ជំងឺអុតស្វាយគឺជាការបង្ករោគដោយវីរុសមួយប្រភេទ ដែលបណ្តាលឲ្យមានកន្តួលរមាស់ និងពងបែក ។ ជំងឺនេះមានការឆ្លងខ្លាំងណាស់ជាពិសេសអ្នកដែលមិនទាន់កើត …
ជំងឺអុតស្វាយគឺជាការបង្ករោគដោយវីរុសមួយប្រភេទ ដែលបណ្តាលឲ្យមានកន្តួលរមាស់ និងពងបែក ។ ជំងឺនេះមានការឆ្លងខ្លាំងណាស់ជាពិសេសអ្នកដែលមិនទាន់កើតជំងឺនេះ និងអ្នកមិនទាន់បានចាក់វ៉ាក់សាំងការពារ។ ជាក់ស្តែងកាលពីពេលថ្មីនេះស្ត្រីមានផ្ទៃពោះជិតគ្រប់ខែម្នាក់រស់នៅខេត្តស្វាយរៀង បានកើតមានជំងឺអុតស្វាយ ហើយបានបណ្តាលឲ្យទារកក្នុងផ្ទៃស្លាប់ផងដែរ ។
លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានប្រាប់កោះសន្តិភាពឲ្យដឹងថា ស្ត្រីមានផ្ទៃពោះគួរតែធ្វើការថែរក្សាសុខភាពខ្លួនឲ្យបានល្អ ជាពិសេសរាល់អ្នកជំងឺណាក៏ដោយ ស្ត្រីមានផ្ទៃពោះមិនគួរទៅឈរក្បែរ ឬសួរសុខទុក្ខឡើយព្រោះស្ត្រីមានផ្ទៃពោះងាយនឹងទទួលរងនូវការចម្លងខ្លាំងបំផុត ដែលធ្វើឲ្យប៉ះពាល់ទៅដល់ទារកនៅក្នុងផ្ទៃ ជាក់ស្តែងដូចជាជំងឺអុតស្វាយជាដើម ។
លោកវេជ្ជបណ្ឌិតបានបន្តទៀតថា ជំងឺអុតស្វាយ បើសិនជាកើតមាននៅលើស្ត្រីមានផ្ទៃពោះក្នុងត្រីមាសទី១ ឬទី២នោះ នឹងមិនមានបញ្ហាធ្ងន់ធ្ងរនោះទេ ប៉ុន្តែបើសិនជាជំងឺនេះកើតមាននៅលើស្ត្រីជិតឆ្លងទន្លេមុន១ឬ២សប្តាហ៍នោះអាចនឹងបណ្តាលឲ្យកើតមានបញ្ហាធ្ងន់ធ្ងរដូចជា ៖ -អាចបណ្តាលឲ្យទារកស្លាប់, -អាចបណ្តាលឲ្យទារកកើតមកមានជំងឺអុតស្វាយ, -បើសិនជាទារកមានជីវិតរស់ ក៏អាចបណ្តាលឲ្យទារកមានសុខភាពខ្សោយងាយនឹងទទួលរងនូវការឆ្លងនូវជំងឺផ្សេងៗ ។
លោកវេជ្ជបណ្ឌិតបានបន្តថា ដើម្បីការពារការស្លាប់របស់ទារកខណៈពេលម្តាយកើតមានជំងឺអុតស្វាយ ស្ត្រីដែលមានផ្ទៃពោះគ្រប់រូបគួរតែធ្វើការចាក់វ៉ាក់សាំង ឬក៏ទៅត្រួតពិនិត្យផ្ទៃពោះយ៉ាងតិចឲ្យបាន៤ដង ។ ការចាក់វ៉ាក់សាំងការពារជំងឺអុតស្វាយក្នុងពេលមានផ្ទៃពោះមិនបណ្តាលឲ្យកើតមានផលប៉ះពាល់នោះទេ ។
សូមបញ្ជាក់ថា ការឆ្លងជំងឺអុតស្វាយ ច្រើនត្រូវការពេលយ៉ាងយូរបំផុត៥ទៅ១០ថ្ងៃ ទើបចេញជារោគសញ្ញា ហើយសញ្ញាដែលបញ្ជាក់ច្បាស់ថាជាជំងឺអុតស្វាយនោះ គឺការកើតជាកន្តួលលើស្បែក ។ រោគសញ្ញាផ្សេងៗទៀត ប្រហែលជាកើតមានក្នុងរយៈពេលមួយទៅពីរថ្ងៃមុនពេលចេញកន្តួលដូចជា ៖ -ក្តៅខ្លួន, -មិនឃ្លានអាហារ, -ឈឺក្បាល, -អស់កម្លាំង និងមានអារម្មណ៍ថាល្ហិតល្ហៃ, -មានស្នាមកន្តួលលេចចេញជាពណ៌ផ្កាឈូក ឬក្រហម ដែលកើតបែបនេះរយៈពេលច្រើនថ្ងៃ, -មានពងបែកមុនមួយថ្ងៃ និងអាចបែកពងទឹកនោះទៀត, -កើតជាកមរមាស់ គ្របពីលើពងបែកដែលបែករួចនោះ និងត្រូវការពេលច្រើនថ្ងៃ ដើម្បីឲ្យកមរមាស់នោះជាសះស្បើយវិញ ៕
ចែករំលែកព័តមាននេះ