រាជធានីភំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានផ្តាំដល់កីឡាករដែលចូលរួមប្រកួតប្រជែងស៊ីហ្គេម នៅប្រទេសឥណ្ឌូនេស៊ីខាងមុខនេះ កុំប្រើប្រាស់សារជាតិដែលជំនួយកំលាំងដែលត្រូវបានគេហាមឃាត់ក្នុងការប្រកួតឲ្យសោះ ។ សម្តេចតេជោ…
រាជធានីភំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានផ្តាំដល់កីឡាករដែលចូលរួមប្រកួតប្រជែងស៊ីហ្គេម នៅប្រទេសឥណ្ឌូនេស៊ីខាងមុខនេះ កុំប្រើប្រាស់សារជាតិដែលជំនួយកំលាំងដែលត្រូវបានគេហាមឃាត់ក្នុងការប្រកួតឲ្យសោះ ។
សម្តេចតេជោ បានថ្លែងក្នុងសំណេះសំណាលក៏ដូចជា ផ្តល់នូវដំបូន្មានមួយចំនួនជូនដល់គណៈប្រតិភូកីឡា អាស៊ានប៉ារ៉ាហ្គេម (ASEAN Para Games) មុននឹងពួកគេចេញទៅប្រកួតកីឡាពិការអាស៊ាន ឬអាស៊ានប៉ារ៉ាហ្គេម លើកទី១១ នៅទីក្រុងសូឡូ ប្រទេសឥណ្ឌូនេស៊ី នៅវិមានសន្តិភាព នៅថ្ងៃទី៦ ខែកក្កដានេះថា ៖«យើងធ្លាប់ធ្វើជាម្ចាស់ផ្ទះនៃការប្រកួតបាល់ទះជនពិបារកម្រិតពិភពលោកនៅភ្នំពេញកន្លងមក ទោះបីថា ចំណាក់ថ្នាក់មិនល្អសម្រាប់យើងបានត្រឹមលេខ៣ ឬលេខ៤ ប៉ុន្តែលេខនេះក៏បង្ហាញថា កម្ពុជាជាប្រទេសមិនអន់ទេ ក្នុងចំណោម ប្រទេសជាច្រើន ដែលមានបាល់ទះក្នុងពិភពលោក» ។
សម្តេចក៏បានសម្តែងក្តីសង្ឃឹមថា កីឡាករបាល់ទះទាំងស្ត្រី បុរសនឹងទទួលបានលទ្ធផលល្អនៅក្នុងការប្រកួតផារ៉ាហ្គាម សម្រាប់ជនពិការនៅប្រទេសឥណ្ឌូនេស៊ី ។
ជាមួយគ្នានោះដែរ សម្តេចតេជោ បានស្នើដល់កីឡាករទាំងអស់ត្រូវតែគោរពលក្ខខណ្ឌនៃការប្រកួតដោយជៀសវៀងការបំពានណាមួយលើលក្ខខណ្ឌន្តិកៈនៃការប្រកួត ។
សម្តេចក៏បានគូសបញ្ជាក់ថា ៖«ត្រូវជៀងវាងដាច់ខានកុំឲ្យមានការប្រើប្រាស់នូវសារធាតុដែលមានការហាមឃាត់សម្រាប់ផ្នែកកីឡាដែលចំណុចនេះធ្វើឲ្យបានបាត់បង់កិត្តយសជាតិ ។ មេដាយមាស មេដាយប្រាក់ ឬអត់មេដាយ អត់សំខាន់ទេ តែការបំផ្លាញដោយការប្រើប្រាស់ ដោយសារធាតុដែលហាមឃាត់ គឺជាការបំផ្លាញមុខមាត់ប្រទេសជាតិដ៏ធំ» ។
