Lukaku ត្រឡប់ទៅទ្រនំចាស់វិញ ទទួលបានការស្វាគមន៍យ៉ាងកក់ក្តៅពីអ្នកគាំទ្រ
អ៊ីតាលី ៖ ខ្សែប្រយុទ្ធ Romelu Lukaku បានត្រឡប់ទៅចូលរួមជាមួយក្លិប Inter Milan ជាផ្លូវការហើយ
អ៊ីតាលី ៖ ខ្សែប្រយុទ្ធ Romelu Lukaku បានត្រឡប់ទៅចូលរួមជាមួយក្លិប Inter Milan ជាផ្លូវការហើយ នៅក្នុងលក្ខខណ្ឌខ្ចីជើងពេញមួយរដូវកាល សម្រាប់រដូវកាលក្រោយ។ នេះបើយោងតាមប្រភពពី BBC បានចេញផ្សាយកាលពីថ្ងៃទី២៩ ខែមិថុនា កន្លងទៅ។
ក្រុមតោខៀវ Chelsea បានចំណាយលុយបំបែកកំណត់ត្រារបស់ក្លិបចំនួន ៩៧,៥លានផោន (១១៨លានដុល្លារ) ដើម្បីនាំយកខ្សែប្រយុទ្ធបែលហ្ស៊ិកវ័យ២៩ឆ្នាំរូបនេះ ពីក្លិបយក្សអ៊ីតាលី Inter Milan កាលពីទីផ្សារដោះដូរកីឡាកររដូវក្តៅមុន។ ប៉ុន្តែទោះយ៉ាងណា នៅមុនពេលបុណ្យណូអែល ខ្សែប្រយុទ្ធរូបនេះ បានលើកឡើងថា គេមិនសប្បាយចិត្តយ៉ាងខ្លាំង នៅលើទឹកដី Stamford Bridge។ ហើយសង្ឃឹមថានឹងអាចត្រឡប់ទៅចូលរួមជាមួយ Inter Milan សារជាថ្មីម្តងទៀត។
Inter Milan បានយល់ព្រមលើកិច្ចព្រមព្រៀងលកខណ្ឌខ្ចីជើងក្នុងតម្លៃជាង ៨លានដុល្លារ សម្រាប់ Lukaku ដែលបានជួយពួកគេឈ្នះជើងឯកលីគកំពូល Serie A កាលពីរដូវកាល ២០២០-២១។ ខណៈដែលអ្នកគាំទ្របានទៅទទួលស្វាគមន៍ ការមកដល់ទីក្រុង Milan របស់ខ្សែប្រយុទ្ធរូបនេះ យ៉ាងច្រើនកុះករផងដែរ។
បើទោះបីជាមិនសប្បាយចិត្តជាមួយ Chelsea កាលពីរដូវកាលមុនក៏ពិតមែន។ ប៉ុន្តែខ្សែប្រយុទ្ធរូបនេះ មិនមែនជាកីឡាករធម្មតាឡើយ ដោយរូបគេអាចស៊ុតបញ្ចូលទីបាន ១៥គ្រាប់នៅក្នុងការប្រកួតទាំងអស់ក្រោមការដឹកនាំរបស់លោក Thomas Tuchel៕
ចែករំលែកព័តមាននេះ