ខេត្តកំពង់ធំ៖ អស់រយះកាលជាច្រើនខែឆ្នាំមកហើយ ដីបឹងភេដែលជាបឹងប្រវត្តិសាស្ត្រដ៏ធំមួយស្ថិតនៅក្នុងសង្កាត់កំពង់ក្របៅ ក្រុងស្ទឹងសែន ខេត្តកំពង់ធំ កាលពីដើមឡើយបឹងមួយនេះ មានវិសាលភាពធំល្វឹងល្វើយណាស់ ដែលជាទីកន្លែងអាស្រ័យផលរបស់បងប្អូនប្រជាពលរដ្ឋតាមរយៈនេសាទត្រីដាក់លប ដាក់មង ចងសន្ទូច…
ខេត្តកំពង់ធំ៖ អស់រយះកាលជាច្រើនខែឆ្នាំមកហើយ ដីបឹងភេដែលជាបឹងប្រវត្តិសាស្ត្រដ៏ធំមួយស្ថិតនៅក្នុងសង្កាត់កំពង់ក្របៅ ក្រុងស្ទឹងសែន ខេត្តកំពង់ធំ កាលពីដើមឡើយបឹងមួយនេះ មានវិសាលភាពធំល្វឹងល្វើយណាស់ ដែលជាទីកន្លែងអាស្រ័យផលរបស់បងប្អូនប្រជាពលរដ្ឋតាមរយៈនេសាទត្រីដាក់លប ដាក់មង ចងសន្ទូច ដកព្រលឹត រំចង់ ដកក្រអៅឈូក បេះស្លឹកឈូកផ្លែឈូក បេះត្រកួន កាត់ដើមត្រាវលក់ជាដើម និងជាប្រភពស្មៅ នឹងទឹកសម្រាប់សត្វពាហនៈរបស់ប្រជាពលរដ្ឋទូទៅ ពេលនេះសង្ស័យប្រគល់ឱ្យក្រុមហ៊ុនមួយ ។
បច្ចុប្បន្ន ដោយសារតែមានការឃុបឃិតគ្នាជាប្រព័ន្ធបានធ្វើឲ្យផ្ទែបឹងភេដ៏ធំល្វឹងល្វើយនេះត្រូវរួមតូចចង្អៀតបន្តិចម្តងៗតាមរយៈនៃការំលោភយកធ្វើជាកម្មសិទ្ធផ្ទាល់ខ្លួនរបស់ឯកជន និងរដ្ឋយ៉ាងអនាធិបតេយ្យទៅវិញ ដែលជាហេតុនាំឲ្យផ្ទៃបឹងធំនេះនៅសេសសល់ធំជាងបាតដៃតែប៉ុណ្ណោះមកដល់ពេលនេះ ឯឈ្មោះក្រុមហ៊ុនក៏លាក់ជិតដែរ ។
ជាក់ស្តែង បើយោងតាមប្រភពមួយបានឲ្យដឹងថា សកម្មភាពចាក់ដីលុបបឹងភេ គឺដើម្បីយកសាងសង់មន្ទីរចំនួនពីរកំពុងតែដំណើរការទៅមុខយ៉ាងរលូនដោយពុំមានការរំខានឬក៏រារាំងពីខាងស្ថាប័នណាមួយនោះឡើយ ។ រីឯមន្ទីរទាំងពីរខាងលើមន្ទីរនិមួយៗនេះ មានផ្ទៃដីទំហំទទឹងជាង១០ម គុណនិង៣០ម ស្ថិតនៅចំកណ្តាលបេះដួងខេត្តតែម្តង ។ មន្ទីរចំនួនពីរដែលត្រូវដោះដូរនោះត្រូវបានគេខ្សឹបប្រាប់ឲ្យដឹងថា!ជាមន្ទីរសេដ្ឋកិច្ច និងហិរញ្ញវត្ថុខេត្ត និងមន្ទីររៀបចំដែនដីនគរូបនីយកម្ម និងសំណង់ខេត្ត ។
ពាក់ព័ន្ធនិងករណីចាក់ដីលុបបឹងភេខាងលើ នៅព្រឹកថ្ងៃទី៣០ ខែមិថុនា ឆ្នាំ២០២២ អ្នកសារព័ត៍មានយើងបានព្យាយាមសុំការបំភ្លឺពីលោក ចាន់ ប៊ុន ចៅសង្កាត់កំពង់ក្របៅ លោកមានប្រសាសន៍ថា អាជ្ញាធរសង្កាត់អត់បានដឹងនោះទេអំពីបញ្ហានេះ ហើយក៏មិនដឹងថាគេចាក់ដីលុបបឹងភេយកទំហំចំនួនប៉ុន្មាននោះដែរ ដោយសារគេមិនបានប្រាប់ដល់អាជ្ញាធរសង្កាត់នោះឡើយ។