សម្តេចបន្ថែមមេដាយដែលក្រុមកម្ពុជាបានទទួលមិនគ្រប់គ្រាន់ ដើម្បីប៉ះប៉ូវចំពោះមុខមាត់ដែលខូចខាតដែលបានប្រើប្រាស់សារធាតុញៀន និងសារធាតុដែលត្រូវហាមឃាត់ ក្នុងវិស័យកីឡានោះទេ ។
ជាមួយគ្នានោះដែរ សម្តេចក៏បានយល់ព្រមក្នុងការដឹកកីឡាករកម្ពុជាតាមយន្តហោះពិសេសទៅប្រទេសឥណ្ឌូនេស៊ី ដើម្បីចូលរួមប្រកួតផងដែរ ។
សម្តេចបញ្ជាក់ថា ៖«យើងធ្វើបែបនេះ ដើម្បីកុំឲ្យកីឡាករកីឡាការិនីធ្វើដំណើរច្រើនដំណាក់កាល ហើយថវិកាសម្រាប់ទិញសំបុត្រយន្តហោះត្រូវបង្វែរមកបង់សម្រាប់ថ្លៃយានយន្តដែលយើងត្រូវជិះ ឬអាចមានការឧបត្ថម្ភពីក្រុមអាកាសចរណ៍ណាមួយ» ។
សូមជម្រាបថា ការប្រកួតកីឡាពិការអាស៊ាន ឬអាស៊ានប៉ារ៉ាហ្គេម ដែលជា ការប្រកួតរវាងកីឡាករ កីឡាការិនី ជាជនពិការក្នុងចំណោមប្រទេសសមាជិកអាស៊ាន ត្រូវបានធ្វើឡើងជាទៀងទាត់រៀងរាល់២ឆ្នាំម្តង ។ ការប្រកួតបានធ្វើចំនួន១០លើករួចមកហើយ ប៉ុន្តែនៅឆ្នាំ២០១៩ ការប្រកួតដែលគ្រោងធ្វើឡើងនៅប្រទេសហ្វីលីពីនត្រូវបានខកខានដោយសារតែ វិបត្តិជំងឺកូវីដ១៩ ។
ដោយឡែកការប្រកួតលើកទី១១នេះ តាមពិតត្រូវធ្វើនៅប្រទេសវៀតណាម តែវៀតណាមសុំលើកពេលក្រោមហេតុផលវិបត្តិជំងឺកូវីដ១៩ ទើបលើកទៅរៀបចំនៅប្រទេសឥណ្ឌូនេស៊ីជំនួសវិញ ។ ក្នុងព្រឹត្តិការណ៍ប្រកួតអាស៊ានប៉ារ៉ាហ្គេមលើកទី១១នេះ កម្ពុជាបញ្ជូនប្រតិភូកីឡាចូលរួមសរុប ១១៦នាក់ ។ ក្នុងនោះមានអត្តពលិក ១១៥នាក់ និងប្រតិភូកីឡា គ្រូបង្វឹក គ្រូជំនួយចំនួន៣៩នាក់ មន្ត្រីបច្ចេកទេសចំនួន ៧នាក់ និងប្រតិភូជាតិចំនួន៥នាក់ ។
កម្ពុជាបញ្ជូនអត្តពលិកចូលរួមប្រកួតលើប្រភេទកីឡាចំនួន១១កីឡា រួមមាន ៖ វាយកូនឃ្លីលើតុលើកទម្ងន់ អត្តពលកម្ម ហែលទឹក បាល់ទះអង្គុយបុរសនារី បាល់បោះជនពិការភ្នែក បាល់ទាត់៧ម្ខាង បាល់បោះជិះរទេះបុរសនារី បូស្យា វាយសី និងអុក ។
ក្រុមប្រតិភូកីឡាប៉ារ៉ាហ្គេមកម្ពុជានឹងចេញដំណើរទៅប្រកួតនៅថ្ងៃទី២៤ ខែកក្កដា ឆ្នាំ២០២២ ខាងមុខនេះ ៕
ចែករំលែកព័តមាននេះ