ក្រុមចោរវះទូកុងតឺន័រយកខោអាវទៅលក់ឲ្យក្រុមសង្គមងងឹត
ខេត្តកំពង់ស្ពឺ ៖ ទូកុងតឺន័ររបស់រោងចក្រមួយនៅរាជធានីភ្នំពេញ ត្រូវបានក្រុមចោរនាំយកមកធ្វើសកម្មភាពវះយកខោអាវ ដើម្បីដឹកជញ្ជូនបន្តទៅលក់ឱ្យក្រុមសង្គមងងឹត …
ខេត្តកំពង់ស្ពឺ ៖ សមត្ថកិច្ចបានរួសរាន់ធ្វើការត្រួតពិនិត្យទូកុងតឺន័រ១ដែលសង្ស័យថា ក្រុមចោរនាំយកមកវះលួចយកទំនិញនាំចេញ នៅតាមផ្លូវលេខ៤៤ ស្ថិតក្នុងភូមិតាមុល សង្កាត់ច្បារមន ក្រុងច្បារមន តែហាមមិនឱ្យអ្នកាសែតចូលថតរូបឡើយ ។ ការត្រួតពិនិត្យនេះ ធ្វើឡើងកាលពីវេលាម៉ោង៧និង៥០នាទីព្រឹកថ្ងៃទី៣ ខែធ្នូ នៅក្នុងបរិវេណទីលានចាក់សំរាម ។
ប្រភពពីមន្ត្រីសមត្ថកិច្ចមួយរូបសុំមិនបញ្ចេញឈ្មោះបង្ហើបថា ទូកុងតឺន័រនេះជារបស់រោងចក្រមួយនៅរាជធានីភ្នំពេញ ត្រូវបានក្រុមចោរនាំយកមកធ្វើសកម្មភាពវះយកខោអាវ ដើម្បីដឹកជញ្ជូនបន្តទៅលក់ឱ្យក្រុមសង្គមងងឹតដែលចាំទទួលទិញ ។ ប្រភពបន្តថា ក្រុមចោរបានវះយកកេសខោនិងអាវចេញពីទូអស់ទៅហើយនិងបានយករថយន្តកុងតឺន័រមកទុកចោលនៅបរិវេណខាងក្រៅកន្លែងធ្វើសកម្មភាព ។ ខោអាវទាំងនោះមានចំនួនរាប់រយកេស ហើយបើនិយាយពីតម្លៃវិញក៏មិនតិចមុឺនដុល្លារទេ ។ ពេលនេះសមត្ថកិច្ចកំពុងធ្វើការត្រួតពិនិត្យនិងស្រាវជ្រាវរកម្ចាស់ទំនិញនិងទូកុងតឺន័រ ដើម្បីឱ្យមកទទួលយកទៅវិញរឿងបាត់មិនដឹងទេ ។
មានចម្ងល់ជាច្រើនលើកឡើងជាមួយនឹងការរិះគន់ផងដែរ ចំពោះមូលហេតុដែលសមត្ថកិច្ចមិនអនុញ្ញាតឱ្យអ្នកកាសែតចូលថតរូបភាព ដោយសំអាងថាងាយស្រួលក្នុងការធ្វើការ នោះ ។ បើទោះជាយ៉ាងនេះក្តី មហាជនសង្ឃឹមថា ខោអាវទាំងនេះនឹងមិនបាត់បង់ទេ ខណៈដែលក្រុមចោរមិនទាន់ដឹកចេញនៅឡើយនោះ ។
ដោយឡែក ប្រភពព័ត៌មានដែលបង្ហើបប្រាប់ដោយមន្ត្រីនគរបាលដែលចូលរួមក្នុងប្រតិបត្តិការនោះថា ការងារនេះខាងនាយកដ្ឋានព្រហ្មទណ្ឌក្រសួងមហាផ្ទៃជាម្ចាស់ករណី ហើយប្រតិបត្តិការនេះសមត្ថកិច្ចក៏ឃាត់ខ្លួនបានក្រុមជនសង្ស័យចំនួន១០នាក់ផងដែរ ដោយមានការចូលរួមពីសមត្ថកិច្ចនគរបាលខេត្តកំពង់ស្ពឺ ។
