លោកវេជ្ជបណ្ឌិត សុខ គង់ អនុប្រធានមន្ទីរពេទ្យបង្អែកខេត្តកំពង់ឆ្នាំង និងជាប្រធានអគារជំងឺកុមារ នៅព្រឹកថ្ងៃទី០៦ ខែកក្កដា ឆ្នាំ២០២២ នេះ បានឱ្យដឹងថា
ខេត្តកំពង់ឆ្នាំង ៖ លោកវេជ្ជបណ្ឌិត សុខ គង់ អនុប្រធានមន្ទីរពេទ្យបង្អែកខេត្តកំពង់ឆ្នាំង និងជាប្រធានអគារជំងឺកុមារ នៅព្រឹកថ្ងៃទី០៦ ខែកក្កដា ឆ្នាំ២០២២ នេះ បានឱ្យដឹងថា តាមរបាយការណ៍បូកសរុបរបស់អគារជំងឺកុមារ គិតចាប់តាំងពីសប្តាហ៍ទី១៥ ក្នុងខែមេសា រហូតដល់សប្ដាហ៍ទី២៧ ក្នុងខែកក្កដានេះ មានរយៈពេល១២សប្តាហ៍ មន្ទីពេទ្យបង្អែកខេត្តកំពង់ឆ្នាំង ផ្នែកអគារជំងឺកុមារ បានទទួលព្យាបាលកុមារដែលមានជំងឺគ្រុនឈា.មចំនួន៦៣នាក់ ក្នុងនោះ ៦០ នាក់ បានព្យាបាលជាសះស្បើយត្រឡប់ទៅផ្ទះវិញ និងចំនួន៣នាក់ មានអាការៈធ្ងន់ធ្ងរបានបញ្ជូនទៅមន្ទីរពេទ្យក្នុងក្រុងភ្នំពេញ ។
លោកអនុប្រធានមន្ទីរពេទ្យបង្អែកខេត្តកំពង់ឆ្នាំង លោកវេជ្ជបណ្ឌិត សុខ គង់ បានបញ្ជាក់ទៀតថា ជំងឺគ្រុនឈា.មកុមារខាងលើនេះ ដំបូងឃើញនៅក្នុងឃុំច្រណូក បន្ទាប់មកក៏កើតមាននៅឃុំស្វាយរំពារ និងឃុំកំពង់ហៅ ក្នុងស្រុកកំពង់លែង ។ ជំងឺគ្រុនឈា.មនេះ ក៏អាចកើតលើមនុស្សធំពេញវ័យ និងមនុស្សវ័យចំណាស់ផងដែរ ដែលសុទ្ធតែមានប្រភពចម្លងមកពីសត្វមូសខ្លាខាំ ។
លោកវេជ្ជបណ្ឌិត សុខ គង់ បានបញ្ជាក់ពីជំងឺគ្រុនឈា.មនេះថា ៖ ចាប់ដំបូងឡើង កុមារមាន អាការៈក្តៅខ្លួនខ្លាំង មានរយៈពេលពី៣ទៅ៤ថ្ងៃ ដែលតម្រូវឱ្យអាណាព្យាបាលទៅរកសេវាព្យាបាលពីគ្រូពេទ្យដែលមានជំនាញច្បាស់លាស់នៅក្នុងមូលដ្ឋាន ឬនៅតាមមណ្ឌលសុខភាព ដែលនៅជិតផ្ទះ តែបើសង្ស័យថា៖ មានជំងឺគ្រុនឈា.ម ត្រូវបញ្ជូនមកកាន់មន្ទីរពេទ្យបង្អែកខេត្ត ។
ចំណែកបើការព្យាបាលនៅមូលដ្ឋានក្នុងរយៈពេល៣ទៅ៤ថ្ងៃមិនថមថយកំដៅទេនោះ ជំងឺនេះអាចនឹងធ្ងន់ធ្ងរ ដែលតម្រូវបញ្ជូនទៅកាន់មន្ទីរពេទ្យខេត្ត ហើយបើសិនធ្ងន់ធ្ងរ មន្ទីរពេទ្យ នឹងបន្តបញ្ជូនទៅមន្ទីររាជធានីភ្នំពេញបន្តទៀត ព្រោះមានឧបករណ៍ព្យាបាលទំនើបៗសម្រាប់ព្យាបាល ដូចករណីកុមារ៣នាក់មានសភាពធ្ងន់ធ្ងរ គឺត្រូវបានបន្តបញ្ជូនទៅព្យាបាលនៅមន្ទីរក្រុងភ្នំពេញ ផងដែរ។
ចំពោះករណីកុមារកើតជំងឺគ្រុនឈា.មធ្ងន់ធ្ងរ គឺដោយសារតែ ឪពុកម្តាយ ឬ អាណាព្យាបាលទុកកូនមានជំងឺនៅផ្ទះយូរពេក មិនប្រញាប់បញ្ជូនកូនទៅកាន់មណ្ឌលសុខភាព ឬមន្ទីរពេទ្យឱ្យបានឆាប់រហ័ស ។ ក្នុងនាមជាគ្រូពេទ្យ លោកវជ្ជបណ្ឌិត សូមអំពាវនាវដល់មាតា បីតា អាណាព្យាបាល ត្រូវអនុវត្តវិធានការការពារពីសត្វមូសខ្លាខាំ គឺត្រូវឱ្យកុមារដេកក្នុងមុង ជាពិសេសការដេកពេលថ្ងៃ ។
ជុំវិញបរិវេណផ្ទះ ត្រូវធ្វើអនាម័យកុំឲ្យមានទឹកដក់ តាមថ្លុក តាមសំបកដប តាមសំបកកំប៉ុងជាដើម ព្រោះមានទឹកដក់ថ្លា វាជាជម្រក និងបន្តពូជរបស់សត្វមូសខ្លា ដែលជាភ្នាក់ងារចម្លងជំងឺគ្រុនឈា.ម ៕
ចែករំលែកព័តមាននេះ