ចំណុចប្រឡាយទឹកមួយកន្លែង ស្ថិតនៅតាមបណ្ដោយផ្លូវជាតិលេខ៦៨ ខាងត្បូងភូមិចន្លាស់ដៃ ឃុំចន្លាសដៃ ស្រុកក្រឡាញ់ ខេត្តសៀមរាប។
ក្រោយពីទទួលបានសេចក្តីរាយការណ៍ពីប្រជាពលរដ្ឋសមត្ថកិច្ចនគរបាលស្រុកបានចុះទៅដល់កន្លែងកើតហេតុ ធ្វើការត្រួតពិនិត្យសាកសព ដោយយោងទៅតាមការបំភ្លឺរបស់អាណាព្យាបាល និងអ្នកភូមិព្រមទាំងកូនចៅផងនោះ សមត្ថកិច្ចនគរបាលបានសន្និដ្ឋានថា ជនរងគ្រោះទាំង២នាក់ ពិតជាបានស្លាប់ ដោយសារលង់ទឹកពិតមែន ពីព្រោះនៅលើរូបរាងកាយសាកសពពុំមានស្លាកស្នាមអ្វីដែលគួរឱ្យកត់សម្គាល់ថា ជាករណីឃាតកម្មនោះទេ។ សាកសពទាំង០២នាក់ខាងលើនេះត្រូវបានសមត្ថកិច្ចនគរបាលស្រុកធ្វើកំណត់ហេតុ រួចធ្វើការប្រគល់ជូនក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