រាជធានីភ្នំពេញ ៖ បុរសដែលជាកម្មករសំណង់ម្នាក់ ត្រូវបានជនមិនស្គាល់អត្តសញ្ញាណម្នាក់រួមនឹងបក្ខពួក បបួលផឹកស្រាជាមួយ អស់កន្លះលីត្រ បន្ទាប់មកបានជិះម៉ូតូឌុបពង្វាងផ្លូវ បង្វែងដានត្រឡប់ចុះត្រឡប់ឡើង បាននិយាយបញ្ចុះបញ្ចូលពង្វក់រហូតភ្លេចភ្លាំងស្មារតី ហើយក្រុមជនសង្ស័យខាងលើ បានលួចយកម៉ូតូ ស៊េរីទំនើប១គ្រឿង ជិះគេចខ្លួនទៅបាត់ស្រមោល។ ចំណែកបុរសរងគ្រោះក្រោយពីជននោះយកម៉ូតូទៅបាត់ ទើបភ្ញាក់ខ្លួន ហើយមានអាការៈទន់ដៃទន់ជើង និងត្រូវបានក្រុមគ្រួសារនាំទៅកាន់គ្លីនិកឯកជនមួយ និងបានដាក់សេរ៉ូមអស់ចំនួន២ប្លោកទើបស្វាង។
ហើយរហូតដល់វេលាម៉ោង៤និង៥០នាទីល្ងាច ថ្ងៃទី១៨ ខែធ្នូ ឆ្នាំ២០១៦ ក៏បានធ្វើដំណើរទៅកាន់ ប៉ុស្ដិ៍នគរបាលចាមចៅ ដាក់ពាក្យបណ្ដឹងសុំឲ្យនគរបាលជួយអន្តរាគមន៍។ បុរសរងគ្រោះខាងលើនោះឈ្មោះ ឌួង នា អាយុ២៥ឆ្នាំ មុខរបរជាកម្មករសំណង់ មានស្រុកកំណើតនៅក្នុងភូមិថ្មដា ឃុំបឹងណាយ ស្រុកព្រៃឈរ ខេត្តកំពង់ចាម និងស្នាក់នៅផ្ទះលេខ៥០៩ ភូមិ១ សង្កាត់ច្រាំងចម្រេះ១ ខណ្ឌឫស្សីកែវ រាជធានីភ្នំពេញ។ ចំណែកម៉ូតូដែលត្រូវបាត់បង់នោះម៉ាក ហុងដាឌ្រីមសេ១២៥ ស៊េរីឆ្នាំ២០១៦ ពណ៌ខ្មៅពាក់ស្លាកលេខ ភ្នំពេញ1FX-3968 ដោយឡែកជនសង្ស័យមានគ្នា២ទៅ៣នាក់។
បុរសនោះបានប្រាប់ឲ្យនគរបាលដឹងថា នៅវេលាព្រឹកថ្ងៃទី១៧ ខែធ្នូ ឆ្នាំ២០១៦ មុនពេលកើតហេតុខ្លួន បានអូសម៉ូតូចេញពីផ្ទះ ក្នុងបំណងជិះទៅធ្វើការសំណង់ ស្រាប់តែខណៈនោះម៉ូតូបានបែកកង់ ខ្លួនក៏បានយកទៅប៉ះ និងមិនបានទៅធ្វើការនោះទេ ព្រោះខកម៉ោងទៅហើយ ក៏បានជិះម៉ូតូយកទៅទុក នៅក្នុងផ្ទះវិញ។ លុះដល់វេលម៉ោង៣រសៀល ថ្ងៃដដែលខ្លួនបានដើរចេញពីផ្ទះ ទៅកាន់បន្ទប់ជួលអ្នកស្គាល់គ្នា ខណៈនោះស្រាប់តែលេចមុខជនសង្ស័យ ហើយបានសួរនាំរាក់ទាក់ជាមួយខ្លួន និងបានចាក់ស្រាឲ្យខ្លួនផឹក ធ្វើដូចជាធ្លាប់ស្គាល់គ្នាពីមុនមកអញ្ចឹង ហើយបន្ទាប់ពីផឹកស្រាអស់កន្លះលីត្រ ខ្លួនមានអារម្មណ៍ថា ដូចជារវើរវាយ។
