បុរស២នាក់ធ្វើសកម្មភាពនៅកំពង់ឆ្នាំង រត់គេចខ្លួនមកភ្នំពេញ តែគេចមិនរួច
- កំពង់ឆ្នាំង
សមត្ថកិច្ចកងរាជអាវុធហត្ថខេត្តកំពង់ឆ្នាំង បានសហការជាមួយកម្លាំងកងរាជអាវុធហត្ថស្នាក់ការសន្តិសុខ៥០០ បានចាប់ឃាត់ខ្លួនជនសង្ស័យ២នាក់ បន្ទាប់ពី
ខេត្តកំពង់ឆ្នាំង ៖ សមត្ថកិច្ចកងរាជអាវុធហត្ថខេត្តកំពង់ឆ្នាំង បានសហការជាមួយកម្លាំងកងរាជអាវុធហត្ថស្នាក់ការសន្តិសុខ៥០០ បានចាប់ឃាត់ខ្លួនជនសង្ស័យ២នាក់ បន្ទាប់ពីពួកគេបានធ្វើសកម្មភាពលួចកាច់សោ.កម៉ូតូរបស់ជនរងគ្រោះពីក្រុងកំពង់ឆ្នាំង រួចរត់គេចខ្លួនទៅរាជធានីភ្នំពេញ។ ហេតុការណ៍នេះ បានកើតឡើងនៅវេលាម៉ោង១និង៣០នាទីរំលងអធ្រាត្រ ឈានចូលថ្ងៃទី២៩ ខែមិថុនា ឆ្នាំ២០២២ នៅតាមបណ្ដោយផ្លូវជាតិលេខ៥ ស្ថិតក្នុងភូមិចំការស្វាយ ឃុំសេដ្ឋី ស្រុកសាមគ្គីមានជ័យ។
លោក ហង្ស សុជាតិ មេបញ្ជារការរង កងរាជអាវុធហត្ថខេត្តកំពង់ឆ្នាំង បានឲ្យដឹងថា ក្រោយពីទទួលបណ្តឹងពីជនរងគ្រោះឈ្មោះ គ្រី ហួង ភេទប្រុស រស់នៅភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង បានបាត់ម៉ូតូមួយគ្រឿងម៉ាកហុងដា Beat ពណ៌សលាយក្រហម ផ្លាកលេខព្រៃវែង Q. 8287 ។ ពេលនោះសមត្ថកិច្ចកងរាជអាវុធហត្ថ ក៏បានទាក់ទងនៅតាមគោលដៅគ្រប់ទីកន្លែង បន្ទាប់មកស្នាក់ការសន្តិសុខ 500 ដែលមានទីតាំងតាមបណ្តាយផ្លូវជាតិលេខ៥ បានប្រទះឃើញជនសង្ស័យចំនួន២នាក់កំពុងជិះម៉ូតូ២គ្រឿង ក្នុងនោះ១គ្រឿងជារបស់ជនរងគ្រោះ ទើបធ្វើការឃាត់ខ្លួនតែម្តង ។
ប្រភពដដែលបានបន្តថា ជនសង្ស័យខាងលើនេះ ទី១- ឈ្មោះ ខៀវ លាស់ អាយុ៣១ឆ្នាំ មុខរបរមិនពិតប្រាកដ រស់នៅរស់នៅភូមិចាក់ជ្រូក សង្កាត់កំបូល ខណ្ឌកំបូល រាជធានីភ្នំពេញ និងទី២- ឈ្មោះ សាន់ សិឡា អាយុ២៩ឆ្នាំ មុខរបរពុំពិតប្រាកដ មានទីលំនៅភូមិជម្ពូវ័ន សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ ក្រោយពីធ្វើការឃាត់ខ្លួន សមត្ថកិច្ចក៏បានដកហូតម៉ូតូចំនួន២គ្រឿង ក្នុងនោះមួយគ្រឿងជាម៉ូតូរបស់ជនរងគ្រោះម៉ាកហុងដាបេត និងមួយគ្រឿងទៀត ជាម៉ូតូធ្វើសកម្មភាពម៉ាកយ៉ាម៉ាហា ស៊ីរូស អត់ពន្ធ រួមទាំងដកហូតទូរស័ព្ទដៃ២គ្រឿង ខ្សែដៃធ្វើពីលោហៈពណ៌សចំនួន១ និងចិញ្ចៀនធ្វើពីលោហៈពណ៌សមួយវង់ទៀតផង ។
ក្រោយពីធ្វើការការសាកសួររួច សមត្ថកិច្ចកងរាជអាវុធហត្ថខេត្តកំពង់ឆ្នាំង ក៏បានបញ្ជូនជនសង្ស័យទៅកាន់សាលាដំបូងខេត្តកំពង់ឆ្នាំង ដើម្បីចាត់ការតាមនីតិវិធីច្បាប់ ដោយឡែកម៉ូតូជនរងគ្រោះ ក៏បានប្រគល់ទៅម្ចាស់ដើមវិញហើយ៕
ចែករំលែកព័តមាននេះ