ខណៈដែលប្រទេសកម្ពុជានឹងរៀបចំការបោះឆ្នោតតំណាងរាស្ត្រនៅឆ្នាំ២០២៣ខាងមុខនោះ ក៏មានការលេចឡើងគណបក្សភ្លើងទៀន បានក្លាយទៅជាប្រធានបទពិភាក្សាមួយ ។ បន្ទាប់ពីបានបង្កើតប៉ុន្មានខែប៉ុណ្ណោះ មុនការបោះឆ្នោតក្រុមប្រឹក្សាឃុំសង្កាត់លទ្ធផលផ្លូវការនៃការបោះឆ្នោតជ្រើសរើស ក្រុមប្រឹក្សាឃុំសង្កាត់បានបង្ហាញថា គណបក្សភ្លើងទៀន ដែលបង្កើតឡើងដោយក្រុមអ្នកនយោបាយដែលស្និទ្ធនឹងលោក សម…
ខណៈដែលប្រទេសកម្ពុជានឹងរៀបចំការបោះឆ្នោតតំណាងរាស្ត្រនៅឆ្នាំ២០២៣ខាងមុខនោះ ក៏មានការលេចឡើងគណបក្សភ្លើងទៀន បានក្លាយទៅជាប្រធានបទពិភាក្សាមួយ ។
បន្ទាប់ពីបានបង្កើតប៉ុន្មានខែប៉ុណ្ណោះ មុនការបោះឆ្នោតក្រុមប្រឹក្សាឃុំសង្កាត់លទ្ធផលផ្លូវការនៃការបោះឆ្នោតជ្រើសរើស ក្រុមប្រឹក្សាឃុំសង្កាត់បានបង្ហាញថា គណបក្សភ្លើងទៀន ដែលបង្កើតឡើងដោយក្រុមអ្នកនយោបាយដែលស្និទ្ធនឹងលោក សម រង្ស៊ី បានទទួលសន្លឹកឆ្នោតច្រើនជាងគេ ទីពីរបន្ទាប់ពីគណបក្សប្រជាជនកម្ពុជា ។
លទ្ធផលបង្ហាញថា គណបក្សភ្លើងទៀនទទួលសម្លេងឆ្នោត ប្រមាណ១,៦ លានសម្លេង ឬប្រមាណ២២ភាគេយនៃសន្លឹកឆ្នោតបានការទាំងអស់ ។ ចំណែកគណបក្សប្រជាជនកម្ពុជាវិញបានសម្លេងជាង៥,៣៧ លាន ឬ ៧៤,៣២ ភាគរយ។ លទ្ធផលនេះបង្ហាញថា សម្លេងអ្នកប្រឆាំងគាំទ្រគណបក្សភ្លើងទៀនមានច្រើនគួរសម ។
លទ្ធផលនេះនឹងជំរុញអោយមានការចោទសួរថា តើគណបក្សភ្លើងទៀននឹងអាចក្លាយជាគូរប្រកួតប្រជែងដ៏ស្វិតស្វាញជាមួយគណបក្សកាន់អំណាច ឬគណបក្សប្រជាជនកម្ពុជាដែរឬទេ ក្នុងការបោះឆ្នោតឆ្នាំ២០២៣ខាងមុខនេះ?
