បច្ចេកវិទ្យា Offside ពាក់កណ្តាលស្វ័យប្រវត្តិ នឹងលេចវត្តមាននៅ World Cup 2022
កាតា ៖ សហព័ន្ធបាល់ទាត់ពិភពលោកហៅកាត់ថា FIFA កាលពីថ្ងៃទី១ ខែកក្កដា ឆ្នាំ២០២២ បាន
កាតា ៖ សហព័ន្ធបាល់ទាត់ពិភពលោកហៅកាត់ថា FIFA កាលពីថ្ងៃទី១ ខែកក្កដា ឆ្នាំ២០២២ បានប្រកាសថា បច្ចេកវិទ្យា Offside ពាក់កណ្តាលស្វ័យប្រវត្តិ នឹងត្រូវប្រើប្រាស់នៅក្នុងព្រឹត្តិការណ៍ World Cup 2022 នៅប្រទេសកាតា។ ដែលនឹងចាប់ផ្តើមពីថ្ងៃទី២១ ខែវិច្ឆិកា រហូតដល់ថ្ងៃទី១៨ ខែធ្នូ ខាងមុខនេះ។
FIFA បានពិពណ៌នាថា បច្ចេកវិទ្យាថ្មីទំនើបចុងក្រោយនេះ នឹងក្លាយជាឧបករណ៍ជំនួយដ៏សំខាន់បំផុតមួយ ដែលនឹងជួយអាជ្ញាកណ្តាលលើទីលាន និងជំនួយការរបស់គាត់ ធ្វើការសម្រេចចិត្តបានលឿន និងត្រឹមត្រូវជាងមុន បើទោះជាស្ថិតនៅក្នុងកាលៈទេសៈណាក៏ដោយ។
ស្ថាប័នគ្រប់គ្រងពិភពលោកបានពន្យល់ថា បច្ចេកវិទ្យាថ្មីនេះ ប្រើប្រាស់កាមេរ៉ាតាមដានចំនួន១២ ដែលដាក់នៅក្រោមដំបូលកីឡដ្ឋាន។ ដើម្បីតាមដានគ្រាប់បាល់ និងទិន្នន័យ ២៩ចំណុចនៃអវយវៈរបស់កីឡករម្នាក់ៗ ចំនួន៥០ដងក្នុង១វិនាទី។
ដោយមានការសហការជាមួយនឹងក្រុមហ៊ុនផ្គត់ផ្គង់សម្ភារៈកីឡា Adidas បានបំពាក់ឧបករណ៍តាមដានដ៏ពិសេស នៅខាងក្នុងគ្រាប់បាល់ ដើម្បីតាមដានចលនា ក៏ដូចជាទីតាំងកីឡាករ ជាមួយនិងគ្រាប់បាល់នៅលើទីលានយ៉ាងច្បាស់លាស់បំផុត។ មុនពេលជូនដំណឹងដោយស្វ័យប្រវត្តិទៅកាន់មន្ត្រីនៅក្នុងបន្ទប់វីដេអូ នៅពេលមានបាល់ Offside ។ ហើយមន្ត្រីវីដេអូនឹងពិនិត្យការសម្រេចចិត្ត មុនពេលជូនដំណឹងដល់អាជ្ញាកណ្តាលលើទីលាន។ ដែលប្រតិបត្តិការណ៍ទាំងមូល ត្រូវបានគេសន្មត់ថា មានរយៈពេលត្រឹមប៉ុន្មានវិនាទីតែប៉ុណ្ណោះ។
រាល់ការសម្រេចចិត្តរបស់ VAR ត្រូវបានបញ្ជាក់ជាលក្ខណៈ 3D animations ដែលនឹងត្រូវបង្ហាញលើផ្ទាំងអេក្រង់ដ៏ធំក្នុងកីឡដ្ឋាន រួមនិងដៃគូចាក់ផ្សាយទាំងអស់។ ដូច្នេះអ្នកគាំទ្រទាំងអស់មិនថា ទស្សនាដោយផ្ទាល់ ឬនៅផ្ទះនោះទេ នឹងអាចដឹងអំពីមូលហេតុនៃការសម្រេចចិត្តរបស់អាជ្ញាកណ្តាល។
ប្រព័ន្ធនេះ ត្រូវបានសាកល្បងរួចហើយ នៅក្នុងការប្រកួតរបស់ FIFA រួមទាំងពានរង្វាន់ FIFA Club World Cup 2021។ ហើយការសាកល្បងបន្ថែមទៀត នឹងត្រូវធ្វើឡើងនៅប៉ុន្មានខែ មុនពេលការប្រកួត World Cup 2022 ចាប់ផ្តើមជាផ្លូវការ៕ (ដកស្រង់ចេញពី FIFA និង 90min)
ចែករំលែកព័តមាននេះ