ក្រុមប្រឹក្សាឃុំសង្កាត់ថ្មី ចូលកាន់តំណែង
ខេត្តប៉ៃលិន៖ សមាសភាពក្រុមប្រឹក្សាថ្មី នៅសង្កាត់ប៉ៃលិន ក្រុងប៉ៃលិន និងឃុំស្ទឹងកាច់ ក្នុងស្រុកសាលាក្រៅ បានចូលកាន់តំណែងហើយ នាថ្ងៃទី៤ ខែកក្កដា ឆ្នាំ២០២២…
ខេត្តប៉ៃលិន៖ សមាសភាពក្រុមប្រឹក្សាថ្មី នៅសង្កាត់ប៉ៃលិន ក្រុងប៉ៃលិន និងឃុំស្ទឹងកាច់ ក្នុងស្រុកសាលាក្រៅ បានចូលកាន់តំណែងហើយ នាថ្ងៃទី៤ ខែកក្កដា ឆ្នាំ២០២២…
ខេត្តប៉ៃលិន៖ សមាសភាពក្រុមប្រឹក្សាថ្មី នៅសង្កាត់ប៉ៃលិន ក្រុងប៉ៃលិន និងឃុំស្ទឹងកាច់ ក្នុងស្រុកសាលាក្រៅ បានចូលកាន់តំណែងហើយ នាថ្ងៃទី៤ ខែកក្កដា ឆ្នាំ២០២២ នេះ។ ពិធីប្រកាសសុពលភាព ចូលកាន់តំណែងរបស់ក្រុមប្រឹក្សាឃុំសង្កាត់ អាណត្តិទី៥ នេះ បានធ្វើឡើងក្រោមអធិបតីភាពលោកជំទាវ បាន ស្រីមុំ អភិបាលខេត្តប៉ៃលិន និងថ្នាក់ដឹកនាំជាច្រើនទៀត។
តាមសេចក្តីប្រកាសរបស់ក្រសួងមហាផ្ទៃ សមាសភាពក្រុមប្រឹក្សាឃុំ-សង្កាត់ អាណត្តិទី៥ នៅសង្កាត់ប៉ៃលិន មានចំនួន ០៩រូប និងឃុំស្ទឹងកាច់ មានក្រុមប្រឹក្សាចំនួន ០៩រូប។ ក្នុងនោះ នៅសង្កាត់ប៉ៃលិន ក្នុងចំណោមសមាសភាពក្រុមប្រឹក្សាសង្កាត់ ៩រូប គឺ ៨រូប មកពីគណបក្សប្រជាជនកម្ពុជា និង១រូប មកពីគណបក្សភ្លើងទៀន ជាចៅសង្កាត់រងទី២។ រីឯចៅសង្កាត់ គឺលោក នីម អឿន មកពីគណបក្សប្រជាជនកម្ពុជា។ រីឯនៅឃុំស្ទឹងកាច់ ក្នុងចំណោមសមាសភាពក្រុមប្រឹក្សាឃុំ ទាំង ៩រូប គឺមកពីគណបក្សប្រជាជនកម្ពុជា ៨រូប និងគណបក្សភ្លើងទៀន ១រូប ជាជំទប់ទី២។ រីឯមេឃុំស្ទឹងកាច់ គឺលោក ហ៊ុន ប៊ីន មកពីគណបក្សប្រជាជនកម្ពុជា។
បន្ទាប់ពីសេចក្តីរាយការណ៍របស់លោកមេឃុំ-ចៅសង្កាត់ អាណត្តិទី៤ និងការប្រគល់សេចក្តីសម្រេច និងត្រា ព្រមទាំងការធ្វើការប្តេជ្ញាចិត្តរបស់លោកមេឃុំ -ចៅសង្កាត់ អាណត្តិទី៥ រួចមក លោកជំទាវ បាន ស្រីមុំ អភិបាលខេត្តប៉ៃលិន បានចូលរួមអបអរសាទរ ចំពោះអស់លោក លោកស្រី ជាសមាជិកក្រុមប្រឹក្សាឃុំ -សង្កាត់អាណត្ដិទី៥ និងជាមេឃុំ-ចៅសង្កាត់ ជំទប់ទំាងអស់ ដែលបានទទួលនូវសេចក្តីទុកចិត្តពីសំណាក់ប្រជាពលរដ្ឋ តាមរយៈការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីថ្ងៃអាទិត្យទី៥ ខែមិថុនា ឆ្នាំ២០២២ កន្លងមក ដែលបានប្រព្រឹត្តទៅប្រកបដោយលក្ខណៈសេរី ត្រឹមត្រូវ និងយុត្ដិធម៌។