បន្ទាប់មកទៀតជននោះឲ្យខ្លួនទៅយកម៉ូតូគេជិះ និងបានទះស្មាខ្លួន១ដៃថែមទៀត ទើបធ្វើឲ្យខ្លួនរឹតតែលែងដឹងអី និងបានដើរទៅយកម៉ូតូឲ្យជននោះជិះដោយមិនដឹងខ្លួនឡើយ។ បុរសនោះបានប្រាប់នគរបាលបន្តទៀតថា ក្រោយពេលបានម៉ូតូជននោះ បាននាំខ្លួនទៅកាន់កន្លែងជាងជួសជុលម៉ូតូមួយកន្លែង និងបានឲ្យខ្លួនដោះកាងក្រោយ បញ្ចាំយកលុយទិញថ្នាំញៀនបានមួយចំនួនយកទៅប្រើប្រាស់រួច ទើបជននោះជិះឌុបរូបគេតាមផ្លូវវាងវិលចុះវិលឡើង ពេញរាជធានីភ្នំពេញ រហូតដល់ម៉ោង៤និង៣០នាទី ទាបភ្លឺថ្ងៃទី១៨ ខែធ្នូ ទើបដឹកខ្លួនទៅកាន់ផ្ទះជួល មួយកន្លែងមានទីតាំងស្ថិតនៅ ក្នុងភូមិអង្គ សង្កាត់ចោមចៅ ខណ្ឌពោធិ៍សែនជ័យ។
ដោយជននោះប្រាប់ថាជាផ្ទះបងប្រុសរបស់គេ (ជនសង្ស័យ)ពេលទៅដល់ទីនោះជនសង្ស័យ បានទុកម៉ូតូនៅជិតហាងកាហ្វេរួចបាននាំខ្លួនឡើងទៅលើផ្ទះជួលមួយនោះ ហើយខណៈនោះខ្លួនវង្វេងវង្វាន់ស្មារតីដូចជាត្រូវថ្នាំ ដោយឡែកជនសង្ស័យក៏បាន លួចយកម៉ូតូជិះទៅបាត់ស្រមោល។ ក្រោយមកទើបដឹងខ្លួនថា ជននោះគឺជាចោរហើយខ្លួនបាន ខលប្រាប់ក្រុមគ្រួសារ យកទៅកាន់មន្ទីរពេទ្យដាក់សេរ៉ូមអស់២ប្លោក ទើបស្វាង និងបានធ្វើដំណើរ ទៅប្ដឹងនគរបាលប៉ុស្ដិ៍ចោមចៅឲ្យជួយអន្តរាគមន៍តែម្ដង។
នគរបាលបាននិយាយថា ចំពោះករណីនេះគឺសង្ស័យថា ជនរងគ្រោះចាញ់ល្បិចការលួងលោមរបស់ជនរបស់គេ ដែលវាដូចគ្នាទៅនឹងសកម្មភាពទម្លាក់យោង យកមាសដូរកាឡៃដូច្នេះដែរ មិនមានការទះស្មាណាមួយត្រូវថ្នាំសណ្ដំនោះឡើយ ការដែលជនរងគ្រោះដាក់សេរ៉ូមនោះ គឺព្រោះតែក្រោយពេលដឹងថាបាត់ម៉ូតូ ខ្លាចក្រុមគ្រួសារស្ដីបន្ទោស ជនរងគ្រោះរូបនោះមានការតក់ស្លុត ទើបទន់ដៃទន់ជើងហើយថាត្រូវថ្នាំទៅវិញ ម្យ៉ាងទៀតសង្ស័យថា ក្នុងពេលទៅប្ដឹងនោះជនរងគ្រោះនិយាយប្រាប់មិនអស់សាច់រឿងថែមទៀតផង៕
ចែករំលែកព័តមាននេះ