លោក សុខ សុផល ប្រធានមន្ទីរសេដ្ឋកិច្ច និងហិរញ្ញវត្ថុខេត្តប្រាប់តាមទូរស័ព្ទថា!លោកជាប់កម្មវិធីនៅឯកំពង់សោម ពាក់ព័ន្ធករណីរឿងចាក់ដីលុបបឹងភេហ្នឹង លោកសូមបញ្ជាក់ឲ្យបានច្បាស់ថា ខាងមន្ទីរក៏ដូចជាខាងក្រសូងអត់មានពាក់ព័ន្ធនឹងការដោះដូរឬក៏លក់មន្ទីរ ហើយឲ្យទៅនៅក្នុងបឹងភេអ្វីនោះទេ ។
លោកបន្តថា ដោយមើលឃើញបរិវេណមន្ទីរមានការតូចចង្អៀតចាប់តាំងពីពង្រីកផ្លូវថ្នល់សាងសង់វិមានឯករាជរួចមក រដ្ឋបាលខេត្តកំពង់ធំ ក៏បានឲ្យដីបឹងភេមួយកន្លែងដើម្បីសាងសង់ធ្វើជាកន្លែងធ្វើការងារបន្ថែម ហើយមន្ទីរចាស់នៅរក្សាទុកដដែលទេ អត់មានលក់ដូរ ដោះដូរអ្វីទេ។
ចំណែកលោក អ៊ឹម សុឌីណា ប្រធានមន្ទីររៀបចំដែនដីនគរូបនីយ៍កម្ម និងសំណង់ខេត្តកំពង់ធំវិញប្រាប់ថា!ចំពោះបញ្ហាពាក់ព័ន្ធរឿងដោះដូរមន្ទីរចំនួនពីរខាងលើនេះថា ដោយសារសាលាខេត្តមើលឃើញមន្ទីររបស់លោកមានលក្ខណៈតូចចង្អៀត និងមានទីតាំងនៅជិតផ្សារកំពង់ធំ ហើយថែមទាំងគេដាក់ធុងសំរាមដ៏ធំនិងមានក្លិនស្អុយថែមទៀត ដែលបង្កផលប៉ះពាល់ដល់សុខភាពក៏ដូចជាបរិស្ថានផងនោះ ហេតុដូច្នេះហើយទើបរដ្ឋបាលខេត្តបានប្រគល់ដីនៅចំណុចបឹងភេឲ្យចាក់ ដីដើម្បីសាងសង់មន្ទីរធ្វើការងារថ្មី ។
លោកថា នៅពេលណាមន្ទីរថ្មីសាងសង់រួចដំណើរការបាននៅពេលណានោះ មន្ទីររៀបចំដែនដីនគរូបនីយ៍កម្ម និងសំណង់ចាស់នេះ នឹងប្រគល់ជូនទៅរដ្ឋបាលខេត្តកំពង់ធំគ្រប់គ្រងវិញ។ រឿងប្រគល់ឱ្យក្រុមហ៊ុនឯកជនណាមួយនោះ មិនមានលេចចេញទេ ។
ជុំវិញករណីនេះ លោក យ៉ូវ សេងគុណ នាយករដ្ឋបាលសាលខេត្តមិនអាចសុំការបំភ្លឺបានទេ នៅព្រឹកថ្ងៃទី៣០ ខែមិថុនា នេះ ដោយសារទូរស័ព្ទដៃរបស់លោកខលចូលជាច្រើនដងតែគ្មានអ្នកទទួល ។
លោក ងួន រតនៈ អភិបាលខេត្តកំពង់ធំ បានមានប្រសាសន៍ប្រាប់តាមទូរស័ព្ទថា!លោកមិនសូវដឹងច្បាស់ទេពីបញ្ហាខាងលើនេះ ពីព្រោះលោកទើបតែមកកាន់តំណែងជាអភិបាលខេត្តកំពង់ធំ បានមួយរយៈពេលខ្លីថ្មីៗតែប៉ុណ្ណោះ ។ តែបើតាមលោកដឹងខ្លះៗនោះ គឺមានមន្ទីរចំនួនបីបួនដែលបានស្នើសុំដីបឹងភេដើម្បីសាងសង់មន្ទីរ ហើយកន្លងមកក៏មានមន្ទីរមួយចំនួនមាននៅក្នុងបឹងភេនោះហើយដែរ ម្យ៉ាងទៀតដីបឹងភេនេះត្រូវបានរដ្ឋប្រគល់សិទ្ធឲ្យក្រុមហ៊ុនវិនិយោគរួចអស់ហើយ ហើយក៏គេបានបង់ពន្ធជូនរដ្ឋនៅឯទីក្រុងភ្នំពេញជារៀងរាល់ឆ្នាំមកហើយដែរ ។
មិនទាន់ដឹងថា តើក្រុមហ៊ុនមួយណាទេ ដែលមានសំណាងយកបឹងភេដោះដូរជាមួយមន្ទីររបស់រដ្ឋដែលមានដីចំកណ្តាលបេះដូងក្រុង?
ព័ត៌មានលម្អិតនឹងមានផ្សាយជូនបន្តលើទំព័រកាសែតកោះសន្តិភាព។
ចែករំលែកព័តមាននេះ