លោកជំទាវអភិបាលខេត្ត បានមានប្រសាសន៍បញ្ជាក់ថា ក្រុមប្រឹក្សាឃុំសង្កាត់ អាណត្តិទី៥ ដែលបោះឆ្នោតជ្រើសរើសឡើងពីប្រជាពលរដ្ឋ ក្នុងភូមិ និងមានស្វ័យភាព ក្នុងការដឹកនាំ គ្រប់គ្រង ការអភិវឌ្ឍន៍មូលដ្ឋានក៍ពិតមែន តែក្រុមប្រឹក្សាជាផ្នែកមួយនៃអំណាចប្រតិបត្តិរបស់រដ្ឋ ដូច្នេះក្នុងន័យនេះ ក្រុមប្រឹក្សាឃុំ-សង្កាត់ ត្រូវអនុវត្តតាមរដ្ឋធម្មនុញ្ញ ច្បាប់ និងលិខិតបទដ្ឋាននានា ដែលមានជាធរមាន ជាពិសេសច្បាប់ស្តីពីការគ្រប់គ្រងរដ្ឋបាលឃុំ សង្កាត់។ បន្ទាប់ពីការប្រកាសសុពលភាពនេះទៅ ត្រូវអនុម័ត តាមបទបញ្ជាផ្ទៃក្នុង ឲ្យស្របទៅតាមសេចក្តីណែនាំរបស់ក្រសួងមហាផ្ទៃ។
លោកជំទាវ ក៏បានមានប្រសាសន៍ណែនាំ ដោយលើកឡើងនូវបទពិសោធន៍មួយចំនួន ដល់សមាជិកក្រុមប្រឹក្សាឃុំសង្កាត់ នៃអាណត្តិទី៥ ដើមី្បជាប្រទីបឆ្លុះបញ្ចាំង ក្នុងការគ្រប់គ្រងដឹកនាំឃុំ សង្កាត់ លើកិច្ចអភិវឌ្ឍន៍ ឲ្យមានការរីកចម្រើនបន្ត ហើយបើទោះបីការប្រកាសទទួលស្គាល់ជាក្រុមប្រឹក្សាឃុំ សង្កាត់អាណត្ដិថ្មីក៏ពិតមែន ប៉ុន្ដែមិនមែនបានសេចក្ដីថា ការងារគ្រប់គ្រង និងការងារអភិវឌ្ឍន៍មូលដ្ឋាន ដែលក្រុមប្រឹក្សាឃុំ សង្កាត់ អាណត្ដិចាស់ បានអនុវត្ដកន្លងមក ត្រូវបានបញ្ចប់នោះទេ ពោលគឺក្រុមប្រឹក្សាឃុំ សង្កាត់ អាណត្ដិថ្មី ត្រូវបន្ដអនុវត្ដការងារគ្រប់គ្រង និងការអភិវឌ្ឍមូលដ្ឋាន ពីក្រុមប្រឹក្សាឃុំសង្កាត់អាណត្ដិចាស់ សំដៅធានាឲ្យមាននិរន្ដរភាពក្នុងកិច្ចការរដ្ឋបាល និងការផ្ដល់សេវាព្រមទំាងការអភិវឌ្ឍនៅមូលដ្ឋាន ឲ្យកាន់តែមានប្រសិទ្ធភាពថែមទៀត ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ។
សូមរម្លឹកថា នៅខេត្តបៃលិន មាន ៨ឃុំសង្កាត់ ( ក្រុងប៉ៃលិន ៤សង្កាត់ និងស្រុកសាលាក្រៅ មាន ៤ឃុំ )។ ក្នុងនោះ គណបក្សប្រជាជនកម្ពុជា ទទួលបាន ៤៧អាសនៈ និងគណបក្សភ្លើងទៀន ទទួលបាន ៥អាសនៈ។ គណបក្សប្រជាជនកម្ពុជា ទទួលបានតំណែងជាមេឃុំចៅសង្កាត់ ទាំង ៨ឃុំសង្កាត់ ( ៤ឃុំ និង ៤សង្កាត់ )។ រីឯគណបក្សភ្លើងទៀន ទទួលបានតំណែងជាជំទប់ទី២ ចំនួន ២រូប និងចៅសង្កាត់រងទី២ ចំនួន ៣រូប៕
ចែករំលែកព័តមាននេះ