កំពុងផ្ទេរសាំងដាក់ដប ស្របពេលប្អូនបើកហ្គាសដាំបាយ ផ្ទុះឆាបឆេះអស់៤លានរៀល
- កំពង់ឆ្នាំង
តូបលក់សាំងមួយកន្លែង ត្រូវបានអគ្គិភ័យឆាបឆេះ បណ្ដាលឲ្យម្ចាស់តូបរងរបួសស្រាលដោយសារការរលាកភ្លើង បង្កឱ្យមានការភ្ញាក់ផ្អើលកាលពី
ខេត្តកំពង់ឆ្នាំង ៖ តូបលក់សាំងមួយកន្លែង ត្រូវបានអគ្គិភ័យឆាបឆេះ បណ្ដាលឲ្យម្ចាស់តូបរងរបួសស្រាលដោយសារការរលាកភ្លើង បង្កឱ្យមានការភ្ញាក់ផ្អើលកាលពីវេលាម៉ោង១០និង៣០នាទីព្រឹក ថ្ងៃទី៧ ខែកក្កដា ឆ្នាំ២០២២ នៅលើទំនប់បារាំងសត្វ ស្ថិតក្នុងភូមិកណ្ដាល សង្កាត់ផ្សារឆ្នាំង ។ ហើយអគ្គិភ័យនេះ គឺកើតឡើងដោយសារតែការធ្វេសប្រហែសរបស់ម្ចាស់តូបលក់ដូរ និងធ្វើឱ្យខូចខាតសម្ភារៈប្រហែល៤លានរៀលទៀតផង។
បើតាមស្ត្រីឈ្មោះ បៀន ស្រីភាស់ អាយុ២៨ឆ្នាំ ជាម្ចាស់តូបលក់ដូរ បានរាយការណ៍ប្រាប់សមត្ថកិច្ចថា គាត់មានទីលំនៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង ប៉ុន្តែបានមកប្រកបមុខរបរលក់ដូរនៅលើទំនប់បារាំង ដូចជា លក់សាំង លក់ស្រាបៀរ និងភេសជ្ជៈជាដើម។
ស្ត្រីម្ចាស់តូបបន្តថា នៅមុនពេលកើតហេតុ គាត់កំពុងតែផ្ទេរសាំងចេញពីប៊ីដុង ចូលទៅក្នុងដប ស្របពេលជាមួយគ្នានោះ ប្អូនស្រីរបស់គាត់បានដាក់ឆ្នាំងដាំបាយចង្ក្រានហ្គាស នៅក្នុងតូបដែលមានចម្ងាយប្រមាណ៣ម៉ែត្រពីគ្នា ក៏ស្រាប់តែឆាបឆេះមកដល់សាំងគាត់ដែលកំពុងចាក់ បណ្ដាលឲ្យផ្ទុះឆេះតែម្ដង ។
ប្រភពដដែលបន្តថា ភ្លាមៗនោះ គាត់បានស្រែកហៅឲ្យគេជួយ និងនាំគ្នារត់ចេញពីតូប ហើយអណ្ដាតក៏បានឆាបឆេះសម្ភារៈលក់ដូរតែម្ដង ។ ចំពោះសម្ភារៈដែលខូចខាតមានដូចជា ឆេះសាបៀរអស់៤កេស, ភេសជ្ជៈ៣កេស, ធុងហ្គាស១២គីឡូក្រាម១ធុង, លុយ១លានរៀល ដែលសរុបជាទឹកប្រាក់ទាំងធុងទឹកកក និងសម្ភារៈផងនោះ គឺអស់ប្រមាណ៤លានរៀល ។
ក្រោយពេលកើតហេតុ សមត្ថកិច្ចបានធ្វើការពិនិត្យ និងធ្វើកោសល្យវិច័យ ហើយក៏បានសន្និដ្ឋានថា ម្ចាស់តូបលក់ដូរខាងលើ មានការធ្វេសប្រហែសដែលផ្ទេរសាំងចូលដប ហើយមានអ្នកបើកហ្គាសដាំបាយនៅក្បែរនោះទៀត ដោយមិនបានប្រុងប្រយ័ត្ន ទើបបណ្ដាលឱ្យភ្លើងឆាបឆេះបែបនេះឡើងតែម្តង៕
ចែករំលែកព័តមាននេះ