ឃាត់ជនសង្ស័យជួញដូរគ្រឿងញៀ.ន២នាក់ ដកហូតបាន៣០កញ្ចប់
រាជធានីភ្នំពេញ ៖ ជនសង្ស័យជួញដូរគ្រឿងញៀ.ន២នាក់ ត្រូវបានសមត្ថកិច្ចនគរបាលខណ្ឌជ្រោយចង្វារ ឃាត់ខ្លួនកាលពីវេលាម៉ោង១និង៥០នាទីរសៀល ថ្ងៃទី១៨ ខែធ្នូ
រាជធានីភ្នំពេញ ៖ ជនសង្ស័យជួញដូរគ្រឿងញៀន២នាក់ ត្រូវបានសមត្ថកិច្ចនគរបាលខណ្ឌជ្រោយចង្វារ ឃាត់ខ្លួនកាលពីវេលាម៉ោង១និង៥០នាទីរសៀល ថ្ងៃទី១៨ ខែធ្នូ ឆ្នាំ២០១៦ នៅមុខចំណុចបញ្ជាការដ្ឋានកងទ័ពជើងទឹក នៅតាមបណ្តោយផ្លូវជាតិលេខ៦ ក្នុងភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ ដោយដកហូតបានគ្រឿងញៀនចំនួន៣០កញ្ចប់។ ជនសង្ស័យដែលត្រូវឃាត់ខ្លួន ១-ឈ្មោះ ផៃ សុភី ភេទប្រុស អាយុ២៥ឆ្នាំ មានទីលំនៅភូមិពាមអំពិល ឃុំរាប ស្រុកពារាំង ខេត្តព្រៃវែង និង២-ឈ្មោះ គុជ សី ភេទប្រុស អាយុ២២ឆ្នាំ មានទីលំនៅភូមិចុងក្រូច ឃុំរាប ស្រុកពារាំង ខេត្តព្រៃវែង។
នៅពេលឃាត់ខ្លួន ដកហូតបានថ្នាំញៀន៣០កញ្ចប់ និងម៉ូតូ១គ្រឿង ម៉ាកហុងដាឌ្រីម សេ១២៥ ស៊េរី២០១២ ពណ៌ខ្មៅ ពាក់ស្លាកលេខ កណ្តាល1N-5387។ តាមនគរបាលខណ្ឌជ្រោយចង្វារបានឲ្យដឹងថា នៅវេលារសៀលថ្ងៃចាប់ខ្លួន កម្លាំងនគរបាលអន្តរាគមន៍ខណ្ឌបានជិះល្បាតនៅក្នុងមូលដ្ឋានតាមផ្លូវជាតិលេខ៦ ដើម្បីទប់ស្កាប់បទល្មើសបានប្រទះឃើញជនសង្ស័យ២នាក់ ជិះម៉ូតូមួយគ្រឿង។ ដោយមានការសង្ស័យក៏បានហៅត្រួតពិនិត្យ ឆែកឆេររកឃើញគ្រឿងញៀនប្រភេទក្រាមពណ៌សថ្លា ចំនួន៣០កញ្ចប់ ហើយឃាត់ខ្លួនសាកសួរតែម្តង។
តាមជនសង្ស័យទាំង២នាក់បានសារភាពថា ខ្លួនត្រួវបានគេប្រើឲ្យមកទិញគ្រឿងញៀននៅម្តុំផ្លូវរថភ្លើងក្បែររោងចក្រឆ្នាំង ស្ថិតក្នុងសង្កាត់បឹងកក់២ ខណ្ឌទួលគោកដើម្បីយកទៅចែកចាយនៅស្រុកកំណើត ដោយគេឲ្យតម្លៃ ៥ម៉ឺនរៀលក្នុងមួយជើង។នៅពេលត្រឡប់មកពីទិញវិញត្រូវសមត្ថកិច្ចឆែកឆេរឃើញក៏ឃាត់ខ្លួន៕
ចែករំលែកព័តមាននេះ