សុខភាព៖ យោងតាមការផ្សាយពីប្រភពបរទេស ក្នុងសម័យកាលដ៏មមាញឹកនេះ មិនថាអ្នកហត់នឿយនឹងការរៀនសូត្រ ឬសម្ពាធពីកន្លែងការងារឡើយ ការមើលរំលងសុខភាពផ្លូវចិត្តអាចប៉ះពាល់ដល់ជីវិតអ្នកក្នុងរយៈពេលវែង។ ការចេះលួងលោម និងថែទាំចិត្តខ្លួនឯង គឺជាវិនិយោគដ៏មានតម្លៃបំផុត ដើម្បីឱ្យអ្នកមានកម្លាំងតស៊ូទៅមុខទៀត។ អ្នកអាចចាប់ផ្ដើមអនុវត្តទម្លាប់សាមញ្ញៗដែលជួយឱ្យផ្លូវចិត្តស្រស់ថ្លា និងមានលំនឹងឡើងវិញ។

គ្រឹះដ៏សំខាន់បំផុតគឺ ការសម្រាកឱ្យបានគ្រប់គ្រាន់ ព្រោះការគេងមិនលក់នឹងធ្វើឱ្យរាងកាយបញ្ចេញអ័រម៉ូនស្ត្រេសកាន់តែខ្លាំង។ ការចំណាយពេលត្រឹម ១៥ នាទីដើម្បីហាត់ប្រាណស្រាលៗ ក៏អាចជួយឱ្យខួរក្បាលបញ្ចេញសារធាតុរីករាយមកវិញដែរ។ បន្ថែមពីនេះ ការហាត់ដកដង្ហើមវែងៗ ឬការចំណាយពេលស្ងប់ស្ងាត់ដើម្បីសរសេររៀបរាប់ពីអារម្មណ៍ក្នុងសៀវភៅកំណត់ហេតុ គឺជាវិធីជម្រះភាពស្មុគស្មាញចេញពីខួរក្បាលបានយ៉ាងមានប្រសិទ្ធភាព។

ដើម្បីឱ្យចិត្តកាន់តែមានក្ដីសុខ អ្នកគួរកាត់បន្ថយការប្រើប្រាស់បណ្ដាញសង្គមដែលនាំឱ្យមានការប្រៀបធៀបខ្លួនឯងទៅនឹងអ្នកដទៃ ហើយងាកមកផ្ដោតលើការរៀបចំសម្អាតកន្លែងរស់នៅឱ្យមានសណ្ដាប់ធ្នាប់វិញ។ ការចេះផ្ដល់រង្វាន់ដល់ខ្លួនឯង មិនថាជាការទិញរបស់ដែលចូលចិត្ត ឬការញ៉ាំអាហារឆ្ងាញ់ៗជាមួយមនុស្សដែលអ្នកទុកចិត្ត គឺជាការលើកទឹកចិត្តដ៏អស្ចារ្យដែលធ្វើឱ្យអ្នកមានអារម្មណ៍ថា រាល់ការខិតខំប្រឹងប្រែងកន្លងមកពិតជាមានតម្លៃ។ ការស្រឡាញ់ខ្លួនឯង ចាប់ផ្ដើមពីការថែរក្សាចិត្តឱ្យមានសុភមង្គលជានិច្ច។

​ការថែទាំសុខភាពផ្លូវចិត្តមិនមែនជារឿងពិបាកឡើយ វាគ្រាន់តែទាមទារឱ្យអ្នកចេះយកចិត្តទុកដាក់លើអារម្មណ៍ខ្លួនឯងជារៀងរាល់ថ្ងៃ និងផ្លាស់ប្តូរទម្លាប់តូចតាចដើម្បីក្ដីសុខដ៏ធំធេង៕