ខេត្តកំពត ៖ កាស៊ីណូមួយមានអ្នកកាសែតជិត១ពាន់នាក់ បានចូលទៅយកលុយអស់ជាង៣០លានរៀលក្នុងមួយខែ នៅក្នុងស្រុកកំពង់ត្រាច គឺជាស្រុកមួយជាប់នឹងព្រំប្រទល់ប្រទេសវៀតណាម ហើយក៏មានច្រកទ្វារចេញចូលទៅប្រទេសវៀតណាម មានចំនួន២កន្លែងផងដែរ គឺច្រកទ្វារទ្វេភាគីតន់ហន់ និងមួយទៀត គឺច្រកទ្វារព្រំដែនអន្តរជាតិព្រែកចាក នឹងមានកាស៊ីណូចំនួន៥កន្លែងផងដែរ។
កាស៊ីណូនីយាយមួយៗ ត្រូវបានបើកដំណើរការអោយអ្នកលេងល្បែងចូលលេងជាបន្តបន្ទាប់ ហើយភាគច្រើនអ្នកចូលទៅលេងក្នុងកាស៊ីណូនោះ គឺប្រជាពលរដ្ឋខ្មែរតែម្ដង។ ក្នុងចំណោមកាស៊ីណូទាំង៥នេះ គឺមានកាស៊ីណូ «សុខគឹមម៉េង» មានទីតាំងនៅតន់ហន់ ជាប់នឹងច្រកទ្វារទ្វេភាគីតន់ហន់ ក្នុងឃុំព្រែកក្រឹស ស្រុកកំពង់ត្រាច ដែលបានបើកដំណើរការអោយអ្នកញៀ.នល្បែងចូលលេងយ៉ាងគគ្រឹកគគ្រេង ។
ហើយគ្រាន់តែដាច់ខែចូលខែ៦ គឺមានអ្នកកាសែត អង្គភាពផ្សេងៗគ្នា បានចូលទៅសុំលុយពីម្ចាស់កាស៊ីណូចំនួន ៩២៦ នាក់ (ជិតមួយពាន់នាក់) និងអស់ប្រាក់ជាង៣០លានរៀលឯណោះ ។ នេះបើយោងតាមការអះអាងពីកងសន្តិសុខកាស៊ីណូ «សុខគីមម៉េង»។
កងសន្តិសុខរូបនោះ បានបង្ហាញការលោតឈ្មោះមកពីអង្គភាពផ្សេងៗ បានមកសុំលុយក្នុងអ្នកកាសែតម្នាក់ត្រឹមតែ២ម៉ឺនទៅ៣ម៉ឺន និងចាងហ្វាងកាសែតចំនួន១៥ដុល្លារ។ ហើយសន្តិសុខរូបនោះ បានផ្ទៀងផ្ទាត់ឈ្មោះអ្នកកាសែត ដែលមកចូលសុំលុយ និងបានត្អូញត្អែរពីការចំណាយច្រើនទៅលើអ្នកកាសែត។
ដាច់ខែ៦ចូលដល់ខែ៧នេះ បើតាមការឱ្យដឹងពីសន្តិសុខ បាននិយាយប្រាប់ថា អ្នកកាសែតមកសុំលុយបណ្ដើរៗហើយ តែមិនទាន់មានចំនួនច្រើនដូចខែ៥នោះទេ។ ហើយបើអ្នកកាសែតមកច្រើនមែននោះ បើត្រឹមតែភ្នាក់ងារអ្នកយកព័ត៌មាន ខាងកាស៊ីណូបានជូនត្រឹមតែមួយម៉ឺនរៀលទេ។
ហើយគេមិនបានសួរលំអិតថា ចុះមានអាជ្ញាបណ្ណ័ទៅហើយនោះ ហេតុអីក៏ខ្លាចអ្នកកាសែត ធ្វើអោយអ្នកកាសែតមកពីគ្រប់ខេត្ត-ក្រុងមកយកលុយបែបនេះ? ។ ហើយលោក សេក ឈិន មេឃុំព្រែកក្រឹស ធ្លាប់បានជំទាស់ដែរ រឿងបើកកាស៊ីណូអោយប្រជាពលរដ្ឋចូលទៅលេងយ៉ាងកុះករបែបនេះ។
បើនិយាយឱ្យវាកាន់តែច្បាស់… ច្បាប់ហាមខ្មែរចូលលេងកាស៊ីណូ វាមានតែនៅលើក្រដាសអនាម័យប៉ុណ្ណោះ ។ គ្មានកាស៊ីណូណាមួយដែលអត់ខ្មែរចូលលេង? គ្មានទេ សម័យកាលនេះ… ឱ្យខ្មែរចូលលេងទៅ វាឆាប់រលាយ… ហេ! ហេ!
ចែករំលែកព័តមាននេះ