គ្រាប់ល្ពៅមានបរិមាណម៉ង់កាណែស ម៉ាញេស្យូម ផូស្វ័រ ទង់ដែង ស័ង្កសី ជាតិដែក tryptophan និងប្រូតេអីុនក្នុងកម្រិតមួយដ៏ខ្ពស់។ ពួកវាគឺជាប្រភពដ៏ល្អនៃវីតាមីន E K C និងវីតាមីន B ជាច្រើន ។
ពួកវាក៏សម្បូរទៅដោយប្រូតេអីុនដែលមានគុណភាពល្អ និងអាស៊ីតខ្លាញ់មានសារៈសំខាន់ចំពោះសុខភាពផងដែរ ។ លើសពីនេះទៅទៀត សារធាតុប្រឆាំងអុកស៊ីតកម្ម និងសារធាតុ Phenolics មានវត្តមាននៅក្នុងទម្រង់ជាច្រើននៃគ្រាប់ល្ពៅ ។
ខាងក្រោមនេះ គឺជាអត្ថប្រយោជន៍ទាំង៤នៃគ្រាប់ល្ពៅចំពោះសុខភាព៖
១-បន្ថយកម្រិតកូឡេស្តេរ៉ុលអាក្រក់ ៖ ការទទួលទានគ្រាប់ល្ពៅអាចជួយបន្ថយកម្រិតកូឡេស្តេរ៉ុលអាក្រក់ក្នុងរាងកាយ ។ សារធាតុ phytosterols នៅក្នុងគ្រាប់ល្ពៅជួយបន្ថយកម្រិតកូឡេស្តេរ៉ុលអាក្រក់ ដូច្នេះវាក៏អាចការពារការកកឈាម និងការកកជាតិខ្លាញ់នៅតាមសរសៃឈាម ។ លើសពីនេះទៅទៀត គ្រាប់ល្ពៅសម្បូរទៅដោយអាស៊ីតខ្លាញ់ monounsaturated ដូចជាអាស៊ីត oleic ដែលជួយបន្ថយកូឡេស្តេរ៉ុលអាក្រក់ និងបង្កើនកូឡេស្តេរ៉ុលល្អក្នុងឈាម ។
២-គ្រប់គ្រងជាតិស្ករនៅក្នុងឈាម ៖ យោងតាមការសិក្សាមួយនៅឆ្នាំ២០១០ បានចេញផ្សាយនៅក្នុងទិន្នានុប្បវត្តិនៃជំងឺទឹកនោមផ្អែម និងផលវិបាកនៃជំងឺនេះបានបង្ហាញថា គ្រាប់ល្ពៅមានឥទ្ធិពលវិជ្ជមានលើអ្នកដែលមានជំងឺទឹកនោមផ្អែម ។ ការស្រាវជ្រាវនេះបានបង្ហាញថា គ្រាប់ល្ពៅជួយកែលម្អតុល្យភាពអាំងស៊ុយលីន និងទប់ស្កាត់ផលវិបាកនៃជំងឺទឹកនោមផ្អែម ដោយកាត់បន្ថយភាពតានតឹងអុកស៊ីតកម្ម ។
លើសពីនេះទៅទៀត សមាសធាតុសារធាតុគីមីរុក្ខជាតិដែលមានក្នុងប្រេងគ្រាប់ល្ពៅ ជួយក្នុងការបង្ការជំងឺទឹកនោមផ្អែមទាក់ទងនឹងតម្រងនោម ។
៣-ព្យាបាលជំងឺថប់អារម្មណ៍ ៖ ការសិក្សាមួយក្នុងឆ្នាំ២០០៧ ចេញផ្សាយនៅក្នុងទិនានុប្បវត្តិសរីរវិទ្យា និងឱសថរបស់ប្រទេសកាណាដាបានបង្ហាញថា សារធាតុ tryptophan ដែលជាអាស៊ីតអាមីណូមានក្នុងគ្រាប់ល្ពៅជួយកាត់បន្ថយជំងឺថប់អារម្មណ៍ ។
ខួរក្បាលរបស់យើងប្រើប្រាស់សារធាតុ tryptophan ដើម្បីបង្កើតសារធាតុ serotonin ដែលវាជាសារធាតុបញ្ជូនសញ្ញាសរសៃប្រសាទធ្វើឱ្យអ្នកមានអារម្មណ៍សប្បាយរីករាយ និងមានភាពធូរស្រាលជាងមុន ។ នៅពេលដែលរាងកាយរបស់យើងមានសារធាតុ tryptophan មិនគ្រប់គ្រាន់ វាអាចនាំឱ្យយើងមានជំងឺថប់អារម្មណ៍ ជំងឺធ្លាក់ទឹកចិត្ត និងភាពមិនប្រក្រតីនៃអារម្មណ៍ផ្សេងៗទៀត ។
លើសពីនេះទៀត វីតាមីន B និងអាស៊ីតខ្លាញ់អូមេហ្គា៣នៅក្នុងគ្រាប់ល្ពៅ ជួយដល់ការងារប្រព័ន្ធសរសៃប្រសាទឲ្យមានប្រសិទ្ធភាពកាន់តែល្អ កាត់បន្ថយការថប់អារម្មណ៍ និងធ្វើឲ្យប្រព័ន្ធសរសៃប្រសាទមានភាពធូរស្រាល ។
៤-បំបាត់ការរលាកសន្លាក់ឆ្អឹង ៖ គ្រាប់ល្ពៅ និងប្រេងរបស់វា មានឥទ្ធិពលប្រឆាំងនឹងការរលាក ហេតុដូចនេះហើយវាមានប្រយោជន៍ខ្លាំងណាស់នៅក្នុងការព្យាបាលជំងឺរលាកសន្លាក់ ជាពិសេសជំងឺរលាកសន្លាក់ឆ្អឹង និងជំងឺរលាកសន្លាក់រ៉ាំរ៉ៃ ។ លក្ខណសម្បត្តិប្រឆាំងនឹងការរលាក និងបំបាត់ការឈឺចាប់របស់គ្រាប់ល្ពៅអាចបន្ថយការឈឺចាប់ និងការរលាកក្នុងសន្លាក់ឆ្អឹង ។
ដើម្បីកាត់បន្ថយការរលាកនៃជំងឺរលាកសន្លាក់ ម៉ាស្សាតំបន់ដែលមានបញ្ហានេះជាមួយប្រេងគ្រាប់ល្ពៅពីរដងក្នុងមួយថ្ងៃរយៈពេល ១០នាទី ។ លើសពីនេះទៀត អ្នកគួរតែបន្ថែមគ្រាប់ល្ពៅនៅក្នុងរបបអាហាររបស់អ្នកផងដែរ ។
លើសពីនេះទៅទៀត មាតិកាស័ង្កសីខ្ពស់គាំទ្រដល់សុខភាពក្រពេញប្រូស្តាត ជួយបង្កើនលំហូរទឹកនោម និងជួយកាត់បន្ថយការនោមញឹកនៅពេលយប់ ៕
ចែករំលែកព័តមាននេះ