ខេត្តមណ្ឌលគិរី ៖ ប័ណ្ណកម្មសិទ្ធិដីធ្លីឬប្លង់រឹងចំនួនជាង៤ពាន់ក្បាលដី ត្រូវបានមន្ត្រីជំនាញប្រគល់ជូនប្រជាពលរដ្ឋ ហើយនៅសល់ប្រមាណជា២ពាន់ក្បាលដីទៀត មន្ទីរកំពុងអនុវត្តបន្ត ដើម្បីឱ្យប្រជាពលរដ្ឋម្ចាស់ដីទទួលបានប័ណ្ណកម្មសិទ្ធិអាចយកទៅប្រើប្រាស់ តាមតម្រូវការពិសេសកាត់បន្ថយទំនាស់ដីធ្លី ។
ប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តមណ្ឌលគិរី លោក លឹម ចាន់សូភី មានប្រសាសន៍ថា រាជរដ្ឋាភិបាលកម្ពុជាបានធ្វើកំណែទម្រង់លើវិស័យដីធ្លីជូនពលរដ្ឋ និង បានដាក់ចេញនូវយុទ្ធនាការវាស់វែងដីធ្លី ដើម្បីផ្តល់កម្មសិទ្ធិជូនប្រជាពលរដ្ឋដែលជាគោលនយោបាយចាស់សកម្មភាពថ្មីលើវិស័យដីធ្លីក្នុងគោលបំណងការពារប្រយោជន៍របស់ប្រជាពលរដ្ឋ។
លោកបន្តថា ដើម្បីចូលរួមអនុវត្តយុទ្ធសាស្ត្ររបស់ប្រមុខរាជរដ្ឋាភិបាលលើកំណើនសេដ្ឋកិច្ចជាតិ បង្កើនជីវភាពប្រជាពលរដ្ឋ ការអភិវឌ្ឍន៍វិស័យដីធ្លីនៅក្នុងខេត្តមណ្ឌលគិរី មន្ទីររៀបចំដែនដីនគររូបនីយកម្ម សំណង់ និងសុរិយោដីខេត្តមណ្ឌលគិរី បានចូលរួមបំពេញបេសកកម្មរបស់ខ្លួនយ៉ាងខ្លាំងក្លាលើការចុះបញ្ជីដីធ្លីជូនប្រជាពលរដ្ឋ ចុះបញ្ជីដីសហគមន៍ជនជាតិដើមភាគតិច ការរៀបចំដីធ្លីលក្ខណៈជាប្រព័ន្ធតាមដំណាក់កាលជូនដល់ប្រជាពលរដ្ឋប្រកបដោយការយកចិត្តទុកដាក់ និងការទទួលខុសត្រូវ ដោយសមធម៌ និងតម្លាភាព ។
លោកបន្តទៀតថា រហូតដល់បច្ចុប្បន្ននេះ មន្ទីររៀបចំដែនដីបានចុះបញ្ជីដីធ្លីជូនប្រជាពលរដ្ឋនៅទូទាំងខេត្តមណ្ឌលគិរី សរុបជាង៤ពាន់ក្បាលដីហើយនៅសល់ប្រហែលជាង២ពាន់ក្បាលដីប៉ុណ្ណោះ គ្រប់តាមផែនការថ្នាក់ជាតិ ។ ការអភិវឌ្ឍន៍វិស័យដីធ្លីនៅខេត្តមណ្ឌលគីរីនេះរាជរដ្ឋាភិបាលក៏ដូចជាក្រសួងរៀបចំដែនដីបានផ្ដល់អនុសាសន៍ហើយជាពិសេសក្នុងសូចនាករ នៅលើមុំយុទ្ធសាស្ត្រចតុកោណរបស់រាជរដ្ឋាភិបាលនេះ គឺបានផ្ដោតមុំមួយនៃយុទ្ធសាស្ត្រចតុកោណរដ្ឋាភិបាលគឺវិស័យរៀបចំដែនដីនគរូបនីយកម្មនេះឯង ចឹងដើម្បីផ្ដោតទៅលើនេះក្រសួងរៀបចំដែនដីបានកំណត់ពេលដែលជាសូចនាករ សំខាន់ៗគឺបញ្ហាចម្បងទី១ ការចុះបញ្ជីដីធ្លីជូនបងប្អូនប្រជាពលរដ្ឋនៅក្នុងដោយក្រសួងដែនដីបានកំណត់នៅឆ្នាំ ២០២២នេះ យើងនឹងចុះបញ្ជីក្បាលដីជូនបងប្អូនប្រជាពលរដ្ឋសរុបនៅទូទាំងប្រទេសឲ្យបាន ៧លានក្បាលដី។
បច្ចុប្បន្ននេះ យើងបាន៩០%ជាង ហើយបាន៦លានជាង។ ដោយឡែក នៅខេត្តមណ្ឌលគិរីនេះគឺបាន ប្រមាណជា៤ពាន់ក្បាល ដែល យើងប៉ាន់ប្រមាណនៅខេត្តនេះសរុបជាង៦ពាន់ក្បាលដី ចឹង នៅសល់ប្រហែលជាង២ពាន់» ។
លោកញ្ជាក់ទៀតថា ការចុះបញ្ជីដីធ្លីពិតជាមានសារប្រយោជន៍ណាស់ សម្រាប់ប្រជាពលរដ្ឋព្រោះកាលណាប្រជាពលរដ្ឋទទួលបានកម្មសិទ្ធិកាន់កាប់ដីធ្លីនោះបញ្ហាទំនាស់ដីធ្លីនឹងត្រូវបានកាត់បន្ថយម្យ៉ាងទៀត ប្រជាពលរដ្ឋនឹងក្លាយជាម្ចាស់ដីពិតប្រាកដទៅតាមច្បាប់ ហើយមានលទ្ធភាពគ្រប់គ្រាន់ក្នុងការពង្រីករបរកសិកម្មឬមុខរបរផ្សេងទៀតលើដីកម្មសិទ្ធិនេះដែលជួយជំរុញដល់កំណើនសេដ្ឋកិច្ចកាត់បន្ថយភាពក្រីក្របានមួយកម្រិតថែមទៀត។
សូមបញ្ជាក់ថា ការចុះបញ្ជីដីធ្លី នៅកម្ពុជាមានពីរប្រភេទ គឺ៖១-ការចុះបញ្ជីដាច់ដោយដុំ គឺជាការចុះបញ្ជីតាមការស្នើសុំរបស់ម្ចាស់ដី និងទី២-ការចុះបញ្ជីដោយប្រព័ន្ធ គឺជាការចុះបញ្ជីតាម គម្រោង ឬផែនការរបស់រដ្ឋ ៕
ចែករំលែកព័តមាននេះ