រឿងមួយដ៏ច្បាស់លាស់នោះ គឺគណបក្សភ្លើងទៀននឹងអាចទទួលបានអាសនៈខ្លះនៅក្នុងរដ្ឋសភាដែលបង្កើតចេញពីការបោះឆ្នោតជ្រើសរើសតំណាងរាស្ត្រឆ្នាំ២០២៣ ។ ប៉ុន្តែគណបក្សនេះនឹងមិនអាចយកឈ្នះគណបក្សប្រជាជនកម្ពុជាបានទេ ។ ប៉ុន្តែគណបក្សនេះនឹងក្លាយជាគណបក្សប្រឆាំងលេចធ្លោនៅក្នុងរដ្ឋសភា ក្រោយការបោះឆ្នោត២០២៣ ។
ដោយមានពេលវេលាប្រមាណ១ឆ្នាំទៀតឆ្ពោះទៅរកការបោះឆ្នោតឆ្នាំ២០២៣នោះគេគិតថា គណបក្សភ្លើងទៀនមានពេលវេលាច្រើន ដើម្បីស្វែងរកការគាំទ្របន្ថែមទៀតពីប្រជាជនកម្ពុជា ។ ពិសេស គឺការកៀងគរអ្នកមិនបានទៅបោះឆ្នោតនៅឆ្នាំ២០២២ ចំនួន២០ភាគរយ ។ អ្នកមិនបានទៅបោះឆ្នោតឆ្នាំ២០២២ ភាគច្រើន គឺជាអ្នកបោះឆ្នោតមិនទាន់សម្រេចចិត្តនៅឡើយ ។
សម្លេងអ្នកគាំទ្រគណបក្សភ្លើងទៀនអាចនឹងកើនឡើងទៀត បើសិនជាគណបក្សនេះអាចទាក់ទាញអ្នកបោះឆ្នោតបន្ថែមទៀតអោយមកបោះឆ្នោតគាំទ្រដល់ខ្លួន។ ទោះបីជាគណបក្សភ្លើងទៀនអាចបង្កើនអ្នកគាំទ្រក្តី គណបក្សភ្លើងទៀននឹងមិនអាចមានសម្លេងគ្រប់គ្រាន់អាចយកឈ្នះ គណបក្សប្រជាជនកម្ពុជាបានទេ ដោយសារសម្លេងគាំទ្រគណបក្សប្រជាជន និងសម្លេងគាំទ្រគណបក្សភ្លើងទៀននៅឃ្លាតឆ្ងាយពីគ្នាខ្លាំង បើយោងលើលទ្ធផលការបោះឆ្នោតក្រុមប្រឹក្សាឃុំសង្កាត់ឆ្នាំ២០២២។
ប៉ុន្តែគណបក្សភ្លើងទៀន អាចនឹងធ្វើអោយគណបក្សប្រជាជនកម្ពុជា កាន់តែប្រឹងប្រែងក្នុងដំណើរឆ្ពោះ ទៅកាន់ការបោះឆ្នោតឆ្នាំ២០២៣ដ៏សំខាន់ បើសិនជាគណបក្សប្រជាជនកម្ពុជាចង់បន្តកាន់ អំណាចតទៅទៀត ក្រោយការបោះឆ្នោតឆ្នាំ២០២៣ ខាងមុខនេះ។
ជាការពិតរយ:ពេលប្រាំឆ្នាំកន្លងមក សមាជិកសមាជិកាគណបក្សប្រជាជនបានខិតខំទូទាំងប្រទេស មុននឹងឈានដល់ការបោះឆ្នោតក្រុមប្រឹក្សាឃុំសង្កាត់ ។ កិច្ចប្រឹងប្រែងទាំងអស់នោះបានធ្វើ អោយប្រជាជនភាគច្រើនជាង៧៤ភាគរយនៅតែគាំទ្រមិនងាករេចំពោះគណបក្សកាន់អំណាច ។
អ្នកគាំទ្រគណបក្សកាន់អំណាចនឹងមិនមានការប្រែប្រួលឡើយ ដោយសារតែពួកគេពេញចិត្តនឹងការដឹកនាំរបស់គណបក្សប្រជាជនកម្ពុជា ។ អ្នកបោះឆ្នោតទាំងនោះ គឺជាអ្នកមានភាពស្មោះត្រង់ មិនងាករេចំពោះគណបក្សប្រជាជនកម្ពុជា។
ការបោះឆ្នោតអោយគណបក្សប្រជាជនគឺជាការបោះឆ្នោតដើម្បីសន្តិភាពនិងការអភិវឌ្ឍ ។ នេះជា អ្វីដែលអ្នកបោះឆ្នោតអោយគណបក្សប្រជាជនយល់ឃើញ និងមានភក្តីភាពចំពោះគណបក្សនេះ ។ ប្រជាជនបោះឆ្នោតអោយគណបក្សប្រជាជនដោយសារការពេញចិត្តចំពោះការដឹកនាំប្រទេសដោយសម្តេចតេជោហ៊ុនសែន និងគណបក្សប្រជាជនកម្ពុជា ៕
ចែករំលែកព័តមាននេះ