តាមប្រភពព័ត៌មានពីសមត្ថកិច្ចដែលចូលរួមបង្ក្រាបក្រុមវះទូកុងតឺន័របង្ហើបថា ក្នុងចំណោមជនសង្ស័យទាំង១០នាក់នេះ មានម្នាក់ឈ្មោះ ណុប ឌី ជាមេខ្លោង និងជាឈ្មួញរកស៊ីឈើដុះស្លែនៅកំពង់ស្ពឺ ។ ជននេះមិនដែលសមត្ថកិច្ចបង្ក្រាបបានម្តងណាឡើយក្នុងរបររកស៊ីឈើ តែដល់ពេលប្តូររបរមកធ្វើជាមេខ្លោងរកស៊ីវះទូកុងតឺន័រ ក៏ត្រូវសមត្ថកិច្ចចាប់វាយខ្នោះ ។
ជនសង្ស័យទាំង១០នាក់ ត្រូវសមត្ថកិច្ចចាប់បាននៅភូមិផ្គង សង្កាត់ច្បារមន ក្រុងច្បារមន កាលពីព្រឹកថ្ងៃទី៣ ខែធ្នូ មាន ៖ ១-ឈ្មោះ ជួន ឡង់ឌី អាយុ៣៦ឆ្នាំ, ២-ឈ្មោះ ធាន ផាន ហៅសាក់ ស្នាក់នៅជួលផ្ទះក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ, ៣-ឈ្មោះទុន ជាតិ អាយុ២៥ឆ្នាំ អ្នកកាន់ជីភីអេស ទូកុងតឺន័រ នៅខេត្តកំពង់ចាម, ៤-ឈ្មោះ ស៊ុំ សារ៉េត អាយុ៥៦ឆ្នាំ ស្រុកកំណើតនៅខេត្តកំពង់ស្ពឺ ជាអ្នកផ្តល់ទីតាំងធ្វើសកម្មភាពប្រព្រឹត្តបទល្មើស, ៥-ឈ្មោះ ណុប ឌី អាយុ៣៦ឆ្នាំ មានទីលំនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ, ៦-ឈ្មោះ សុខ ស័ង អាយុ១៩ឆ្នាំ ខេត្តកំពង់ស្ពឺ អ្នកជួយរើអីវ៉ាន់ចេញពីទូកុងតឺន័រ, ៧-ឈ្មោះ ភួង សុខផល អាយុ៣៦ឆ្នាំ នៅ
ខេត្តកំពង់ស្ពឺ អ្នកផ្តល់ទីតាំង, ៨-ឈ្មោះ សែម សុខវិន អាយុ២៨ឆ្នាំ នៅខេត្តកំពង់ស្ពឺ អ្នកជួយរើអីវ៉ាន់, ៩-ឈ្មោះ ឈុន លឹម អាយុ២៨ឆ្នាំ នៅខេត្តកំពង់ស្ពឺ អ្នកបើករថយន្តឱ្យឈ្មោះ ជួន ឡង់ឌី និង ១០-ឈ្មោះ ឆាយ ក្តិប អាយុ៣៦ឆ្នាំ ជាអ្នកចាំមើលផ្លូវឱ្យគេធ្វើសកម្មភាព ។
ជនសង្ស័យនិងវត្ថុតាង ត្រូវបានសមត្ថកិច្ចនាំខ្លួនទៅកាន់ក្រសួងមហាផ្ទៃដើម្បីកសាងសំណុំរឿងបញ្ចូនទៅតុលាការចាត់ការតាមច្បាប់។ មជ្ឈដ្ឋានមហាជនរង់ចាំមើលថា តើមេខ្លោងវះទូកុងតឺន័រនេះមានវាសនាបានរួចខ្លួនពីសំណាញ់ច្បាប់ដែរឬទេ ខណៈមានអ្នករត់ការខ្វែងដៃខ្វែងជើង ដើម្បីសុំឱ្យមានការដោះលែងមេខ្លោងរូបនេះ ៕
ចែករំលែកព័តមាននេះ